ហ្វីលីពីន៖ព្យុះសង្ឃរា Usman បានផ្តាច់ជីវិតមនុស្សយ៉ាងតិច ១២៦នាក់
នៅក្នុងប្រទេសហ្វីលីពីន រដ្ឋអំណាចបានប្រកាសឲ្យដឹងនៅថ្ងៃអាទិត្យ ទី៦ មករានេះថា ព្យុះសង្ឃរា Usman ដែលបានបោកបក់លើប៉ែកកណ្តាលប្រទេសនៅក្រោយថ្ងៃបុណ្យនូអែលបានផ្តាច់ជីវិតមនុស្សយ៉ាងតិច ១២៦នាក់ បាត់ខ្លួន ២៦នាក់ និងមានអ្នករងរបួសយ៉ាងតិច ៧៥នាក់។ តាមរដ្ឋអំណាច ចំនួនអ្នកស្លាប់មួយភាគធំបានស្លាប់ដោយដីបាក់សង្កត់ពីលើ។ គួររម្លឹកថាជារៀងរាល់ឆ្នាំ ហ្វីលីពីនបានរងគ្រោះដោយព្យុះសង្ឃរាប្រមាណជា ២០ដង និងបានសម្លាប់មនុស្សជាច្រើនរយនាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
គឺនៅថ្ងៃទី២៩ ធ្នូ ពោលក្រោយបុណ្យណូអែលបាន ៣ថ្ងៃដែលព្យុះសង្ឃរា Usman បានបោកបក់យ៉ាងខ្លាំងទៅលើប៉ែកកណ្តាល និងប៉ែកខាងកើតប្រទេស ពិសេសនៅតំបន់ព្រៃភ្នំប៊ីកុល។ ជាទូទៅ តំបន់ព្រៃភ្នំមួយនេះតែងទទួលរងព្យុះសង្ឃរាញឹកញាប់ និងតែងទទួលការប្រកាសអាសន្នជាមុននៅពេលព្យុះធ្វើដំណើរជិតដល់។ តែបើតាមមើលទៅ ប្រហែលជាពលរដ្ឋរស់នៅក្នុងតំបន់នោះមិនបានចាត់វិធានការម៉ត់ចត់ដើម្បីប្រឈមទប់នឹងឥទ្ធិពលហិង្សារបស់ខ្យល់ព្យុះ។ ម្យ៉ាងទៀត មានពលរដ្ឋភាគច្រើនហាក់បានរារែកក្នុងការចាកចេញពីផ្ទះសម្បែងទៅកាន់តំបន់សុវត្តិភាពក្នុងពេលបុណ្យណូអែល។ ទន្ទឹមគ្នា រដ្ឋអំណាចក្នុងតំបន់ក៏មិនបានផ្តល់សញ្ញាអាសន្នជាមុនពីការមកដល់នៃព្យុះសង្ឃរាដែរ។
លោក Edgar Posadas អ្នកនាំពាក្យនៃទីភ្នាក់ងារគ្រប់គ្រងគ្រោះមហន្តរាយធម្មជាតិបានថ្លែងថា ក្នុងរយៈពេលតែ ២ថ្ងៃ បរិមាណទឹកភ្លៀងដែលបានបង្កដោយព្យុះសង្ឃរា Usman មានកម្រិតស្មើនឹងបរិមាណទឹកភ្លៀងធ្លាក់ក្នុងរដូវកាលធម្មតាជាង ១ខែនៅក្នុងតំបន់ព្រៃភ្នំប៊ីកុល។ ខណៈនេះ ក្រុមអ្នកជួយសង្រ្គោះកំពុងបន្តការស្រាវជ្រាវដើម្បីស្វែងរកអ្នកបាត់ខ្លួនចំនួន ២៦នាក់។ គួររម្លឹកថាក្រៅពីមានអ្នកស្លាប់ អ្នកបាត់ខ្លួន និងអ្នករបួស ព្យុះសង្ឃរា Usman បានបង្ខំឲ្យមានអ្នកភៀសខ្លួនចេញពីផ្ទះសម្បែងជាង ១៥ម៉ឺននាក់។
ជារៀងរាល់ឆ្នាំ ហ្វីលីពីនតែងទទួលរងព្យុះសង្ឃរាប្រមាណជា ២០ដង និងបានសម្លាប់មនុស្សជាច្រើនរយនាក់។ ធ្ងន់ធ្ងរជាងគេក្នុងខែវិច្ឆិកា ឆ្នាំ ២០១៣ ព្យុះសង្ឃរាហាយយ៉ានបានបណ្តាលឲ្យមានមនុស្សស្លាប់ ឬបាត់ខ្លួនជាង ៧ ៣៥០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ