ឡាវ ទើបបានប្រគល់ឲ្យ រុស្ស៊ី រថក្រោះសូវៀតដ៏ល្បីល្បាញធុន T-34 ចំនួន ៣០ គ្រឿង
ចុះផ្សាយនៅថ្ងៃ៖
ស្តាប់ - ០៦:០៨
ក្រសួងការពារជាតិឡាវ បានប្រគល់ឲ្យក្រសួងយោធារុស្ស៊ី រថក្រោះសូវៀតដ៏ល្បីល្បាញ ធុន T-34 ចំនួន ៣០ គ្រឿង ដែលទោះបី វាផលិតតាំងពីក្នុងឆ្នាំ ១៩៤២ ម៉្លេះ ក៏វានៅតែដំណើរការដដែល។ ក្នុង យប់ឆ្លងមកថ្ងៃពុធទី ៩ មករា ក្រសួងការពារជាតិរុស្ស៊ី បានប្រកាសឲ្យដឹងថា រថក្រោះទាំងនេះ ត្រូវបានដឹក តាមផ្លូវសមុទ្រ មកដល់ក្រុងផែ Vladivostok នៅឯចុងបូព៏ាប្រទេសរុស្ស៊ី ហើយពីទីនោះ ដឹកតាម ក្បួន រថភ្លើងពិសេស ពីទិសខាងកើត ចម្ងាយជាង ៩.០០០ គម ឆ្លងកាត់ប្រទេសរុស្ស៊ីទាំងមូល មកទិសខាងលិច មកកាន់បន្ទាយទាហានមួយ នៅតំបន់ជាយក្រុងម៉ូស្គូ។ រថក្រោះទាំងនេះ នឹងត្រូវរុស្ស៊ី ប្រើ សម្រាប់ចូលរួម ក្នុងព្យុហយាត្រាកងទ័ពឧទ្ទិសដល់មហាជ័យជំនះថ្ងៃ ៩ ឧសភា លើកងទ័ពហ៊ីត្លែរ សម័យសង្គ្រាមលោក លើកទី២ , សម្រាប់ការថតភាពយន្តប្រវត្តិសាស្ត្រ សម្រាប់តាំងបង្ហាញលើទីធ្លាសារមន្ទីរ។ ទោះបី ការប្រគល់ នេះ ត្រូវ ភាគីឡាវអះអាងថា ជា”កាយវិការសុឆន្ទៈ” ក៏ដោយ ក៏ ប្រព័ន្ធផ្សព្វផ្សាយអង់គ្លេស BBC ប៉ាន់ស្មាន ថា អាចជា ការសង ខ្លះៗ បំណុលដែលឡាវជំពាក់រុស្ស៊ី តាំងពីជំនាន់សូវៀតមក។ រថក្រោះ T-34 ចារ ឈ្មោះជាប់ក្នុង ទំព័រប្រវត្តិសាស្ត្រ ដោយបានបង្ហាញថ្វីដៃខ្លួន នៅតាមសមរភូម៏សង្គ្រាម។
ក្នុងសេចក្តីជូនដំណឹងរបស់ក្រសួងការពារជាតិរុស្ស៊ី មានលើកឡើងថា ៖
-ក្រសួងការពារជាតិនៃ សាធារណដ្ឋប្រជាធិបតេយ្យប្រជាមានិតឡាវ ក្នុងក្របខ័ណ្ឌនៃ សហប្រតិបត្តិការ យោធា-បច្ចេកទេសទ្វេភាគី ប្រគល់ជូន ក្រសួងយោធាសហព័ន្ធរុស្ស៊ី រថក្រោះ T-34 ចំនួន ៣០ គ្រឿង ដែល នៅដំណើរការពេញលក្ខណៈ នៅឡើយ។ មកទល់ពេលថ្មីៗ រថក្រោះទាំងនេះ បានស្ថិតនៅប្រចាំការ ក្នុង កងទ័ពប្រជាជនឡាវ។
គឺមួយឆ្នាំមុន កាលពីខែ មករា ឆ្នាំ ២០១៨ ពេលលោករដ្ឋមន្ត្រីការពារជាតិរុស្ស៊ី SergueiShoiguបំពេញទស្សនកិច្ច នៅប្រទេសឡាវ ដែលគូភាគីបានព្រមព្រៀងគ្នា អំពី ការបង្វែររថក្រោះទាំងនេះ មក ប្រទេសរុស្ស៊ីវិញ។
រថក្រោះដែលប្រគល់មកនេះ ត្រូវបានដឹកតាមផ្លូវសមុទ្រ មកដល់ក្រុងផែ Vladivostokចុងបូព៌ាប្រទេស រុស្ស៊ី។ ហើយពីទីនោះ វាត្រូវបានដឹកតាមផ្លូវដែក មកដល់តំបន់ជាយក្រុងម៉ូស្គូ តែម្តង។
តាមការលំអិតឲ្យដឹង នៃកាណាល់ទូរទស្សន៍ Russia-24
រថក្រោះទាំងនេះ ត្រូវបាន វៀតណាមផ្ទេរទៅឲ្យ ឡាវក្នុងរង្វង់ឆ្នាំ ទី ៨០ នៃសតវត្សមុន។ វៀតណាមផ្ទាល់ បានទទួលវា ដែលកែឲ្យទំនើបទៅហើយ ក្នុងទសវត្សទី៦០ គឺ ពីសហភាពសូវៀត ដើម្បីការពារទល់នឹង សង្គ្រាមឈ្លានពាន ពីខាង សរអា ពីកណា្តលទសវត្សទី ៦០ ដល់ជិតកណ្តាលទសវត្សទី៧០។
ប្រព័ន្ធផ្សព្វផ្សាយអង់គ្លេស BBCធ្វើអត្ថាធិប្បាយ អំពីរឿងនេះ ដោយប្រមាណថា ការប្រគល់ រថក្រោះ ទាំងនេះ អាចជាការសងខ្លះៗ បំណុល ដែលឡាវជំពាក់រុស្ស៊ី តាំងពីជំនាន់សហភាពសូវៀតមក។ តម្លៃនៃការប្រគល់នេះ ឥតមានបង្ហើបឲ្យដឹងឡើយ។
តាមទិន្នន័យទីភ្នាក់ងារពត៌មានរុស្ស៊ី Interfax ភាគីឡាវ បានផ្ទេររថក្រោះ ទាំងនេះ មកឲ្យរុស្ស៊ី ក្នុងឋានៈជា “ កាយវិការសុឆន្ទៈ “ ។ ប្រភពក្នុង Interfax បន្ថែមថា ឡាវ ជាដៃគូ របស់រុស្ស៊ី ក្នុងវិស័យសហប្រតិបត្តិការយោធា-បច្ចេកទេស ។
តើឡាវអាចសងឬទេ ភាគមួយនៃបំណុលដែលខ្លួនជំពាក់រុស្ស៊ីតាមវិធីប្រគលរថក្រោះទាំងនោះ ?
ក្នុងឆ្នាំ ២០០៣ រុស្ស៊ី បានលុបចោលអស់ ៧០% នៃបំណុលដែលឡាវជំពាក់តាំងពីជំនាន់សូវៀតមក ក្នុង ទឹកប្រាក់ជាង ១.០០០ លានដុល្លារ។ ដោយលុបកាលណោះអស់ ៧០០ លាន ដុល្លារ ឡាវនៅជំពាក់រុស្ស៊ី ក្នុងទឹកប្រាក់ ៣៨០ លាន ដុល្លារ ដែលរុស្ស៊ី បានទុកពេលឲ្យឡាវសង ក្នុងអំឡុងពេលដល់ទៅ ៣៣ ឆ្នាំ។
តម្លៃរថក្រោះ T-34 នៅលើទីផ្សារក្រៅផ្លូវការ ត្រូវពួកអ្នកជំនាញ ប្រមាណក្នុងកម្រិត ប៉ុន្មានសែនដុល្លារ បើ វា នៅដើរនៅឡើយ ។ តាមធម្មតា និយមទិញរថក្រោះបែបនេះ គឺ អ្នកដែលចូលចិត្តធ្វើសមុច្ច័យវត្ថុកម្រៗ ។ ប៉ុន្តែ តើរវាងរដ្ឋ និង រដ្ឋ វាត្រូវកាត់ថ្លៃក្នុងកម្រិតណា គឺ គេមិនអាចដឹងឡើយ។
តាមមតិ លោក Serguei Denisentsev អ្នកជំនាញនៃ មជ្ឈមណ្ឌលវិភាគអំពីយុទ្ធសាស្ត្រ និង បច្ចេកវិជ្ជា លើទីផ្សារក្រៅផ្លូវការនៃរថក្រោះចាស់ៗ តម្លៃវា គឺ អាស្រ័យនឹង សភាពបច្ចេកទេស និង គ្រឿងផ្សំ ដែលខ្លះ តម្រូវឲ្យផ្លាស់ប្តូរ។ ទោះយ៉ាងណាក៏ដោយ ក៏តម្លៃរថក្រោះបែបនេះ អាច ស្ថិតនៅចន្លោះពី រាប់ម៉ឺនដុល្លារ ដល់ រាប់សែនដុល្លារ។ បានន័យថា រថក្រោះទាំង ៣០ គ្រឿងនោះ សរុបទៅបានថ្លៃមិនជាច្រើនសោះឡើយ គឺ ខ្ទង់ជុំវិញ ១.០០០.០០០ ដុល្លារ។
លោក Serguei Denisentsev បានរំលឹកព្រមជាមួយនេះថា ក្នុងខែធ្នូ ឆ្នាំ ២០១៨ កន្លងទៅ មានលេចឮជា ដំណឹងដែលថា ឡាវបានទទួលពីរុស្ស៊ី រថក្រោះមួយចំនួន ធុន T-72 កែអោយទំនើបទៅហើយ ក្រោមឈ្មោះថា T-72 B1 ។
តើ T-34 ជារថក្រោះបែបណា ?
T-34 ជារថក្រោះសូវៀតសែនល្បីល្បាញ ដែលឈ្មោះវាចារជាប់ក្នុងទំព័វប្រវត្តិសាស្ត្រ។ វាបានចូលរួម ក្នុង ការប្រយុទ្ធនៃ កងទ័ពក្រហម សឹងលើគ្រប់សមរភូម៌ នៃសង្គ្រាមលោកលើកទី២ បូកទាំងក្នុង ប្រតិបត្តិការ វាយសម្រុកចាប់យកក្រុង Berlin ជាកំពែងចុងក្រោយនៃរបប Nazi អាល្លឺម៉ង់។
រថក្រោះ T-34 នៅដើមឡើយ មានកាណុងកាលីប ៧៦ មីលីម៉ែត្រ បានបម្រើជា គ្រឹះនៃរថពាសដែក សូវៀត រហូតដល់ឆ្នាំ ១៩៤៤ ពេលដែលកងទ័ពសូវៀត បានទទួលរថក្រោះធុននេះ ដែលកែឲ្យទំនើប ដោយកាណុងវា មានកាលីប ដល់ ៨៥ មីលីម៉ែត្រ ម៉្លោះហើយបានជាឈ្មោះពេញរបស់វា គឺ T-34-85 ។
ក្រោយពីសង្គ្រាមលើកលើកទី២ ចប់ទៅក្នុងឆ្នាំ ១៩៤៥ រថក្រោះ T-34 បានចូលរួមក្នុងសង្គ្រាមនៅកូរ៉េ ពី ឆ្នាំ ១៩៥០ ដល់ ១៩៥៣ ហើយ ដោយសាររថក្រោះនេះ ដែលកងទ័ពកូរ៉េខាងជើង នាប៉ុន្មានខែដំបូងនៃ សង្គ្រាម អាចលុកចូលទៅក្នុងដែនដីកូរ៉េខាងត្បូង។
រថក្រោះ T-34 ក៏បានចូលរួមក្នុងសង្គ្រាមអារ៉ាប-អ៊ីស្រាអែល។ ប្រទេសអេហ្ស៊ីព បានប្រើរថក្រោះនេះ ពេលមានផ្ទុះឡើងជា វិបត្តិកាណាល់ Suez ឆ្នាំ ១៩៥៦។ រថក្រោះ T-34 ក៏ត្រូវបានគេប្រើក្នុង សង្គ្រាមស៊ីវិល នៅ Yougoslavie ទសវត្សទី ៩០ ។
រថក្រោះ T-34 ដែលចាប់ផ្តើមផលិតដោយរោងចក្រ នៅតំបន់នាយភ្នំ Oural ក្នុងឆ្នាំ ១៩៤២ សរុបទៅ មានចំនួន ៣ ម៉ឺន ៥ ពាន់ ៤០០ គ្រឿង។ សព្វថ្ងៃ នៅក្នុងលោក វានៅសេសសល់តិចតួចណាស់ ហើយ ក្លាយជា វត្ថុកម្រ។
កងទ័ពរុស្ស៊ី បច្ចុប្បន្ន បំពាក់ទៅដោយរថក្រោះទំនើបស្រករថ្មីក្រោមឈ្មោះថា Armat បង្ហាញឲ្យ សាធារណជនឃើញជាលើកទី១ ក្នុងព្យុហយាត្រា ៣ ឆ្នាំមុន ឧទ្ទិសដល់ខួប ៧០ ឆ្នាំ នៃមហាជ័យជំនះលើ កងទ័ពអាល្លឺម៉ង់ហ្វាស៊ីស្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ