បង់ក្លាដែស ៖ កម្មករកាត់ដេរធ្វើបាតុកម្មទាមទារដំឡើងប្រាក់ខែ
នៅប្រទេសបង់ក្លាដែស កម្មករកម្មការិនីរោងចក្រកាត់ដេរសម្លៀកបំពាក់ រាប់ពាន់នាក់ បាននាំគ្នាធ្វើបាតុកម្ម តាំងពីមួយសប្តាហ៍មកហើយ ដើម្បីទាមទារដំឡើងខែ។ រោងចក្រជាច្រើនបានបិទទ្វារ ផ្លូវថ្នល់ត្រូវបិទខ្ទប់ដោយ របាំងបាតុករ។ មានស្លាប់យ៉ាងហោចណាស់បាតុករម្នាក់ និងរបួសជាង៥០នាក់ ...
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ចលនាបាតុកម្មលាយលំដោយអំពើហិង្សា បានជំរុញឱ្យរោងចក្រកាត់ដេរ ចំនួន ៥២ ខ្លះតូចខ្លះធំ ត្រូវបិទទ្វារផ្អាកសកម្មភាព។ ជាអំពើហិង្សាបង្កឡើងដោយថៅកែរោងចក្រមកលើកម្មករកម្មការិនីជាបាតុករ។ នេះបើតាមការចោទប្រកាន់របស់មេដឹកនាំសហជីព។
ប៉ូលិសបានប្រើកាណុងបាញ់ទឹក បាញ់ផ្សែងបង្ហូរទឹកភ្នែក គ្រាប់កៅស៊ូ ដើម្បីបំបែកហ្វូងបាតុករ ដែលបានមកប្រមូលផ្តុំគ្នានៅតាមផ្លូវនាទីក្រុងដាកា និងតំបន់ជាយក្រុង តាំងពី៧ថ្ងៃមកហើយ ដើម្បីទាមទារដំឡើងបា្រក់ខែ។ ប៉ុន្តែបាតុករបង់ក្លាដែស ដែលហាក់មានសាមគ្គីភាពគ្នាបំផុត មិនព្រមចាកចេញពីថ្នល់ទេ ដរាបណាគ្មានដំណោះស្រាយសមស្របតាមការទាមទាររបស់ពួកគេ។
នៅខែនេះ បង់ក្លាដែសបានដំឡើងប្រាក់ខែអប្បបរិមារបស់កម្មករដែលស៊ីឈ្នួលថោកជាងគេបំផុត ចំនួន៥០% ពោលឱ្យឡើងដល់ ៨ពាន់តាកា ត្រូវនឹង៩៥ដុល្លារអាមេរិកក្នុងមួយខែ។ ប៉ុន្តែ ការដំឡើងប្រាក់ខែនេះនៅតែមិនគ្រប់គ្រាន់ទេ ព្រោះអ្វីៗក៏ឡើងថ្លៃខ្លាំងជាពិសេសតម្លៃស្នាក់នៅតែម្តង។
មានប្រជាជនសរុប១៦៥លាននាក់ សេដ្ឋកិច្ចរបស់បង់ក្លាដែសរំពឹងយ៉ាងខ្លាំងទៅលើកម្លាំង កម្មកររាប់លាននាក់ ដែលធ្វើការក្នុងរោងចក្រកាត់ដេរ។ ការលក់សម្លៀកបំពាក់ តំណាងឱ្យ៨០%នៃការនាំចេញរបស់ប្រទេស។ អតិថិជនដ៏ធំរបស់បង់ក្លាដែស គឺក្រុមហ៊ុនអន្តរជាតិH&M Primark walmart Tesco Carrefour និង Aldi។ ជាសរុប រោងចក្រកាត់ដេរ និងសម្លៀកបំពាក់បង់ក្លាដែសទាំងជាង៤៥០០រោងចក្រ ប្រមូលចំណូលបានប្រមាណជាង៣០ពាន់លានដុល្លារ ក្នុងមួយឆ្នាំ២០១៨។ កាលពីឆ្នាំទៅ បង់ក្លាដែសបានជាប់ឈ្មោះជាប្រទេសនាំចេញសម្លៀកបំពាក់លំដាប់ទីពីរ បន្ទាប់ពីចិន ហើយបង់ក្លាដែសមានមហិច្ឆតាអភិវឌ្ឍន៍វិស័យឧស្សាហកម្មកាត់ដេរនេះ ឱ្យឡើងដល់៥០ពាន់លានដុល្លារក្នុងឆ្នាំ នៅឆ្នាំ២០២៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ