Huawei ចេញមុខការពារខ្លួន ថាគ្មានទំនាក់ទំនងជាមួយរដ្ឋាភិបាលចិន
ក្រោយរឿងអាស្រូវចាប់ប្រធានផ្នែកហិរញ្ញវត្ថុ និងជាប់បម្រាមមិនឱ្យចូលធ្វើចរាចរណ៍ក្នុងទីផ្សាររបស់ប្រទេសធំៗជាច្រើន និងជាបន្តបន្ទាប់មក នៅថ្ងៃអង្គារនេះ ក្រុមហ៊ុនHuawei បានរៀបចំសន្និសីទកាសែត នៅទីស្នាក់ការធំរបស់ក្រុមហ៊ុននាទីក្រុងShenzhen ដើម្បីបំបែកភាពសង្ស័យ។ ប្រធានក្រុមហ៊ុន Huawei បានចេញមុខបដិសេធ ដោយចំៗថាក្រុមហ៊ុនគ្មានចំណងទាក់ទងជាមួយភ្នាក់ងារចារកិច្ចរបស់ប៉េកាំងទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
“គ្មានភស្តុតាងអ្វីដែលបញ្ជាក់ថាHuawei គំរាមកំហែងសន្តិសុខជាតិប្រទេសណាមួយឡើយ!” នេះជាប្រសាសន៍លោក Ken Hu ដែលជាប្រធានក្រុមហ៊ុនដោយធានាអះអាងទៀតថា ក្រុមហ៊ុន មិនដែលបានទទួលសំណើស្វែងរកទិន្នន័យអ្វីសោះពីរដ្ឋាភិបាលចិន។
ដើម្បីឆ្លើយតបទៅនឹងសេចក្តីព្រួយបារម្ភរបស់ក្រុមបស្ចឹមលោក ក្នុងវិស័យសន្តិសុខនិងចារ កិច្ច និងដើម្បីផ្តល់ភាពជឿជាក់ដល់ក្រុមហ៊ុនទូរគមនាគមន៍បរទេស ក្រុមហ៊ុនHuawei បានសម្រេចបើកមន្ទីរពិសោធន៍ស្រាវជ្រាវរបស់ខ្លួនឱ្យអ្នកកាសែតចូលមើល និងឱ្យក្រុមហ៊ុនបរទេសចូលសាកល្បងប្រើសម្ភារៈបរិក្ខារក្នុងមន្ទីរពិសោធន៍ ជាមួយនឹងលេខសម្ងាត់សម្រាប់ចូលដល់ប្រភពដើមទៀតផង។
សូមបញ្ជាក់ថា នៅក្នុងឆ្នាំ២០១៨នេះ Huawei បានជួបការលំបាកយ៉ាងខ្លាំង ! អាមេរិកដែលបារម្ភនឹងភាពលូតលាស់របស់ចិនក្នុងវិស័យបច្ចេកវិទ្យា បានញុះញង់សម្ព័ន្ធមិត្តឱ្យឈប់ប្រើសម្ភារៈបរិក្ខារទូរគមនាគមន៍របស់Huawei ជាពិសេសសម្ភារៈពាក់ព័ន្ធប្រព័ន្ធចល័ត5G ដែលកំពុងលូតលាស់ និងជាវិស័យដ៏មានអនាគត។ អាមេរិកបានថែមទាំងជំរុញកាណាដាឱ្យឃាត់ខ្លួនប្រធានផ្នែកហិរញ្ញវត្ថុបានទៀត។ ផលិតផលរបស់Huawei ត្រូវបានហាមឃាត់ តាំងពីប៉ុន្មានខែមកហើយ នៅអាមេរិក អូស្ត្រាលី នូវែលហ្សេឡង់ អង់គ្លេស បារាំង ឬអាល្លឺម៉ង់។ សាធារណរដ្ឋឆែក ទើបបានហាមឃាត់ដែរកាលពីថ្ងៃចន្ទ បន្ទាប់ពីភ្នាក់ងារសន្តិសុខព័ត៌មាននិងអ៊ីនធ័រនែតយល់ថា កម្មវិធីនិងបរិក្ខារទូរគមនាគមន៍របស់Huawei គំរាមដល់សន្តិសុខជាតិ។
ប៉ុន្តែ "ហាមឃាត់ក្រុមហ៊ុនមួយ ជាពិសេសដូច្នេះ មិនអាចដោះស្រាយបញ្ហាសន្តិសុខអ៊ីនធ័រនែតបានទេ" ! នេះបើតាមលោកប្រធានក្រុមហ៊ុនHuawei ដោយរំលឹកថា ក្រុមហ៊ុនជារបស់បុគ្គលិក១០០% គ្មានចំណែករបស់រដ្ឋឬយោធាចិនលូកឡំទេ។ Huawei បានធ្វើវិនិយោគដល់ទៅរាប់ពាន់លានអឺរ៉ូ ដើម្បីអភិវឌ្ឍន៍បណ្តាញ5G និងបានចុះកិច្ចសន្យាពាណិជ្ជកម្មចំនួន២៥ ព្រមទាំងផ្តល់ការងារដល់បុគ្គលិកជាង៨ម៉ឺននាក់ ក្នុងនោះជិតពាក់កណ្តាលជាអ្នកស្រាវជ្រាវនិងអភិវឌ្ឍ។
សាកល្បង បញ្ជាក់មតិសាធារណៈតាំងពីជាងមួយឆ្នាំមកហើយថា ក្រុមហ៊ុនគ្មានទំនាក់ទំនងជាមួយប៉េកាំង ប្រធានក្រុមហ៊ុនHuawei បានបង្ហាញក្តីសង្ឃឹម និងទំនុកចិត្តលើប្រព័ន្ធតុលាការ ក្នុងប្រទេសដែលហាមឃាត់មិនឱ្យប្រើផលិតផលHuawei។ ប៉ុន្តែលោក កេន ហ៊ូ Ken Hu បដិសេធមិនធ្វើអត្ថាធិប្បាយអ្វីទាំងអស់ ទាក់ទងនឹងការចាប់ខ្លួនលោកស្រី ម៉េង វ៉ានចូវ ប្រធានហរិញ្ញវត្ថុរបស់ក្រុមហ៊ុន នៅកាណាដា។
ក្រុមបស្ចឹមលោក មិនទុកចិត្តHuawei ដោយហេតុតែស្ថាបនិករបស់ក្រុម គឺលោក Ren Zhengfei ជាអតីតវិស្វកររបស់យោធាចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ