ឡានបុកសម្លាប់មនុស្សលើផ្លូវដ៏មមាញឹក នៅតូក្យូ នៅថ្ងៃឆ្លងឆ្នាំថ្មី
នៅជប៉ុន បុរសម្នាក់ បានបើកឡានសំដៅហ្វូងមនុស្សដែលកំពុងចូលរួម ទទួលឆ្នាំថ្មី ២០១៩។ ហេតុការណ៍នេះ បានកើតឡើង នៅលើផ្លូវផ្សាររាត្រី ដ៏មមាញឹកមួយ ក្នុងទីក្រុងតូក្យូ និងបានបណ្តាលឲ្យមនុស្សរងរបួស ៩នាក់ ដែលក្នុងនោះ មានម្នាក់ជានិស្សិតដែលរងរបួសធ្ងន់។ តាមប្រព័ន្ធផ្សព្វផ្សាយក្នុងស្រុកជប៉ុន ប៉ូលិសកំពុងបើកការស៊ើបអង្កេត ដើម្បីចង់ដឹងថា តើជនសង្ស័យដែលប៉ូលិសបានចាប់ខ្លួន អាចត្រូវតុលាការជំនុំជម្រះដែរឬទេ។
ចុះផ្សាយនៅថ្ងៃ៖
ស្តាប់ - ០១:៤៧
នៅភ្លាមៗ ក្រោយហេតុការណ៍បុកសម្លាប់ ប៉ូលិសជប៉ុនបានចាប់ខ្លួន ជនល្មើស ក្នុងបទសង្ស័យ ប៉ុនប៉ងសម្លាប់មនុស្ស។ តាមប្រព័ន្ធផ្សព្វផ្សាយជប៉ុន NHK ជនសង្ស័យដែលបានបើកឡាន បុកសម្លាប់មនុស្ស ដោយចេតនា មានអាយុ២១ឆ្នាំ និងមានឈ្មោះថា Kazuhiro Kusakebe។ តាមប៉ូលិសជប៉ុន នៅម៉ោង១២អាធ្រាត្រ ថ្ងៃចន្ទ ឆ្លងចូលអង្គារ ជនសង្ស័យ បានបើកឡាន សំដៅហ្វូងមនុស្ស ដែលកំពុងអបអរចូលឆ្នាំថ្មី ២០១៩ នៅលើផ្លូវថ្មើរជើង ដ៏អ៊ូរអមួយ ឈ្មោះ Kakeshita។ Kakeshita ជាផ្លូវផ្សាររាត្រី ដ៏ល្បីល្បាញ ខាងម៉ូដសំលៀកបំពាក់ និងអាហារ នៅទីក្រុងតូក្យូ ដែលទាក់ទាញ មិនថា យុវជន ជប៉ុន និងទេសចរបរទេសរាប់ម៉ឺននាក់ ក្នុងមួយថ្ងៃៗ។
រហូតមកដល់ពេលនេះ នៅមិនទាន់មានការអះអាងណាមួយ ដែលថា មានជនបរទេស ក្នុងចំណោមអ្នករងរបួស នៅក្នុងហេតុការណ៍បុកសម្លាប់មនុស្សនៅយប់ថ្ងៃចន្ទម្សិលមិញនោះទេ។ ប៉ុន្តែ តាមកាសែតក្នុងស្រុកជប៉ុន ជនរងគ្រោះភាគច្រើន ជាជនជាតិជប៉ុន ដែលធ្វើដំណើរទៅបន់ស្រន់ សម្រាប់ឆ្នាំថ្មី នៅវិហារក្បែរនោះ។
តាមប៉ូលិសជប៉ុន ដែលដកស្រង់ប្រភព ដោយទីភ្នាក់ងារព័ត៌មានបារាំង AFP ដំបូងឡើយ ជនសង្ស័យ បាននិយាយប្រាប់ប៉ូលិសថា ខ្លួនធ្វើសកម្មភាពភេរវកម្ម ប៉ុន្តែ ក្រោយមកជនសង្ស័យបានអះអាងវិញថា ខ្លួនបើកឡានបុករះសម្លាប់មនុស្សដើម្បីសងសឹកទៅនឹងការប្រហារជីវិត។ គេមិនច្បាស់ទេថា តើជនសង្ស័យចង់សំដៅទៅលើការប្រហារជីវិតពិសេស ណាមួយ ឬក៏ការអនុវត្តទោសប្រហារជីវិតជាទូទៅ នៅប្រទេសជប៉ុន។
ប្រភពពីខាងក្រុមស៊ើបអង្កេតវិញ បាននិយាយប្រាប់ទីភ្នាក់ងារជប៉ុនក្យូដូថា គេបានរកឃើញ សាំងយន្តហោះមួយធុង នៅក្នុងរថយន្ត ដែលជនសង្ស័យអះអាងថា គេគ្រោងនឹងដុតឲ្យឆេះនៅក្នុងហេតុការណ៍យប់មិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ