បេក្ខនារីនាយករដ្ឋមន្រ្តីរបស់ព្រះអង្គម្ចាស់ក្សត្រីអ៊ុបុនរ៉ាត់កំពុងធ្វើឲ្យរញ្ជួយនយោបាយថៃ?
ចុះផ្សាយនៅថ្ងៃ៖
ស្តាប់ - ០៧:១៤
នៅក្នុងប្រទេសថៃ គណបក្សនយោបាយ និងបេក្ខជនកំពុងបន្តចុះឈ្មោះដើម្បីចូលរួមបោះឆ្នោតសភាដែលគ្រោងរៀបចំនៅថ្ងៃទី២៤ មីនាខាងមុខ។ នេះជាលើកទី១ គិតតាំងពីក្រោយរដ្ឋប្រហារយោធាក្នុងឆ្នាំ ២០១៤ ដែលប្រទេសនៅអាស៊ីអាគ្នេយ៍មួយនេះត្រៀមរៀបចំបោះឆ្នោតតាមបែបប្រជាធិបតេយ្យ។ មានគណបក្សធំចំនួនពីរដែលលេចធ្លោជាងគេ គឺគណបក្ស « ផាឡាំង ប្រាឆារ៉ាត » ដែលគាំទ្រយោធា និងដែលលោកនាយករដ្ឋមន្រ្តីផុតអាណត្តិប្រាយុទ្ធ ចាន់អូចាបានឈរឈ្មោះជាបេក្ខជននាយករដ្ឋមន្រ្តី និងគណបក្ស « ថៃរ៉ាក់សាឆាត » ដែលគំាំទ្រអតីតនាយករដ្ឋមន្រ្តីលោកថាក់ស៊ីន និងដែលបេក្ខជននាយករដ្ឋមន្រ្តីត្រូវបានឈរឈ្មោះដោយព្រះអង្គម្ចាស់ក្សត្រីអ៊ុបុនរ៉ាត់ រ៉ាជកាន់យ៉ា សិរិវឌ្ឍនាផាន់វ៉ាឌីដែលជាបុត្រីច្បងរបស់សពអតីតព្រះមហាក្សត្រព្រះចៅភូមិបុន។ ការចូលប្រឡូកក្នុងឆាកនយោបាយរបស់ព្រះអង្គម្ចាស់ក្សត្រីអ៊ុបុនរ៉ាត់បានធ្វើឲ្យមជ្ឈដ្ឋានជាតិ និងអន្តរជាតិមានការភ្ញាក់ផ្អើលយ៉ាងខ្លាំង។
បច្ចុប្បន្នមានព្រះជន្ម ៦៧ព្រះវស្សា ព្រះអង្គម្ចាស់ក្សត្រីអ៊ុបុនរ៉ាត់បានចាប់កំណើតនៅក្នុងទីក្រុងឡូសាននៃប្រទេសស្វ៊ីស។ តាំងពីបានយាងទៅសិក្សា រៀនសូត្រនៅអាមេរិក ព្រះអង្គម្ចាស់ក្សត្រីអង្គនេះតែងបង្ហាញចេញនូវរូបភាពជាព្រះអង្គម្ចាស់ក្សត្រីឧទ្ទាម។ ក្នុងពេលរស់នៅសិក្សា រៀនសូត្រក្នុងទឹកដីអាមេរិកាំង ព្រះអង្គម្ចាស់ក្សត្រីអ៊ុបុនរ៉ាត់បានជួបគូស្នេហ៍អាមេរិកាំងលោក Peter Ladd Jensen រួចក៏បានបោះបង់ចោលងារជាព្រះអង្គម្ចាស់ក្សត្រីក្នុងឆ្នាំ ១៩៧២ ដើម្បីរៀបការជាមួយលោក Peter។ ព្រះអង្គម្ចាស់ក្សត្រីអ៊ុបុនរ៉ាត់មានកូន ៣នាក់ជាមួយលោក Peter គឺកូនប្រុសម្នាក់មានជម្ងឺអូទីស និងកូនស្រីពីរនាក់។ ក្នុងឆ្នាំ ១៩៩៨ ព្រះអង្គម្ចាស់ក្សត្រីអ៊ុបុនរ៉ាត់ និងលោក Peter បានលែងលះគ្នាដោយម្នាក់ៗបានសម្រេចចិត្តចែកផ្លូវគ្នាដើររៀងៗខ្លួន។
នៅ ៣ឆ្នាំក្រោយមក ពោលក្នុងឆ្នាំ ២០០១ ព្រះអង្គម្ចាស់ក្សត្រីអ៊ុបុនរ៉ាត់ក៏បានសម្រេចចិត្តយាងទៅប្រទេសថៃវិញ។ នៅក្នុងប្រទេសថៃ ព្រះអង្គម្ចាស់ក្សត្រីបានផ្តើមអនុវត្តន៍ឡើងវិញនូវកាតព្វកិច្ចខ្លះៗរបស់រាជវង្ស។ តែអពមង្គលសម្រាប់គ្រួសារព្រះអង្គម្ចាស់ក្សត្រីអ៊ុបុនរ៉ាត់មិនបានចប់ត្រឹមលែងលះជាមួយលោក Peter ទេ ព្រោះកូនប្រុសមានជម្ងឺអូទីសដែលទើបមានអាយុ ២១ឆ្នាំបានស្លាប់នៅក្នុងគ្រោះមហន្តរាយរលកយក្សស៊ូណាមីក្នុងឆ្នាំ ២០០៤។ ក្រោយការចែកឋានរបស់កូនប្រុស ព្រះអង្គម្ចាស់ក្សត្រីអ៊ុបុនរ៉ាត់បានបង្កើតមូលនិធិមួយដោយដាក់ឈ្មោះខ្លួនឯងដើម្បីជួយក្មេងផ្សេងទៀតដែលមានជម្ងឺអូទីស។ នេះហើយជាចំណុចចាប់ផ្តើមនៃការចូលប្រឡូកក្នុងកិច្ចការសង្គមជាចំហ និងជាសាធារណៈរបស់ព្រះអង្គម្ចាស់ក្សត្រីអ៊ុបុនរ៉ាត់។
ព្រឹត្តិការណ៍នយោបាយលើកទី១ នៅក្នុងប្រទេសថៃ
បន្ទាប់ពីបានចូលប្រឡូកក្នុងកិច្ចការសង្គមយ៉ាងសកម្ម ព្រះអង្គម្ចាស់ក្សត្រីអ៊ុបុនរ៉ាត់ក៏បានចូលប្រឡូកក្នុងឆាកនយោបាយទៀត។ ព្រះអង្គម្ចាស់ក្សត្រីបានប្រើបណ្តាញសង្គម Instagram ដើម្បីផ្តល់ចំណាប់អារម្មណ៍ រួមទាំងការរិះគន់ជាចំហ និងសាធារណៈលើបញ្ហាសង្គមជាច្រើនដោយមិនញញើត។ ជាទូទៅនៅក្នុងប្រទេសថៃ ព្រះបរមរាជវាំងក៏បានចាប់អារម្មណ៍លើបញ្ហាសង្គមដែរ តែហាក់មិនចំហខ្លាំងទេ។ ថ្មីៗនេះ ពោលក្នុងពេលដែលក្រុងបាងកកគ្របដណ្តប់ដោយផ្សែងពុល និងដែលចៅហ្វាយក្រុងសម្រេចបិទសាលាជាង ៤០០ ព្រះអង្គម្ចាស់ក្សត្រីអ៊ុបុនរ៉ាត់បានផុសរូបថតខ្លួនឯងដោយពាក់ម៉ាស់ រួចសរសេរថា បញ្ហាមួយនេះត្រូវតែដោះស្រាយឲ្យបានឆាប់បំផុតដែលអាចធ្វើទៅបាន ព្រោះក្មេងមិនអាចទៅសាលារៀនបានទេ។
ព្រះអង្គម្ចាស់ក្សត្រីអ៊ុបុនរ៉ាត់គ្មានគណបក្សខ្លួនឯងទេ តែព្រះអង្គម្ចាស់ក្សត្រីបានឈរឈ្មោះជាបេក្ខជននាយករដ្ឋមន្រ្តីសម្រាប់គណបក្ស « ថៃរ៉ាក់សាឆាត »។ មានការភ្ញាក់ផ្អើលចំនួនពីរទាក់ទងនឹងវត្តមានរបស់ព្រះអង្គម្ចាស់ក្សត្រីអ៊ុបុនរ៉ាត់នៅក្នុងឆាកនយោបាយថៃពេលនេះ ទី១ តាំងពីការបង្កើតរបបជានិយមថៃក្នុងឆ្នាំ ១៩៣២ មក នេះជាលើកទី១ ដែលមានសមាជិករាជវង្សសានុវង្សមួយអង្គបានចូលរួមប្រកួតប្រជែងនៅក្នុងការបោះឆ្នោត និងទី២ គណបក្ស « ថៃរ៉ាក់សាឆាត » ដែលព្រះអង្គម្ចាស់ក្សត្រីបានយាងចូលរួមជាមួយជាគណបក្សគាំទ្រអតីតនាយករដ្ឋមន្រ្តីលោកថាក់ស៊ីន។ តាមពិតទៅ ភាពជិតដិតជាមួយត្រកូលថាក់ស៊ីន និយាយជារួម និងជាមួយលោកថាក់ស៊ីន និយាយដោយឡែកមិនត្រូវបានព្រះអង្គម្ចាស់ក្សត្រីអ៊ុបុនរ៉ាត់លាក់បាំងទេ។
ព្រះអង្គម្ចាស់ក្សត្រីអ៊ុបុនរ៉ាត់បានយាងទស្សនារួមគ្នាជាមួយលោកថាក់ស៊ីន និងប្អូនស្រីលោកថាក់ស៊ីននូវការប្រកួតបាល់ទាត់ពិភពលោកក្នុងឆ្នាំ ២០១៨ ក្នុងប្រទេសរុស្ស៊ីរវាងក្រុមកីឡាករបាល់ទាត់អង់គ្លេស និងក្រូអាស៊ីនាពាក់កណ្តាលផ្តាច់ព្រ័ត្រ។ ផ្តើមចេញពីកម្ររូបភាពនេះ រួមទាំងការចូលប្រឡូកជាមួយគណបក្សនយោបាយដែលគាំទ្រលោកថាក់ស៊ីនត្រូវបានគ្រប់គ្នាចាត់ទុកជាព្រឹត្តិការណ៍រញ្ជួយនយោបាយថៃ ព្រោះគេដឹងថានៅថៃ រាជានិយម និងក្រុមយោធាមិនចូលចិត្តត្រកូលថាក់ស៊ីនទេ។ កងទ័ពបានធ្វើរដ្ឋប្រហារទម្លាក់រដ្ឋាភិបាលលោកថាក់ស៊ីនក្នុងឆ្នាំ ២០០៦ ហើយទម្លាក់រដ្ឋាភិបាលរបស់ប្អូនស្រីលោកថាក់ស៊ីន គឺលោកស្រីយីងឡាក់ក្នុងឆ្នាំ ២០១៤។ តែគេមិនត្រូវភ្លេចនិយាយទេថា ឥទ្ធិពល និងប្រជាប្រិយភាពរបស់ត្រកូលថាក់ស៊ីនកំពុងបន្តមាននៅក្នុងសង្គមថៃ ពិសេសក្នុងចំណោមប្រជារាស្រ្តថៃរស់នៅតាមជនបទ។
បេក្ខជនព្រះអង្គម្ចាស់ក្សត្រីអ៊ុបុនរ៉ាត់ជាបេក្ខនារីដែលលោកប្រាយុទ្ធ ចាន់អូចាមិនបានរង់ចាំ
គេអាចនិយាយបានថា វត្តមានរបស់ព្រះអង្គម្ចាស់ក្សត្រីអ៊ុបុនរ៉ាត់ដែលស្និទ្ធនឹងត្រកូលថាក់ស៊ីនអាចជាឆ្អឹងទទឹង ក សម្រាប់លោកនាយករដ្ឋមន្រ្តីប្រាយុទ្ធ ចាន់អូចាដែលបានឈរឈ្មោះជាបេក្ខជនសម្រាប់គណបក្ស « ផាឡាំង ប្រាឆារ៉ាត »។ តែទៅជាយ៉ាងនេះក្តី នៅមានសំណួរជាច្រើនដែលគ្រប់គ្នាកំពុងរង់ចាំចម្លើយ រួមមាន តើសមាជិករាជវង្សសានុវង្សមានសិទ្ធិធ្វើនយោបាយឬអត់ និងថាតើរដ្ឋធម្មនុញ្ញថៃបានចែងពីអ្វីខ្លះចំពោះបញ្ហានេះ?។ ក្រោយការប្រកាសឈរឈ្មោះជាបេក្ខជននាយករដ្ឋមន្រ្តីរបស់ព្រះអង្គម្ចាស់ក្សត្រីអ៊ុបុនរ៉ាត់ មានគណបក្សតូចមួយដែលគាំទ្រកងទ័ពបានសរសេរលិខិតប្តឹងជំទាស់នឹងបេក្ខនារីរបស់ព្រះអង្គម្ចាស់ក្សត្រីអ៊ុបុនរ៉ាត។ យ៉ាងណាក៏ដោយ គណៈកម្មការជាតិរៀបចំបោះឆ្នោត គជប នឹងសម្រេចប្រកាសទទួលយកបេក្ខជនទាំងអស់ជាផ្លូវការនៅត្រឹមថ្ងៃទី១៥ កុម្ភៈខាងមុខ។ អ៊ីចឹងពីពេលនេះដល់ថ្ងៃទី១៥ កុម្ភៈ តើនឹងមានរឿងអ្វីកើតឡើងខ្លះ?។ គួររម្លឹកថា មានគណបក្ស និងបេក្ខជនជាច្រើនបានចុះឈ្មោះ និងឈរឈ្មោះដើម្បីចូលរួមការបោះឆ្នោតសភាខាងមុខ រួមទាំងគណបក្សភឿថៃរបស់អតីតនាយករដ្ឋមន្រ្តីថាក់ស៊ីនផង។ តែលោកថាក់ស៊ីនក្តី ឬប្អូនស្រីរបស់លោកក្តីកំពុងបន្តភៀសខ្លួនរស់នៅបរទេស។
បើបេក្ខជនព្រះអង្គម្ចាស់ក្សត្រីអ៊ុបុនរ៉ាត់នឹងត្រូវគជបទទួលស្គាល់ជាបេក្ខនារីស្របច្បាប់ដូចអ្នកផ្សេងដែរ វាអាចនឹងធ្វើឲ្យបេក្ខជនលោកប្រាយុទ្ធ ចាន់អូចាញ័រខ្លួនមិនតិចទេ ព្រោះវាជាព្រឹត្តិការណ៍មួយដែលមេរបបសឹករូបនេះមិនបានរង់ចាំទាល់តែសោះ។ មិនមែនញ័រវដោយសារព្រះអង្គម្ចាស់ក្សត្រីអ៊ុបុនរ៉ាត់ជាសមាជិកគ្រួសាររាជវង្សសានុវង្សទេ តែជាមនុស្សជំនិតនឹងត្រកូលថាក់ស៊ីន។ ចូរកុំភ្លេចថា មុននឹងសម្រេចចិត្តឲ្យរៀបចំបោះឆ្នោតពេលនេះ លោកចាន់អូចាដែលជាមេរដ្ឋប្រហារក្នុងឆ្នាំ ២០១៤ បានរៀបចំជើងព្រួលគ្រប់យ៉ាងដើម្បីកំចាត់ត្រកូលលោកថាក់ស៊ីនពីឆាកនយោបាយថៃ ពិសេសអនុម័តច្បាប់រដ្ឋធម្មនុញ្ញដ៏ចម្រូងចម្រាសឆ្នាំ ២០១៦ ដែលអនុញ្ញាតឲ្យកងទ័ពជ្រើសរើសសមាជិកព្រឹទ្ធសភាដោយមិនបាច់បោះឆ្នោត។
តែទន្ទឹមគ្នានេះ មានចំណោតមួយទៀតទាក់ទងនឹងច្បាប់ប្រឆាំងនឹងការជេរ ប្រមាថ ដៀមដាមដាក់ក្រុមគ្រួសាររាជវង្សសានុវង្ស ព្រោះបើព្រះអង្គម្ចាស់ក្សត្រីអ៊ុបុនរ៉ាត់យាងចូលឃោសនាបោះឆ្នោតដូចគេដូចឯង តើអ្នកណាហ៊ាននិយាយវាយប្រហាររិះគន់លើព្រះអង្គម្ចាស់ក្សត្រី ទោះបីជាច្បាប់នោះមិនមានជាប់ពាក់ព័ន្ធនឹងព្រះអង្គម្ចាស់ក្សត្រីក៏ដោយក៏គេញញើតដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ