តើជំនួបពូទីន-អាបេ លើកនេះ ដែលជប៉ុនថា មានន័យជាប្រវត្តិសាស្ត្រ បានចប់ទៅដោយលទ្ធផលយ៉ាងណា?
ចុះផ្សាយនៅថ្ងៃ៖
ស្តាប់ - ០៥:៣៤
ថ្ងៃ ២២ មករាកន្លងទៅ លោកប្រធានាធិបតីរុស្ស៊ី វ៉្លាឌីមៀរ ពូទីន និង លោកនាយករដ្ឋមន្ត្រី ជប៉ុន ស៊ីនហ្ស៊ោ អាបេ បានធ្វើកិច្ចចរចានឹងគ្នា នៅក្រុងម៉ូស្គូ ដែលពន្យារទៅអស់ជាង ៣ ម៉ោង ជុំវិញ បញ្ហា ចុះសន្ធិសញ្ញាសន្តិភាព ដើម្បីខ័ណ្ឌបញ្ចប់” សភាពសង្គ្រាម “ រវាង ជប៉ុន និង រុស្ស៊ី ។ “សភាពសង្គ្រាម”នេះ បន្តសណ្ឋិតនៅ រវាងប្រទេសទាំងពីរ ក្រោយពីសហភាពសូវៀត ក្នុងឆ្នាំ ១៩៤៥ ជាតុល្យាការនៃសង្គ្រាម លោកលើកទី២ បានតាំងអធិបតេយ្យភាពខ្លួន លើអំបូរកោះគួរីលខាងត្បូងចំនួន ៤ ដែលជប៉ុននៅតែបន្ត ចាត់ទុកជាដែនដីខ្លួន ហើយក្លាយជាដែនដីជាប់វិវាទ ដោយទាមទារគ្មានឈប់ ចង់បានវាទៅវិញ។ ទោះបី ភាគីជប៉ុន សង្ឃឹមថា ជំនួបលើកនេះ មានន័យជា”របត់”ក្តី ក៏ក្រោយពីវាចប់ទៅ គូភាគីឥតបាន ចុះ កិច្ច ព្រមព្រៀងអ្វីណាទេ ដោយគ្រាន់តែ បានធ្វើសេចក្តីថ្លែងការណ៍ ក្នុងសន្និសីទកាសែតរួម ថានឹងបន្តបរិច្ចាគ ការខំប្រឹងប្រែងរួមគ្នា កាន់តែស្វាហាប់ និង កាន់តែស្វិតស្វាញ ទៅទៀត។ ។ អ្វីដែលគួរឲ្យកត់សម្គាល់ គឺថា បានមកតាមដានយកការណ៍អំពីកិច្ចចរចាលើកនេះ ខាងភាគីជប៉ុន មានអ្នកកាសែត ដល់ទៅ ៨០ នាក់។
គ្រាន់តែក្នុងកន្លះឆ្នាំចុងក្រោយ រដ្ឋបុរសទាំងពីរ បានជួបគ្នា ដោយផ្តោតលើបញ្ហាចុះសន្ធិសញ្ញា សន្តិភាព គឺ ៤ លើកឯណោះ ហើយគិតជាសរុប ជំនួបរវាងលោកពូទីន និង លោក អាបេ មានចំនួនដល់ទៅ ២៥ លើក ទៅហើយ។
ពីរសប្តាហ៍មុនដល់ជំនួបលើកនេះ លោក អាបេ បានស្បថនៅលើផ្នូរឪពុកគាត់ថា គាត់នឹងចម្លងបញ្ហា ចុះ សន្ធិសញ្ញាសន្តិភាព ជាមួយរុស្ស៊ី លុះទាល់តែបានដល់ទីអវសាន។
ថ្លែងក្នុងសន្និសីទកាសែតរួម ក្រោយពីជំនួបលើកនេះចប់ទៅ ទាំង លោកប្រធានាធិបតីរុស្ស៊ី វ៉្លាឌីមៀរ ពូទីន ទាំង លោក នាយករដ្ឋមន្ត្រី ជប៉ុន ស៊ីនហ្ស៊ោ អាបេ បានសារភាពទទួលស្គាល់ថា ក្នុងថ្ងៃមុខ គូភាគី ត្រូវ អនុម័ត សេចក្តីសម្រេច ដែលមិនងាយស្រួលឡើយ និង ត្រូវ ធ្វើការងាររួមគ្នាយ៉ាងស្វិតស្វាញ។
តាមសំដី ប្រមុខរដ្ឋរុស្ស៊ី ៖ ម៉ូស្គូ និង តូក្យ៉ូ បានបញ្ជាក់ពីការយកចិត្តទុកដាក់ដូចគ្នា ចុះឲ្យបានជា សន្ធិសញ្ញាសន្តិភាព។
ថ្លែងក្នុងសន្និសីទសារពត៏មាន បូកសរុបតុល្យាការនៃកិច្ចចរចា លោកប្រធានាធិបតីរុស្ស៊ី មានប្រសាសន៍ ៖
-ការងារដែលនៅរង់ចាំយើង ក្នុងថ្ងៃមុខ គឺ ការងារដ៏ស្វិតស្វាញ ដើម្បីបង្កើត ល័ក្ខខ័ណ្ឌ សម្រាប់ឈាន ទៅ កាន់ ដំណោះស្រាយដែល ម្ខាងៗ អាចទទួលយកបានដូចគ្នា។
-ចោទនៅពីមុខប្រទេសទាំងពីរ គឺ ភារកិច្ច” ធានានូវការអភិវឌ្ឍន៍យូរអង្វែងទៅមុខ និង លើគ្រប់វិស័យ ទំនាក់ទំនងរុស្ស៊ី-ជប៉ុន ឲ្យឡើងដល់កម្រិតដែលមានគុណភាពថ្មី។
-ដំណោះស្រាយដែលនឹងបន្តធ្វើ ដោយភាគីចរចាទាំងសងខាង ជុំវិញការចុះសន្ធិសញ្ញាសន្តិភាព “ ត្រូវតែ អាចទទួលយកបានដោយ ប្រជាជនរុស្ស៊ី និង ជប៉ុន ហើយ គាំទ្រដោយ សាធារណជនប្រទេសទាំងពីរ។
លោក ពូទីន ក៏បានឲ្យដឹងដែរថា ៖ ម៉ូស្គូ និង តូក្យ៉ូ គ្រោងបង្កើន សកម្មភាពសេដ្ឋកិច្ចរួមគ្នា នៅលើ អំបូរកោះ គួរីល ក្នុងវិស័យចំនួន ៥ ដែលមានអនុម័តទៅហើយ ពោលគឺ ៖ វិស័យជលវប្បកម្ម , វិស័យ ដាំដុះកសិផល ក្នុងទីផ្សាំជា បន្ទប់កញ្ចក់សម្រាប់ដាំដំណាំ , វិស័យផលិតអគ្គសនីដោយពឹងលើកម្លាំងខ្យល់ , វិស័យទេសចរណ៍ , វិស័យកែឆ្នៃសម្រាម។
លោកនាយករដ្ឋមន្ត្រីជប៉ុន ស៊ីនហ្ស៊ោ អាបេ ពីចំណែកគាត់ ថ្លែងថា ៖
-ថ្ងៃនេះ ខ្ញុំបានពិភាក្សាជាមួយលោកប្រធានាធិបតី វ៉្លាឌីមៀរ ពូទីន ដោយឥតលាក់បំបាំងអ្វីទេពីម្ខាងៗ និង បានចំណាយពេលអស់យ៉ាងច្រើន។
-ការដោះស្រាយចំណោទ បន្សល់ទុកជាង ៧០ ឆ្នាំមកហើយ ក្រោយពីសង្គ្រាមលោកលើកទី២ ចប់ទៅ ក្នុងឆ្នាំ ១៩៤៥ មិនមែនជា រឿងងាយស្រួលឡើយ ប៉ុន្តែយើងត្រូវតែធ្វើកិច្ចការនេះ ឲ្យបានរួច។
-ក្រោមការដឹកនាំដ៏មោះមុតរបស់ខ្ញុំរួមជាមួយលោក វ៉្លាឌីមៀរ ពូទីន យើងបានណាត់គ្នាថា ធ្វើការងាររួមគ្នា កាន់តែស្វាហាប់ ដោយសំដែងកាន់តែខ្លាំងឡើង ជំនឿទុកចិត្តគ្នា រវាងប្រជាពលរដ្ឋជប៉ុន និង ប្រជាពលរដ្ឋ រុស្ស៊ី តាមរយៈការពង្រីកទំនាក់ទំនងរវាង មិត្តនិងមិត្ត និងស្វែងរកដំណោះស្រាយដែលម្ខាងៗ អាចទទួល យកបាន ដូចគ្នា។
-ថ្ងៃនេះ ខ្ញុំនិងលោកប្រធានាធិបតីពូទីន បានបញ្ជាក់ពី ភាពប្តេជ្ញាចិត្ត ធ្វើការងារនេះ តាំងពីដើម លុះរហូត ដល់ចុង តែម្តង។
លោក អាបេ ក៏បានប្រកាសអំពី ការពិគ្រោះប្តូរយោបល់មួយលើកថ្មី គឺ ក្នុងជាន់ថ្នាក់ រដ្ឋមន្ត្រីការបរទេស ប្រទេសទាំងពីរ ដែលនឹងប្រព្រឹត្តទៅ ក្នុងបរិវេណនៃ សន្និសីទស្តីអំពីសន្តិសុខអន្តរជាតិ នៅក្រុងអាល្លឺម៉ង់ Munich ក្នុងខែកុម្ភៈខាងមុខ។
រីឯជំនួប រវាង មេដឹកនាំទាំងពីរ គឺលោក អាបេ និង លោក ពូទីន នឹងប្រព្រឹត្តទៅ ក្នុងខែមិថុនា ពេល ដែល ប្រទេសជប៉ុនធ្វើជាម្ចាស់ផ្ទះទទួល កិច្ចប្រជុំកំពូល នៃក្រុម ២០ ប្រទេស ដែលមានសេដ្ឋកិច្ចហំហួនជាងគេ ហៅថា G-20 ។
-ស្របនឹង សេចក្តីថ្លែងការណ៍សូវៀត-ជប៉ុន ឆ្នាំ ១៩៥៦ សហភាពសូវៀត ត្រៀមពិភាក្សាអំពីការផ្ទេរកោះ ២ តូចជាងគេ ពីក្នុងចំណោមកោះ ៤ នោះ ទៅឲ្យជប៉ុន លុះក្រោយពីមានចុះ សន្ធិសញ្ញាសន្តិភាព។ ប៉ុន្តែ ជប៉ុន ចង់បាន កោះទាំង ៤ នោះតែម្តង ដោយ ចាត់ទុកវាជា ដែនដីខាងជើងបង្អស់របស់ខ្លួន។
ប៉ុន្តែ ក្នុងផ្ទៃនៃស្ថានការណ៍ថ្មី ដែលលេចចេញមក បន្ទាប់ពីលោកពូទីន និង លោក អាបេ បានចុះសម្រុងគ្នា នៅឯ ក្រុងសិង្ហបុរី កាលពីខែវិច្ឆិកាកន្លងទៅ ថា ត្រូវតែន្លឿន កិច្ចចរចាដោយឈរលើមូលដ្ឋាននៃ សេចក្តី ថ្លែងការណ៍សូវៀត-ជប៉ុន ឆ្នាំ ១៩៥៦ ក្រុមអ្នកតំណាងរាស្ត្ររុស្ស៊ី ខាងបក្សជាតិនិយម LDPR បានដាក់ជូន សភាឌូម៉ា ពិនិត្យនិងអនុម័ត គម្រោងច្បាប់ដែលហាមមិនអោយបង្វែរប្រជុំកោះគួរីលនោះ ដែលជាដែនដី រុស្ស៊ី ទៅឲ្យជប៉ុនវិញ ជាដាច់ខាត។
ការដែលរុស្ស៊ីចេះតែពង្រឹង ហេដ្ឋារចនាសម្ព័ន្ធយោធានៅលើកោះទាំងនោះ ដែលញ៉ាំងឲ្យមានការតវ៉ាជានិច្ច ពីខាងក្រុងតូក្យ៉ូ គឺជាឧបសគ្គថ្មី នៅលើផ្លូវ ចុះជាសន្ធិសញ្ញាសន្តិភាព។ តាមតួលេខដែលមាន បច្ចុប្បន្ន ឈរជើងនៅតាមកោះ៤ នោះ គឺមានយោធារុស្ស៊ី ប្រមាណ ១៣.០០០ នាក់។ ជាការប្រៀបធៀប កោះ៤ នោះ ដែលមានផ្ទៃដី ៥.០០០ គម ក្រឡា សព្វថ្ងៃរស់នៅតែដោយអ្នកស្រុក ជិត ២ ម៉ឺននាក់ ប៉ុន្តែជា ទឹកដី សម្បូណ័ដោយ ជលផល និង ធនធានធម្មជាតិផ្សេងៗ រួចសំខាន់បំផុត គឺវាមានន័យយុទ្ធសាស្ត្រ សម្រាប់ កងនាវារុស្ស៊ី ដែលប្រចាំនៅមហាសមុទ្រប៉ាស៊ីហ្វិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ