ភរិយាអតីតប្រធានប៉ូលិសអាំងទែរប៉ូលជនជាតិចិនសុំសិទ្ធិជ្រកកោនក្នុងប្រទេសបារាំង
លោកស្រីក្រាស ម៉េង ភរិយារបស់អតីតប្រធានប៉ូលិសអាំងទែរប៉ូលជនជាតិចិនលោកម៉េង ហុងវៃបានសុំសិទ្ធិជ្រកកោនក្នុងប្រទេសបារាំង នេះជាព័ត៌មានផ្សព្វផ្សាយដោយវិទ្យុ និងកាសែតបារាំងនាថ្ងៃសុក្រ ទី១៨ មករា។ គួររម្លឹកថា លោកម៉េង ហុងវៃបានបាត់ខ្លួននាដំណាច់ខែកញ្ញា ឆ្នាំ ២០១៨ ក្រោយពីលោកបានធ្វើដំណើរចូលប្រទេសចិន។ បន្ទាប់ពីបានបាត់ដំណឹងសូន្យឈឹង លោកហុងវៃបានផ្ញើលិខិតលាលែងពីតំណែងប្រធានអាំងទែរប៉ូលក្នុងថ្ងៃទី៧ តុលា ឆ្នាំ ២០១៨ ដដែល ហើយរដ្ឋាភិបាលក៏បានប្រកាសពីការចាប់ឃុំខ្លួនលោកហុងវៃក្រោមការស៊ើបអង្កេតរឿងអាស្រូវពុករលួយ។ តាំងពីពេលនោះមក លោកស្រីក្រាស ម៉េងជាភរិយាបន្តរស់នៅតែជាមួយកូនក្នុងទីក្រុងលីយ៉ុង ប្រទេសបារាំងដែលជាទីស្នាក់ការរបស់ប៉ូលិសអាំងទែរប៉ូល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
តាមព័ត៌មានផ្សព្វផ្សាយដោយវិទ្យុ និងកាសែតបារាំង លោកស្រីក្រាស ម៉េងបានអំពាវនាវសុំជំនួយពីរដ្ឋាភិបាលបារាំង និងរៀបរាប់ថា លោកស្រីបានរងគ្រោះពីការប៉ុនប៉ងចាប់ជំរឹតពីសំណាក់បុរសអ្នកជំនួញជនជាតិចិនចំនួន ២នាក់។ តាមលោកស្រីក្រាស ម៉េង បុរសអ្នកជំនួញជនជាតិចិនទាំង ២នាក់បានទៅផ្ទះលោកស្រីនាដើមខែតុលា ឆ្នាំ ២០១៨ ហើយបានសុំឲ្យលោកស្រីជួយជូនដំណើរទៅកាន់សាធារណរដ្ឋឆែកតាមយន្តហោះឯកជនមួយគ្រឿង។ តែលោកស្រីបានបដិសេធ ហើយនៅ ២ថ្ងៃក្រោយមក បុរសអ្នកជំនួញជនជាតិចិនចំនួនទាំង ២នាក់ក៏បានមកផ្ទះលោកស្រីជាថ្មីដោយបបួលលោកស្រីដើរលេងមួយជុំទីក្រុងអឺរ៉ុបមួយចំនួន។
លោកស្រីក៏បានបដិសេធជាថ្មី ហើយក៏បានទៅប្តឹងប៉ូលិសចំពោះរឿងរ៉ាវទាំងនេះ។ បន្ទាប់មក ប៉ូលិសក៏បានចាត់វិធានការការពារលោកស្រី និងកូនប្រុសភ្លោះអាយុ ៧ឆ្នាំ នេះជាការអះអាងរបស់លោកស្រីក្រាស ម៉េង។ នៅក្នុងបទសម្ភាសន៍ឲ្យទូរទស្សន៍អង់គ្លេស BBC ក្នុងខែតុលា ឆ្នាំ ២០១៨ លោកស្រីក្រាស ម៉េងធ្លាប់បានថ្លែងពីក្តីបារម្ភចំពោះសន្តិសុខផ្ទាល់ខ្លួន និងបានចោទរដ្ឋាភិបាលចិនពីបទធ្វើទុក្ខបុកម្នេញផ្នែកនយោបាយ។ ជាទូទៅ មនុស្សជំនិតរបស់អតីតប្រធានប៉ូលិសអាំងទែរប៉ូលត្រូវបានរដ្ឋអំណាចចិនរារាំងមិនឲ្យបញ្ចេញយោបល់អ្វីទេ។ ដូច្នេះ ការថ្លែងរបស់លោកស្រីក្រាស ម៉េងទៅកាន់សារព័ត៌មានពិតជារឿងមួយដែលគេកម្រឃើញមាន និងអាចធ្វើឲ្យរដ្ឋអំណាចចិនទើសទាល់ចិត្តយ៉ាងខ្លាំង។
គួររម្លឹកឡើងវិញថា ការជាប់ឆ្នោតជាប្រធានប៉ូលិសអាំងទែរប៉ូលរបស់លោកម៉េង ហុងវៃនាដំណាច់ឆ្នាំ ២០១៦ ត្រូវបានរដ្ឋាភិបាលចិនចាត់ទុកជាជោគជ័យមួយសម្រាប់ប្រទេសចិន នោះបើទោះបីជាព្រឹត្តិការណ៍កាលណោះបានធ្វើក្រុមអ្នកការពារសិទ្ធិមនុស្សមួយចំនួនសម្តែងក្តីបារម្ភក៏ដោយ។ មានអាយុ ៦៥ឆ្នាំ លោកម៉េង ហុងវៃធ្លាប់មានតួនាទីអនុរដ្ឋមន្រ្តីក្រសួងសន្តិសុខជាតិចិនដែលមានបទពិសោធន៍ខាងប៉ូលិសយុត្តិធម៌ ៤០ឆ្នាំ ពិសេសផ្នែកប្រយុទ្ធប្រឆាំងគ្រឿងញៀន ការជួញដូរមនុស្ស និងត្រួតពិនិត្យព្រំដែន។ តាំងពីខែវិច្ឆិកា ឆ្នាំ ២០១៨ តំណែងប្រធានប៉ូលិសអាំងទែរប៉ូលបានធ្លាក់ក្នុងដៃលោកគីម ជុងយ៉ាងជាជនជាតិកូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ