ភូមា៖លោកស្រីអ៊ុង សានស៊ូជីអំពាវនាវឲ្យអ្នកវិនិយោគក្នុងស្រុក និងបរទេសទៅអភិវឌ្ឍក្នុងរដ្ឋរ៉ាក់ឃីន
នៅក្នុងប្រទេសភូមា លោកស្រីអ៊ុង សានស៊ូជីដែលមានតួនាទីជាទីប្រឹក្សារដ្ឋាភិបាល និងជារដ្ឋមន្រ្តីការបរទេសបានអំពាវនាវដល់ក្រុមអ្នកវិនិយោគក្នុងស្រុក និងបរទេសឲ្យចូលទៅបោះទុនអភិវឌ្ឍន៍ក្នុងរដ្ឋរ៉ាក់ឃីន។ រដ្ឋរ៉ាក់ឃីនដែលជាតំបន់សម្បូរដោយធនធានប្រេង និងហ្គាស់ក្រោមដី។ ការអំពាវនាវរបស់លោកស្រីស៊ូជីយ៉ាងដូចនេះត្រូវបានធ្វើឡើងនៅក្នុងវេទិកាសេដ្ឋកិច្ចរៀបចំនៅតំបន់ប៉ែកខាងត្បូងរដ្ឋរ៉ាក់ឃីននាថ្ងៃសុក្រ ទី២២ កុម្ភៈ។ គួររម្លឹកថាមកដល់ពេលនេះ រដ្ឋរ៉ាក់ឃីនត្រូវបានគេស្គាល់ជារដ្ឋដែលកំពុងគ្របដណ្តប់ដោយវិបត្តិជនជាតិភាគតិចរ៉ូហ៊ីងយ៉ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ដោយមិនបាននិយាយចំៗលើវិបត្តិជនជាតិភាគតិចរ៉ូហ៊ីងយ៉ាអ្នកកាន់សាសនាអ៊ីស្លាម លោកស្រីអ៊ុង សានស៊ូជីបានលើកឡើងពីសក្តានុពលធនធានធម្មជាតិ ពិសេសប្រេង និងឧស្ម័នហ្គាស់ដែលរដ្ឋរ៉ាក់ឃីនមាននៅក្នុងដី និងដែលនៅមិនទាន់បានធ្វើអាជីវកម្មនៅឡើយទេ។ នៅក្នុងន័យនេះ លោកស្រីស៊ូជីហាក់ចង់ស្តីបន្ទោសសហគមន៍អន្តរជាតិដែលបានផ្តោតតែលើទិដ្ឋភាពអវិជ្ជមាននៅក្នុងរដ្ឋរ៉ាក់ឃីន ពោលមិនបានសម្លឹងឃើញពីទិដ្ឋភាពវិជ្ជមានដែលរដ្ឋមួយនេះកំពុងមានឡើយ។ ទិដ្ឋភាពវិជ្ជមានដែលជ័យលាភីរង្វាន់ណូបែលសន្តិភាពរូបនេះចង់សំដៅ គឺត្រូវប្រែក្លាយរដ្ឋរ៉ាក់ឃីនទៅជាតំបន់អភិវឌ្ឍន៍។
ដើម្បីអាចឈានទៅដល់គោលដៅនេះបាន លោកស្រីស៊ូជីបានអំពាវនាវឲ្យមានក្រុមអ្នកវិនិយោគក្នុងស្រុក និងបរទេស ពិសេសលោកស្រីបានសម្តែងស្វាគមន៍ចំពោះអ្នកវិនិយោគមកពីប្រទេសចិន ឥណ្ឌា ជប៉ុន កូរ៉េ និងពីប្រទេសថៃ ពោលគ្មានបាននិយាយដល់ប្រទេសលោកខាងលិចណាមួយឡើយ។ លោកស្រីស៊ូជីសង្ឃឹមឃើញវត្តមានស្ថានីយ៍បូមប្រេងជាច្រើនកន្លែងនៅប៉ុន្មានឆ្នាំខាងមុខ។ ប្រទេសចិនដែលជាអ្នកវិនិយោគបរទេសទី១ នៅភូមាបានសង់កំពង់ផែទឹកជ្រៅមួយ និងបណ្តាញបំពង់បង្ហូរប្រេងនៅតំបន់ប៉ែកខាងត្បូងរដ្ឋរ៉ាក់ឃីន។
គួររម្លឹកថារហូតមកទល់ពេលនេះ គេបានស្គាល់ និងបាននាំគ្នានិយាយច្រើនពីរដ្ឋរ៉ាក់ឃីនក៏ដោយសារតែវិបត្តិជនជាតិភាគតិចរ៉ូហ៊ីងយ៉ា។ តាំងពីឆ្នាំ ២០១៧ កងទ័ពភូមាបានបើកការវាយប្រហារជាបន្តបន្ទាប់ដើម្បីសងសឹកទល់នឹងការវាយប្រហារពីចលនាឧទ្ទាមគាំទ្រពួករ៉ូហ៊ីងយ៉ាដោយបានធ្វើឲ្យពលរដ្ឋអ្នកកាន់សាសនាអ៊ីស្លាមមួយនេះជាង ៧៤ម៉ឺននាក់រត់ភៀសខ្លួនទៅជ្រកកោនក្នុងប្រទេសបង់ក្លាដែសក្បែរខាង។ អង្គការសហប្រជាជាតិបានចាត់ទុកយុទ្ធនាការរបស់កងទ័ពភូមាថាជាអំពើប្រល័យពូជសាសន៍ពលរដ្ឋរ៉ូហ៊ីងយ៉ា។ រូបភាពទាំងអស់នេះបានធ្វើឲ្យលោកស្រីស៊ូជីដែលជាជ័យលាភីរង្វាន់ណូបែលសន្តិភាព និងជាអតីតអ្នកប្រឆាំងរបបសឹកបាក់មុខ បាក់មាត់មិនតិចទេ។
ក្នុងសប្តាហ៍នេះទៀត ការប្រយុទ្ធគ្នារវាងទ័ពភូមា និងពួកឧទ្ទាមបានកើតមាននៅប៉ែកខាងជើងរដ្ឋរ៉ាក់ឃីន។ ទន្ទឹមគ្នានេះ ការប្រយុទ្ធគ្នាក៏បានកើតមានដែររវាងទ័ពភូមា និងចលនាឧទ្ទាមផ្សេង រួមទាំងពួកអ្នកកាន់សាសនាព្រះពុទ្ធដែលប្រឆាំងនឹងរដ្ឋាភិបាលក្រុងណៃពីដ៏៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ