កាសែតចិន៖ លោកស៊ី ជីនពីងគាំទ្រជំហររបស់កូរ៉េខាងជើង
ចុះផ្សាយនៅថ្ងៃ៖
ស្តាប់ - ០៦:៣០
នៅក្នុងសន្និសីទកាសែត នៅថ្ងៃព្រហស្បតិ៍ ទី ១០ មករា ប្រធានាធិបតីកូរ៉េខាងត្បូង លោកមូន ចៃអ៊ីន បានបញ្ជាក់ថា ទស្សនកិច្ចរបស់មេដឹកនាំកូរ៉េខាងជើង ទៅទីក្រុងប៉េកាំង ជាសញ្ញាដែលបង្ហាញថា ជំនួបកំពូលជាលើកទី២ រវាងលោកដូណាល់ ត្រាំ ហើយនិងលោកគីនៅក្នុងដំណើរទស្សនកិច្ច នៅទីក្រុងប៉េកាំង មេដឹកនាំកូរ៉េខាងជើង លោកគីម ជុងអ៊ុន បាននិយាយប្រាប់ប្រធានាធិបតី ចិន លោកស៊ី ជីនពីង ពីបំណងចង់ឃើញ លទ្ធផលជាផ្លែផ្កា នៅក្រោយជំនួបកំពូលជាលើកទី២ ជាមួយ លោកប្រធានាធិបតីអាមេរិក។ នេះបើតាមកាសែតរដ្ឋចិន ចុះផ្សាយ នៅថ្ងៃព្រហស្បតិ៍នេះ។
ទីភ្នាក់ងារព័ត៌មានចិនថ្មី បានចុះផ្សាយថា លោកប្រធានាធិបតីចិន លោកស៊ី ជីនពីងបាននិយាយប្រាប់មេដឹកនាំកូរ៉េខាងជើង លោកគីម ជុងអ៊ុនថា ចិននៅគាំទ្រជំហររបស់កូរ៉េខាងជើង និងថា ចិនគាំទ្រឲ្យមានជំនួបកំពូលអាមេរិក និងកូរ៉េខាងជើង សម្រាប់សំណុំរឿងនុយក្លេអ៊ែរកូរ៉េខាងជើង។
ប៉ុន្តែ លោកស៊ី ជីនពីង បានទាមទារឲ្យភាគីទាំងពីរគឺអាមេរិក និងកូរ៉េខាងជើង គួរជួបគ្នា នៅផ្លូវកណ្តាលមួយ។ នៅក្នុងជំនួប នៅថ្ងៃពុធម្សិលមិញ មេដឹកនាំកូរ៉េខាងជើង លោកគីម ជុងអ៊ុនបានលើកឡើងពីការលំបាក ហើយនិងក្តីបារម្ភ នៅក្នុងការជួបចរចាជាមួយភាគីអាមេរិក។ នេះបើតាមការចុះផ្សាយរបស់ទីភ្នាក់ងារព័ត៌មានកូរ៉េខាងជើង។
ជំនួបកំពូលជាប្រវត្តិសាស្រ្តអាមេរិក និងកូរ៉េខាងជើង កាលពីខែមិថុនា ឆ្នាំ ២០១៨ នៅប្រទេសសិង្ហបុរី បានឈានទៅបង្កើតកិច្ចព្រមព្រៀង មួយ ដែលមានន័យទូលំទូលាយ មិនច្បាស់លាស់ទាក់ទងនឹងការលុបបំបាត់ចោលអាវុធនុយក្លេអ៊ែររបស់កូរ៉េខាងជើង។ នៅក្រោយជំនួបកំពូល ជាមួយប្រធានាធិបតី អាមេរិក មេដឹកនាំកូរ៉េខាងជើងបានទាមទារឲ្យអាមេរិកដកចោលទណ្ឌកម្មសេដ្ឋកិច្ច ប៉ុន្តែ អាមេរិករបស់លោកដូណាល់ ត្រាំ បានបញ្ជាក់ នៅថ្ងៃអាទិត្យទី ៦មករាថា ទណ្ឌកម្មនៅតែមាន និងខ្លាំងដូចមុន ដរាបណា អាមេរិកមើលមិនឃើញការអនុវត្តជាក់ស្តែងរបស់កូរ៉េខាងជើង ក្នុងការឈានទៅបំផ្លាញអាវុធ នុយក្លេអ៊ែរទេនោះ។
នៅក្នុងសារស្វាគមឆ្នាំថ្មី ឆ្នាំ ២០១៩ លោកគីម ជុងអ៊ុនធ្លាប់បានព្រមានថា បើសិនអាមេរិកនៅតែបន្តដាក់ទណ្ឌកម្ម និងទាមទារដាក់លក្ខខណ្ឌ លើកូរ៉េខាងជើង ជាឯកតោភាគីតទៅទៀត កូរ៉េខាងជើង នឹងផ្លាស់ប្តូរជំហរ ស្វែងរកមធ្យោបាយថ្មី ដើម្បី ការពារអធិបតេយ្យភាពរបស់ប្រទេស។
នៅក្នុងជំនួបជាមួយមេដឹកនាំកូរ៉េខាងជើង នៅថ្ងៃពុធ លោកប្រធានាធិបតី ចិន ស៊ី ជីនពីង បាននិយាយថា កូរ៉េខាងជើងបានធ្វើសកម្មភាពវិជ្ជាមានជាច្រើន។ កូរ៉េខាងជើងធ្លាប់បានបាញ់សាកល្បងអាវុធនុយក្លេអ៊ែរ និងមីស៊ីលដែលអាចហោះទៅដល់ទឹកដីអាមេរិក។ ប៉ុន្តែ ក្នុងរយៈពេល១ឆ្នាំចុងក្រោយនេះ កូរ៉េខាងជើង បានផ្អាករាល់សកម្មភាព សាកល្បងនុយក្លេអ៊ែរ ដែលអង្គការសហប្រជាជាតិ ហាមឃាត់។ ចិន និងរុស្ស៊ី បានទាមទារឲ្យមានការបន្ធូរបន្ថយ ការដាក់ទណ្ឌកម្មសេដ្ឋកិច្ចលើក្រុងព្យុងយ៉ាង ប៉ុន្តែ អាមេរិកបដិសេធ។
ដំណើរទស្សនកិច្ចរបស់មេដឹកនាំ កូរ៉េខាងជើង ទៅប្រទេសចិនជាលើកទី៤ ត្រូវបានគេមើលឃើញថា ជាដំណើរទៅសុំយោបល់ពីសម្ព័ន្ធមិត្តចិន ដើម្បីរកកិច្ចព្រមព្រៀងជាយុទ្ធសាស្ត្រ នៅមុនពេលដែលមេដឹកនាំកូរ៉េខាងជើង ត្រូវបើកជំនួបកំពូលជាលើកទី២ ជាមួយលោកដូណាល់ ត្រាំ។
តាមទម្លាប់ លោកគីម ជុងអ៊ុន តែងធ្វើដំណើរទៅជួបមេដឹកនាំចិន នៅមុន ឬនៅក្រោយមានជំនួបកំពូលជាមួយប្រធានាធិបតីអាមេរិកាំង។ លោកគីម ជុងអ៊ុនដែលមិនធ្លាប់ធ្វើដំណើរទៅប្រទេសចិន ចាប់តាំងពីចូលកាន់តំណែងកំពូលរបស់កូរ៉េខាងជើង តាំងពីឆ្នាំ ២០១១ បានបង្កើនដំណើរទស្សនកិច្ចរបស់ខ្លួនទៅប្រទេសចិន ជាបន្តបន្ទាប់ នៅមុនពេលបើកជំនួបកំពូលជាមួយប្រធានាធិបតីកូរ៉េខាងត្បូង ឬលោកដូណាល់ ត្រាំ កាលពីខែមិថុនាឆ្នាំមុន។
នៅក្រោយជំនួបកំពូល នៅប្រទេសសិង្ហបុរី ការចរចារវាងកូរ៉េខាងជើង និងអាមេរិកហាក់នៅជាប់គាំង បន្ទាប់ពីលោកដូណាល់ ត្រាំ បានប្រកាសលុបចោលដោយប្រថុចញ៉ុចបំផុត ដំណើរទស្សនកិច្ចរបស់ប្រមុខការបរទេសអាមេរិកទៅកាន់ទីក្រុងព្យុងយ៉ាង។ នៅថ្ងៃអាទិត្យ លោកដូណាល់ ត្រាំ បានអះអាងថា ភាគីទាំងពីរកំពុងចរចាគ្នាពីទីកន្លែង ដែលអាចបើកជំនួបកំពូលអាមេរិក និងកូរ៉េខាងជើង លើកទី ២។ កាសែតកូរ៉េខាងត្បូងបានលើកឡើងពីទីក្រុងហាណូយ សម្រាប់ជំនួបកំពូលលើកទី២រវាងលោកដូណាល់ ត្រាំ ហើយនិងលោកគីម ជុងអ៊ុន។
សំណុំរឿងនុយក្លេអ៊ែររបស់កូរ៉េខាងជើងជាកូនអុករបស់ចិន សម្រាប់ចរចាក្នុងជម្លោះពាណិជ្ជកម្មជាមួយអាមេរិក
នៅពេលដែលកំពុងមានជម្លោះពាណិជ្ជកម្មជាមួយអាមេរិក ប្រាកដណាស់ថា ប្រធានាធិបតីចិន អញ្ជើញមេដឹកនាំកូរ៉េខាងជើង នៅពេលនេះ ដើម្បីប្រយោជន៍ជាយុទ្ធសាស្រ្តរបស់ចិន តទល់នឹងអាមេរិក។ អាមេរិកបានប្រកាសធ្វើសង្រ្គាមពាណិជ្ជកម្មជាមួយចិន ដើម្បី ធ្វើឲ្យចិនទ័លច្រក។ ប៉ុន្តែ ចិនវិញ ចង់ប្រើទំនាក់ទំនងរបស់ខ្លួន ជាមួយ កូរ៉េខាងជើង ដើម្បីទប់ទល់នឹងអាមេរិកវិញ។ ដោយចាប់ដៃ ល្អូកល្អឺនជាមួយ លោកគីម ជុងអ៊ុន ប្រធានាធិបតីចិនចង់បង្ហាញទៅភាគីអាមេរិក ថា ខ្លួននៅតែមានកូរ៉េខាងជើង ដែលមានអាវុធនុយក្លេអ៊ែរនោះ ជាកូនអុក សម្រាប់ការចរចាជម្លោះពាណិជ្ជកម្មជាមួយអាមេរិក។
ក្រុងប៉េកាំងបានបដិសេធរហូតមកថា មិនយកសំណុំរឿងនុយក្លេអ៊ែរកូរ៉េខាងជើងជាកូនអុក ជាឈ្នាន់ ដើម្បីដាក់សម្ពាធលើកអាមេរិក នៅក្នុងការចរចាជម្លោះពាណិជ្ជកម្មទេ ប៉ុន្តែ ទង្វើរបស់ចិន បានស្តែងយ៉ាងច្បាស់ ថា ចិនបានប្រើគ្រប់មធ្យោបាយ ដើម្បីធ្វើយ៉ាងណាឲ្យអាមេរិកទន់ជំហរ ក្នុងការចរចាជាមួយចិន។ ដោយពិតទៅ ចិនធ្វើដូច្នេះ តាមចិត្តខ្លួនឯង ផង និងតាមការចង់បានរបស់អាមេរិកផង។ ត្រូវដឹងថាចាប់តាំងពីបង្កើតសង្រ្គាមពាណិជ្ជកម្មជាមួយ ចិន តាមរយៈការបង្កើនពន្ធ លើទំនិញចិន នាំចូលទៅអាមេរិក លោកដូណាល់ ត្រាំ ជាប្រធានាធិបតីអាមេរិកដំបូងគេ ដែល បានទនិ្ទញ ហើយទន្ទិញទៀតថា ដរាបណា ចិន មិនព្រមធ្វើចូលរួមដាក់សម្ពាធឲ្យកូរ៉េខាងជើងលះបង់ចោលអាវុធនុយក្លេអ៊ែរទេ នោះទណ្ឌកម្មដាក់ពន្ធរបស់អាមេរិកទៅលើទំនិញចិន នឹងកាន់តែខ្លាំង ធ្ងន់ធ្ងរជាងមុនទៅទៀត។
ទស្សនកិច្ច លើកទី៤នៅប៉េកាំង ជាសាររបស់មេដឹកនាំកូរ៉េខាងជើង ទៅគ្រប់ភាគី
កូរ៉េខាងជើងអាច ចង់ឆ្លៀតឱកាសដែលចិននិងអាមេរិកកំពុងមានទំនាក់ទំនងមិនល្អ និងធ្វើសង្រ្គាមពាណិជ្ជកម្មរវាងគ្នា ដើម្បី ទាញប្រយោជន៍ផ្ទាល់ខ្លួន។ ដោយធ្វើដំណើរទៅជួបប្រធានាធិបតីចិន លើកនេះ មេដឹកនាំកូរ៉េខាងជើងចង់ផ្ញើសារ ទៅប្រទេសសំខាន់ពីរ គឺចិន និងអាមេរិក។
ដំបូងគេ លោកគីម ជុងអ៊ុនចង់ បង្ហើរសារ ទុកជាមុន ទៅប្រធានាធិបតីអាមេរិក។ នៅមុនបើកជំនួបកំពូលជាលើកទី២ ជាមួយប្រធានាធិបតីអាមេរិកាំង មេដឹកនាំកូរ៉េខាងជើង ចង់ប្រាប់ទៅភាគីអាមេរិកថា ខ្លួននៅតែមានជានិច្ច ចិនជាបង្អែក ដែលគាំទ្រ ទាំងផ្នែកសេដ្ឋកិច្ច និងយោធាដល់កូរ៉េខាងជើង នោះបើទោះបីជាកូរ៉េខាងជើងរងការដាក់ទណ្ឌកម្មពីអាមេរិកក៏ដោយ។ ដោយបើកយុទ្ធនាការការទូត និងឈប់សម្រាក មិនបាញ់មីស៊ីល នៅមួយឆ្នាំចុងក្រោយនេះ ព្រមទាំងបំផ្លាញ ផ្លូវចូលទៅកន្លែងបាញ់សាកល្បងអាវុធនុយក្លេអ៊ែរផង ក្រុងព្យុងយ៉ាង ចង់បង្ហាញ ប្រាប់ទៅសហគមន៍អន្តរជាតិផងដែរថា កូរ៉េខាងជើងខំប្រឹងឈ្មុសឈ្មុល ដើម្បីសន្តិភាព ចាប់ផ្តើមធ្វើសកម្មភាពដើម្បីឈានទៅលុបបំបាត់ចោលអាវុធនុយក្លេអ៊ែរ តាមការសន្យារបស់ខ្លួន គឺផ្ទុយពីលោកដូណាល់ ត្រាំ។ លោកដូណាល់ ត្រាំ ដែលនៅបន្តដាក់ទណ្ឌកម្មសេដ្ឋកិច្ចលើកូរ៉េខាងជើង។
មួយវិញទៀត ដោយទៅជួប មេដឹកនាំចិន នៅមុនបើកជំនួបលើកទី២ ជាមួយអាមេរិក មេដឹកនាំកូរ៉េខាងជើង ចង់បញ្ជូនសញ្ញាទៅភាគីចិន សម្ព័ន្ធមិត្តរបស់ខ្លួន ដែរថា កូរ៉េខាងជើងនឹង មានឱកាសច្រើនដើម្បីទៅចរចា ទទួលបានសម្បទានច្រើនពីខាងអាមេរិក។ ពោលគឺកូរ៉េខាងជើង អាចចុះសម្រុងជាមួយប្រទេសដទៃ ដោយមិនចាំបាច់ត្រូវការពឹងជំនួយទាំងស្រុងរបស់ចិននោះទេ។ កូរ៉េខាងជើងដែលប្រកាសដាក់ខ្លួនជាមហាអំណាចនុយក្លេអ៊ែរ ចង់បញ្ជាក់ទៅចិនថា ខ្លួនមានសារៈសំខាន់ ដែលចិន មិនត្រូវមើលរំលងនោះទេ។ ជាពិសេស នៅពេលដែលចិន កំពុងឈ្លោះពាណិជ្ជកម្មជាមួយអាមេរិក ទៀតនោះ គឺថា កូរ៉េខាងជើងនឹងរឹតតែដើរតួ ផ្តល់ជំនួយសំខាន់ដល់សម្ព័ន្ធមិត្តចិន។
យុទ្ធសាស្រ្តទាញយកប្រយោជន៍ទាំងសងខាង គឺពីភាគីជម្លោះទាំងពីរយ៉ាងដូច្នេះ ធ្លាប់ត្រូវបានជីតារបស់លោកគីម ជុងអ៊ុន គឺលោកគីម អ៊ីលស៊ុង ធ្លាប់បានប្រើម្តងហើយទៅលើប្រទេសចិន ហើយនិងសហភាពសូវៀត ដែលឈ្លោះដណ្តើមឥទ្ធិពលប្រទេសកុម្មុយនិស្ត នៅក្នុងសម័យសង្រ្គាមត្រជាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ