បង់ក្លាដែស៖លោកស្រីឆេក ហាស៊ីណាឆ្ពោះទៅកាន់តំណែងនាយករដ្ឋមន្រ្តីសម្រាប់អាណត្តិទី៤
នៅក្នុងប្រទេសបង់ក្លាដែស លទ្ធផលផ្លូវការនៃការបោះឆ្នោតសភានាថ្ងៃអាទិត្យ ទី៣០ ធ្នូបានផ្តល់ជោគជ័យដល់គណបក្សសម្ព័ន្ធអាវ៉ាមីរបស់លោកស្រីនាយករដ្ឋមន្រ្តីផុតអាណត្តិឆេក ហាស៊ីណា។ ជាមួយនឹងជោគជ័យនេះ លោកស្រីឆេក ហាស៊ីណាដែលគេស្គាល់ជាអ្នកនយោបាយកណ្តាប់ដៃដែកនឹងបន្តកាន់តំណែងនាយករដ្ឋមន្រ្តីសម្រាប់អាណត្តិទី៤។ តែក្រុមគណបក្សប្រឆាំងបានច្រានចោលលទ្ធផលបោះឆ្នោត និងបរិហារពីភាពមិនប្រក្រតីនៅក្នុងការបោះឆ្នោត ព្រមទាំងទាមទារឲ្យមានការបោះឆ្នោតឡើងវិញ។ ចំណែកលោក អាស្ហ៊ែក ហាក អ្នកស្រាវជ្រាវពីបញ្ហានយោបាយ និងសន្តិសុខបានលើកឡើងពីការលួចបន្លំសន្លឹកឆ្នោតរៀបចំទុកជាមុន និងថា ការបោះឆ្នោតរបៀបនេះជារឿងអាក្រក់ណាស់សម្រាប់លទ្ធិប្រជាធិបតេយ្យនៅបង់ក្លាដែស។
ចុះផ្សាយនៅថ្ងៃ៖
ស្តាប់ - ០១:៤៣
« ភ្នាក់ងារមកពីគណបក្សប្រឆាំងដែលមានតួនាទីតាមដាន និងឃ្លាំមើលដំណើរការបោះឆ្នោតត្រូវបានគេហាមឃាត់មិនឲ្យចូលទៅក្នុងមណ្ឌលបោះឆ្នោតជាច្រើន។ ដូច្នេះពួកគេមិនអាចតាមដាន ឃ្លាំមើលពីដំណើរការត្រឹមត្រូវនៃការបោះឆ្នោតនោះទេ។
ខ្ញុំក៏ទទួលបានព័ត៌មានពីមិត្តភ័ក្តិ ពីបណ្តាញសង្គម និងពីក្រុមអ្នកកាសែតដែលបញ្ជាក់ថា មានអ្នកបោះឆ្នោតមួយចំនួនបានទៅដល់មណ្ឌលបោះឆ្នោត តែមិនអាចបោះឆ្នោតបានឡើយ ព្រោះឈ្មោះរបស់ពួកគេត្រូវបានអ្នកផ្សេងបោះជំនួសរួចហើយ។
នៅមានករណីជាក់ស្តែងមួយទៀតដែលអ្នកឆ្លើយឆ្លងព័ត៌មានឲ្យ BBC បានឃើញផ្ទាល់ភ្នែកនៅព្រលឹមស្រាងៗក្នុងថ្ងៃបោះឆ្នោត ពោលនៅពេលមណ្ឌលបោះឆ្នោតទើបបើកទ្វារ។ អ្វីដែលអ្នកឆ្លើយឆ្លងព័ត៌មានឲ្យ BBC បានឃើញនោះ គឺមានមនុស្សមួយក្រុមបានចូលទៅក្នុងមណ្ឌលបោះឆ្នោតជាមួយនឹងហឹបឆ្នោតពេញដោយសន្លឹកឆ្នោត។
ដូច្នេះ បើគេប្រមូលព័ត៌មានលើកឡើងដោយប្រព័ន្ធផ្សព្វផ្សាយទាំងអស់នេះ រួមទាំងការចោទប្រកាន់របស់ក្រុមមេបក្សប្រឆាំងផងនោះ គេអាចសន្និដ្ឋានបានយ៉ាងច្បាស់ថា ការលួចបន្លំសន្លឹកឆ្នោតពិតជាមានមែន ហើយការលួចបន្លំនោះទៀតសោតពិតជាបានរៀបចំទុកជាមុន។ សម្រាប់ខ្ញុំ ថ្ងៃបោះឆ្នោតនោះជាថ្ងៃដ៏អាក្រក់ខ្លាំងណាស់សម្រាប់លទ្ធិប្រជាធិបតេយ្យនៅបង់ក្លាដែស ព្រោះវាមិនបានហុចអ្វីវិជ្ជមានទាក់ទងនឹងវឌ្ឍនភាព និងសេចក្តីប្រាថ្នាបែបប្រជាធិបតេយ្យឡើយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ