ICIMOD ៖ ទឹកកកលើភ្នំហិមពាន្ត នឹងរលាយអស់១/៣ នៅចុងសតវត្សរ៍
នៅចុងសតវត្សរ៍ទី ២១ ជាងមួយភាគបីនៃទឹកកកនៅលើកំពូលភ្នំហិមពាន្ត (ហិមាល័យ) និងភ្នំហិណ្ឌូគុស្ហ នឹងត្រូវរលាយ។ ការរលាយទឹកកកនេះ នឹងធ្វើឱ្យប៉ះពាល់យ៉ាងខ្លាំងដល់ប្រព័ន្ធវារីអគ្គីសនី នៅប្រទេសឥណ្ឌា និងចិន ព្រមទាំងកសិកម្មនៅក្នុងតំបន់វាលទំនាប ជាប់ដងទន្លេ ដែលមានប្រជាជនជាង១៦៥០លាននាក់រស់នៅ។ នេះបើតាមរបាយការណ៍របស់អ្នកជំនាញវិទ្យាសាស្ត្រ ទើបចេញផ្សាយជាសាធារណៈ នៅថ្ងៃចន្ទទី ៤កុម្ភៈ ឆ្នាំ២០១៩។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
“ជាវិបត្តិអាកាសធាតុដែលពុំឮនរណានិយាយដល់សោះ ! ក្នុងរយៈពេលមិនដល់មួយសតវត្សរ៍ផង ការឡើងកម្តៅអាកាសធាតុ នឹងធ្វើឱ្យកំពូលភ្នំហិមពាន្ត Himalaya និងភ្នំហិណ្ឌូកុស្ហ Hindu Kush ដែលធ្លាប់តែដោយគ្របដណ្តប់ដោយទឹកកកក្រាស់ឃ្មឹករហូតមកទល់ពេលនេះ នឹងឡើងត្រងោល។” នេះជាបើតាមរបាយការណ៍របស់អ្នកស្រាវជ្រាវ ចំនួន ២១០រូប នៃមជ្ឈមណ្ឌលអន្តរជាតិដើម្បីអភិវឌ្ឍតំបន់ភ្នំ International Centre for intergrated Mountain Development (ICIMOD)។
បើតាមក្រុមអ្នកស្រាវជ្រាវ ដែលកំពុងបង្ហាញរបាយការណ៍ជាសាធារណៈនៅក្រុងកាត់មង់ឌូ ប្រទេសនេប៉ាល់ បើទោះបីជារដ្ឋចាត់វិធានការយ៉ាងតឹងតែង ដូចអ្វីដែលមានចែងនៅក្នុងកិច្ចព្រមព្រៀងអាកាសធាតុក្រុងប៉ារីស កាលពីឆ្នាំ២០១៥យ៉ាងណាក៏ដោយ ក៏ទឹកកកនៅកំពូលភ្នំ នឹងត្រូវរលាយបាត់បង់អស់យ៉ាងហោចមួយភាគបី នៅឆ្នាំ២១០០ បើប្រៀបទៅនឹងទំហំកាលពីដើមសតវត្សរ៍។ ចំណែក២ភាគទៀត ក៏នឹងត្រូវបានរលាយបាត់បង់ដែរ ប្រសិនបើសហគមន៍អន្តរជាតិមិនអាចសម្រេចចាត់វិធានការទប់ស្កាត់ការបញ្ចេញឧស្ម័នផ្ទះកញ្ចក់ ឱ្យបានក្នុងអំឡុងពេលនេះទេ។ នេះបើតាមប្រសាសន៍របស់លោក Philippus Wester ប្រធានក្រុមនិពន្ធរបាយការណ៍ដដែល ដោយបន្ថែមទៀតថា កំពូលភ្នំទឹកកក នៅត្រង់កន្លែងខ្លះនៃតំបន់ហិមពាន្ត បានចាប់រលាយតាំងពីទសវត្សរ៍ឆ្នាំ១៩៧០មក។
តំបន់ហិមពាន្ត និងហិណ្ឌូគុស្ហ ជាជួរភ្នំដ៏វែង លាតសន្ធឹងប្រវែង ៣៥០០គីឡូម៉ែត្រ ចាប់ពីអាហ្វហ្កានីស្ថាន ដល់បង់ក្លាដែល ដោយកាត់តាមនេប៉ាល់ ចិន ប៊ូតង់ ឥណ្ឌា ភូមា និងប៉ាគីស្ថាន។ ប្រសិនបើភ្នំទឹកកកត្រូវរលាយអស់ពីកំពូលភ្នំហិមពាន្ត នោះកំរិតទឹកសមុទ្ទនឹងកើនឡើង១,៥ម៉ែត្រ ព្រមទាំងផលវិបាកជាច្រើនផ្សេងទៀត ប៉ះពាល់ដល់បរិមាណទឹកទន្លេ យង់សេ មេគង្គ ហ្កង់ និងឥណ្ឌុស និងដល់ជីវិតបណ្តាជនក្នុងតំបន់ ដែលរស់រំពឹងលើការរលាយទឹកកកនៅរដូវក្តៅ ៖ ២៥០លាននាក់ រស់នៅតាមតំបន់ភ្នំហិមពាន្ត និង១៦៥០លាននាក់ រស់នៅតាមតំបន់វាលទំនាបទន្លេ។
បម្រែបម្រួលធនធានទឹក ក៏អាចនឹងបំផ្លាញការផលិតវារីអគ្គីសនី និងពន្លឿនការហូរច្រោះដី ព្រមទាំងហូរបាក់ដី ក្នុងតំបន់ភ្នំ។ នេះការព្យាកររបស់របាយការណ៍ដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ