សង្រ្គាមពាណិជ្ជកម្ម៖លោកត្រាំលើកពេលដំឡើងពន្ធលើទំនិញចិននាំចូលអាមេរិក និងសង្ឃឹមមានជំនួបជាមួយលោកស៊ី
នៅថ្ងៃអាទិត្យ ទី២៤ កុម្ភៈ លោកប្រធានាធិបតីអាមេរិកដូណាល់ ត្រាំបានប្រកាសលើកពេលដំឡើងពន្ធលើទំនិញចិននាំចូលអាមេរិក និងសង្ឃឹមមានជំនួបកំពូលជាមួយសមភាគីចិនលោកស៊ី ជីនពីង។ ការសម្រេចយ៉ាងដូចនេះមកពីលោកត្រាំបានមើលឃើញថា កិច្ចចរចាពាណិជ្ជកម្មរវាងអាមេរិក និងចិនកំពុងចម្រើនទៅមុខ និងអាចទទួលបានកិច្ចព្រមព្រៀងល្អមួយនាពេលឆាប់ៗ។ គួររម្លឹកជូនថា លោកដូណាល់ ត្រាំបានទុកពេលឲ្យចិនត្រឹមថ្ងៃទី១ មីនាដើម្បីរកបានកិច្ចព្រមព្រៀងពាណិជ្ជកម្មមួយជាមួយអាមេរិក។ បើមិនដូច្នោះទេ លោកនឹងដំឡើងពន្ធលើទំនិញចិននាំចូលអាមេរិកពី ១០ ទៅ ២៥%។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
« ខ្ញុំសប្បាយចិត្តនឹងប្រកាសថា សហរដ្ឋអាមេរិកបានចរចាប្រកបដោយផ្លែផ្កាជាមួយចិនស្តីពីបញ្ហាសំខាន់ៗមួយចំនួនរួមមាន ការការពារកម្មសិទ្ធិបញ្ញា ការផ្ទេរបច្ចេកវិទ្យា វិស័យកសិកម្ម សេវ៉ាផ្សេងៗ អត្រាប្តូររូបិយប័ណ្ណ និងប្រធានរឿងជាច្រើនផ្សេងទៀត » នេះជាសេចក្តីប្រកាសរបស់លោកត្រាំនៅក្នុងបណ្តាញសង្គម Twitter នាថ្ងៃអាទិត្យ ទី២៤ កុម្ភៈ។ គឺតាមរយៈសេចក្តីប្រកាសនេះហើយដែលលោកត្រាំបានបញ្ជាក់ពីការលើកពេលដំឡើងពន្ធពី ១០ ទៅ ២៥% លើទំនិញចិននាំចូលអាមេរិកដែលគ្រោងអនុវត្តចាប់ពីថ្ងៃទី១ មីនាខាងមុខទៅ។ ឆ្លើយតបនឹងការបោះដៃរបស់លោកត្រាំនេះ ទីភ្នាក់ងារផ្លូវការរបស់ចិនឈ្មោះស៊ីនហួរបានបញ្ចេញប្រតិកម្មដូចគ្នានឹងការលើកឡើងរបស់លោកត្រាំ។
តែទោះជាយ៉ាងនេះក្តី សង្រ្គាមពាណិជ្ជកម្មរវាងចិន និងសហរដ្ឋអាមេរិកនៅមិនទាន់បិទបញ្ចប់ជាស្ថាពរនៅឡើយទេ ព្រោះអ្វីដែលលោកត្រាំបានប្រកាស គឺគ្រាន់ជាការលើកពេលប៉ុណ្ណោះ។ លោកត្រាំដែលតែងប្រកាន់យកគោលការណ៍ស្មើភាពនៅក្នុងការដោះដូរពាណិជ្ជកម្មជាមួយចិនមិនបានបញ្ជាក់ទេថា តើលោកនឹងទុកពេលប៉ុន្មានថ្ងៃ ឬប៉ុន្មានសប្តាហ៍ទៀតដើម្បីឲ្យភាគីអាមេរិក និងចិនបន្តកិច្ចចរចារហូតសម្រេចបាននូវកិច្ចព្រមព្រៀងមួយនោះ។ បើគិតតាំងពីដើមឆ្នាំ ២០១៩ នេះ ក្រុមអ្នកចរចាអាមេរិក និងចិនធ្លាប់បានជួបជជែកគ្នាចំនួន ៤ដងដោយលើកទី៣ បានធ្វើនៅក្នុងទីក្រុងប៉េកាំង និងលើកទី៤ ក្នុងទីក្រុងវ៉ាស៊ីនតោនពេញមួយសប្តាហ៍កន្លងទៅ។
ទាំងនេះជាសក្ខីកម្មដែលបញ្ជាក់ថា ចិន និងអាមេរិកសុទ្ធតែមានសុឆន្ទៈចង់ដោះស្រាយបញ្ហាតាមផ្លូវសន្តិវិធី។ នៅក្នុងលិខិតមួយផ្ញើទៅឲ្យលោកត្រាំតាមរយៈប្រមុខដឹកនាំចរចាចិនលោកលីវ ហេ លោកប្រធានាធិបតីចិនស៊ី ជីនពីងបានសរសេរដោយសង្ឃឹមថា កិច្ចចរចារវាងចិន និងអាមេរិកនឹងបន្តធ្វើនៅក្នុងបរិយាកាសនៃការគោរពគ្នាទៅវិញ ទៅមក កិច្ចសហប្រតិបត្តិការ និងក្នុងស្មារតីឈ្នះ ឈ្នះ។ ទោះបីជាប្រធានបទនៃកិច្ចចរចាបានផ្តោតលើវិស័យកសិកម្ម អត្រាប្តូរប្រាក់ ឬការផ្ទេរបច្ចេកវិទ្យាក៏ដោយក៏គេមិនសូវទទួលបានព័ត៌មានលំអិតស្តីពីលទ្ធផលសម្រេចបាននៅក្នុងកិច្ចចរចាដែរ។
លោកដូណាល់ ត្រាំបានបញ្ជាក់នៅក្នុងបណ្តាញសង្គម Twitter ថា លោកនឹងជួបជាមួយសមភាគីចិនលោកស៊ី ជីនពីងដើម្បីចុះហត្ថលេខាលើកិច្ចព្រមព្រៀងពាណិជ្ជកម្ម បើកិច្ចចរចារវាងចិន និងអាមេរិកមានភាពចម្រើនទៅមុខបន្ថែមទៀតនោះ។ តាមគម្រោង លោកត្រាំនឹងទទួលជួបលោកស៊ីនៅក្នុងរដ្ឋ Florida តែនៅមិនទាន់កំណត់ថ្ងៃ ខែនៅឡើយទេ។ ចំណែកលោកស៊ីក៏នៅមិនទាន់បានបញ្ជាក់ពីការយល់ព្រមតាមការអញ្ជើញរបស់លោកត្រាំនៅឡើយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ