ចិនប្រារព្វខួប៤០ឆ្នាំនៃការធ្វើកំណែទម្រង់សេដ្ឋកិច្ចបើកទីផ្សារសេរី
ចុះផ្សាយនៅថ្ងៃ៖
ថ្ងៃអង្គារទី ១៨ ធ្នូ ២០១៨ នេះ ចិនបានប្រារព្វខួប ៤០ឆ្នាំ គត់ នៃការធ្វើកំណែទម្រង់សេដ្ឋកិច្ច ផ្តួចផ្តើមដោយប្រមុខ តេង ស៊ាវពីង។ ជាកំណែទម្រង់ដ៏សំខាន់ ដែលជាឬសគល់នៃជោគជ័យសេដ្ឋកិច្ចចិនរហូតមកទល់សព្វថ្ងៃ និងដែលបានរុញច្រានចិនឱ្យបានក្លាយជាមហាអំណាចសេដ្ឋកិច្ចពិភពលោក អាចប្រកួតប្រជែងបាននឹងសហរដ្ឋអាមេរិក ! ជាមួយនឹងមោទនភាពនេះ លោកប្រធានាធិបតីចិន ស៊ី ជីនពីង បានប្រកាសប្រឹងធ្វើកំណែទម្រង់បន្ថែមទៀត ប៉ុន្តែដោយគ្មានបង្ហាញអំពីវិធានការថ្មីទេ។
ថ្ងៃនេះ ចិនកំពុងប្រារព្វខួប៤០ឆ្នាំនៃការធ្វើកំណែទម្រង់សេដ្ឋកិច្ច ដែលផ្តួចផ្តើមឡើងដោយលោក តេង ស៊ាវពីង។ កំណែទម្រង់សេដ្ឋកិច្ច បិទបញ្ចប់សេដ្ឋកិច្ចសមូហភាព ត្រូវបានប្រកាសធ្វើនៅថ្ងៃទី ១៨ ធ្នូ ឆ្នាំ ១៩៧៨ ដោយដាក់ជំនួសមកវិញនូវ របបកម្មសិទ្ធិឯកជន និងទីផ្សារសេរី។ ប្រជាពលរដ្ឋចិនមានសិទ្ធិពេញលេញក្នុងការធ្វើកសិកម្ម រកស៊ី ជាលក្ខណៈឯកជន ហើយអាចយកផលដែលផលិតបានទៅលក់នៅលើទីផ្សារ នៅក្នុងតម្លៃដែលកំណត់ដោយការព្រមព្រៀង រវាងអ្នកទិញ និងអ្នកលក់ ស្របទៅតាមយន្តការនៃទីផ្សារសេរី។
សូមអាន ៖ តេង ស៊ាវពីង និងកំណែទម្រង់សេដ្ឋកិច្ច
លើសពីនេះទៅទៀត ប្រជាជនចិនម្នាក់ៗ មានសិទ្ធិបោះទុនរកស៊ី បង្កើតជាក្រុមហ៊ុនសហគ្រាសជាលក្ខណៈឯកជនសុទ្ធសាធ ដែលជារឿងមិនធ្លាប់មាន ចាប់តាំងពីបក្សកុម្មុយនិស្តឡើងកាន់អំណាច កាលពីឆ្នាំ១៩៤៩។ វិស័យវិនិយោគនេះ ក៏ត្រូវបានបើកចំហយ៉ាងទូលំទូលាយទទួលវិនិយោគិនបរទេស។ ដើម្បីទាក់ទាញវិនិយោគបរទេស តំបន់សេដ្ឋកិច្ចពិសេសជាច្រើនត្រូវបានបង្កើតឡើង នៅតាមតំបន់ជាប់នឹងឆ្នេរសមុទ្រ។
៧៤០លាននាក់រួចពីភាពក្រីក្រ
គិតមកទល់ថ្ងៃនេះ ចិនបានបើកចំហ និងធ្វើកំណែទម្រង់សេដ្ឋកិច្ច បាន៤០ឆ្នាំហើយ ប៉ុន្តែនៅប៉េកាំង ពិធីការបែបកុម្មុយនិស្ត នៅរក្សាទុកដដែល ! នៅក្នុងសុន្ទរកថាដ៏វែងអន្លាយ ជិតមួយម៉ោងកន្លះ ទៅកាន់មន្ត្រីជាន់ខ្ពស់ដ៏ស្រគត់ស្រគំតាមបែបកុម្មុយនិស្ត លោកប្រធានាធិបតី ស៊ី ជីនពីង បានឧទ្ទិសជាពិសេសដល់ភាពរីកចម្រើននៃសេដ្ឋកិច្ចនិងសង្គម ដ៏ខ្លាំងក្លារបស់ចិន ៖ “កាលពី ៤០ឆ្នាំមុន ពលរដ្ឋចិន ត្រូវមានប្រកាន់ដៃដើម្បីអាចទិញសម្លៀកបំពាក់ ត្រី-សាច់ អង្ករ ឬតៅហ៊ូ តែថ្ងៃនេះប្រកាន់ដៃនោះចូលសារមន្ទីរអស់ហើយ !”
លោកបានស្វាគមស្នាដៃរបស់ប្រមុខដឹកនាំមុនៗ និងបានប្រកាសថា “កំណែទម្រង់សេដ្ឋកិច្ចនិងការបើកចំហប្រទេស ដែលផ្តួចផ្តើមឡើងដោយលោក តេង ស៊ាវពីង តាំងពីឆ្នាំ១៩៧៨មក បានធ្វើឱ្យប្រជាពលរដ្ឋចិន ចំនួន ៧៤០លាននាក់ រួចផុតពីភាពក្រីក្រ”។ សម្រាប់លោកស៊ីជីនពីង គំរូសេដ្ឋកិច្ចបែបសង្គមនិយមចិន ក្រោមម្លប់ដឹកនាំរបស់បក្សកុម្មុយនិស្ត ជាជោគជ័យ។
"បើកចំហសេដ្ឋកិច្ចនាំមកនូវភាពជឿនលឿន ឯការបិទទ្វារនាំទៅរកភាពអន់ថយ" ... ហេតុដូច្នេះហើយបានជាចិន ត្រូវប្រឹងបន្ថែមទៀត ពង្រឹងការអភិវឌ្ឍសេដ្ឋកិច្ចជាតិ ដោយគាំទ្រ និងដឹកនាំការអភិវឌ្ឍសេដ្ឋកិច្ចឯកជន ពង្រីកការវិនិយោគបរទេស តែមិនអនុញ្ញាតឱ្យបរទេសមកជ្រៀតជ្រែកផ្លូវដើររបស់ខ្លួនទេ ៖ “គ្មាននរណាអាចមកបញ្ជាប្រជាពលរដ្ឋឱ្យធ្វើនេះ ឬមិនធ្វើនោះឡើយ !” នេះទំនងជាឃ្លាដែលលោកស៊ី ជីនពីង ចង់ផ្លែផ្កាឱ្យអាមេរិក ដែលកំពុងមានសង្គ្រាមពាណិជ្ជកម្មនឹងគ្នា។
លោកស៊ី ជីនពីង បន្តធ្វើកំណែទម្រង់តែគ្មានផ្តល់វិធានការថ្មី
ដោយសារកំណែទម្រង់បើកចំហទីផ្សារនេះ ចិនបានក្លាយមហាអំណាចសេដ្ឋកិច្ច ទីពីរ ដែលកំពុងដេញប្រកួតជាមួយអាមេរិកទៀត។ លោក ស៊ី ជីនពីង ប្រមុខដឹកនាំចិន ដ៏មានអំណាចបំផុតបន្ទាប់ពីម៉ៅ សេទុង បានប្រកាសថាចិននឹងប្រឹងបើកចំហទីផ្សារ និងពង្រឹងកំណែទម្រង់បែបនេះតទៅទៀត។
ប៉ុន្តែ ថ្វីបើលោកស៊ីជីនពីង បានធានាអះអាងថា ចិននឹងបន្តដំណើរ តាមគន្លងរបស់លោក តេងស៊ាវពីង បើកចំហប្រទេស និងធ្វើកំណែទម្រង់អភិវឌ្ឍសេដ្ឋកិច្ចមែន ក៏ប៉ុន្តែលោកមិនបានផ្តល់វិធានការអ្វីជាក់ស្តែងទេ ក្រៅអំពីត្រៀមបើកចំហប្រទេសទទួលក្រុមហ៊ុនបរទេសឱ្យបានច្រើនជាងមុន ព្រោះសម្ពាធមកពី ក្រៅជាពិសេសមកពីអាមេរិកខ្លាំងក។ ប៉ុន្តែលោក ស៊ី ជីនពីង បានឆ្លៀតបញ្ជាក់ថា ចិនធ្វើការប្តូរផ្លាស់នូវអ្វីដែលអាចធ្វើកំណែទម្រង់បាន និងមិនប្តូរផ្លាស់នូវអ្វីមានគួរឬមិនអាចទេ។
បើកចំហ និងការធ្វើកំណែទម្រង់ ជាភាពសំខាន់និងចាំបាច់មែន តែចិនក៏ត្រូវការរក្សាស្ថិរភាពប្រទេស និងដំឡើងគុណភាពផលិតផលរកឃើញថ្មី ព្រមទាំងឆ្លើយតបទៅនឹងបញ្ហាអាកាសធាតុ ដោយត្រូវប្រឹងទប់ទល់នឹងការបញ្ចេញឧស្ម័នពុលទៀត។ ហើយសម្រាប់លោក ស៊ី ជីនពីង ភាពចាំបាច់សង្កត់ធ្ងន់ទៅលើ លំនឹង រវាងការធ្វើកំណែទម្រង់ អភិវឌ្ឍនិងស្ថិរភាព ព្រោះចិនពេលនេះ ដែលជាប់បំណុលយ៉ាងធ្ងន់ធ្ងរ កំពុងមានកំណើនសេដ្ឋកិច្ចក៏បន្ថយល្បឿន។
ដើម្បីទប់ស្កាត់ការបន្ថយល្បឿននៃកំណើនសេដ្ឋកិច្ច ចិនបានចាត់វិធានការមួយខ្សែរួចហើយ ដូចជាបន្ទាបប្រាក់បំរុង បន្ទាបពន្ធ និងបង្កើនចំណាយលើហេដ្ឋារចនាសម្ព័ន្ធ។
នៅថ្ងៃនេះ មានសេចក្តីអំពាវនាវរបស់លោកស៊ី ជីនពីង ដូច្នេះនៅប៉ុន្មានថ្ងៃខាងមុខ ទំនងជានឹងអាចមានជំនួបប្រជុំសំខាន់ស្តីពីកំណែទម្រង់សេដ្ឋកិច្ចហើយ។ ហើយបើតាមអ្នកវិភាគនយោបាយនៅប៉េកាំង ថ្វីបើសង្គ្រាមពាណិជ្ជកម្មចិនជាមួយអាមេរិក បើអូសបន្លាយពេលយូរ នឹងអាចធ្វើឱ្យមានទស្សនវិស័យច្រើនសម្រាប់ការនាំចេញ មែន តែអាចជាឱកាសល្អទៅវិញ ក្នុងការធ្វើកំណែទម្រង់ធំដំណាក់កាលទីពីរ។ ដោយហេតុថាការផ្លាស់ប្តូរសេដ្ឋកិច្ច មិនប្តូរផ្លាស់ប្រព័ន្ធនយោបាយ ! កំណែទម្រង់ដំណាក់កាលទីពីរអាចជួយបក្សឱ្យកាន់តែ ផ្តាច់ការ និងរស់បានយូរអង្វែង។ នេះបើតាមអ្នកវិភាគដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ