ស្តាប់ ថតទុក Podcast
  • 00h00 - 01h00 GMT
    កម្មវិធីព័ត៌មាន 19/10 00h00 GMT
  • 06h00 - 07h00 GMT
    កម្មវិធីព័ត៌មាន 19/10 06h00 GMT
  • 12h00 - 13h00 GMT
    កម្មវិធីព័ត៌មាន 19/10 12h00 GMT

វៀតណាម៖​« រំសាយនុយក្លេអ៊ែរ » ជា​ប្រធានបទស្នូល​នៃ​ជំនួបកំពូល​លើកទី២ រវាង​លោកដូណាល់ ត្រាំ និង​លោកគីម ជុងអ៊ុន

វៀតណាម៖​« រំសាយនុយក្លេអ៊ែរ » ជា​ប្រធានបទស្នូល​នៃ​ជំនួបកំពូល​លើកទី២ រវាង​លោកដូណាល់ ត្រាំ និង​លោកគីម ជុងអ៊ុន
 
ជំនួបកំពូល​​លើកទី២ រវាង​​លោកដូណាល់ ត្រាំ និង​​លោកគីម ជុងអ៊ុន​ក្នុង​ទីក្រុង​ហាណូយ ប្រទេស​វៀតណាម ថ្ងៃទី២៧ កុម្ភៈ ២០១៩ REUTERS/Leah Millis

បន្ទាប់​ពី​បាន​ជួប​គ្នា​ជា​ប្រវត្តិសាស្រ្ត​លើកទី១ កាល​ពី​ថ្ងៃទី១២ មិថុនា ឆ្នាំ ២០១៨ ក្នុង​ប្រទេស​សិង្ហបុរី លោក​ប្រធានាធិបតី​អាមេរិក​ដូណាល់ ត្រាំ និង​មេដឹកនាំ​កូរ៉េខាងជើង​លោក​គីម ជុងអ៊ុន​ផ្តើម​មាន​ជំនួបលើកទី២ រយៈពេល ២ថ្ងៃ​ដោយ​ចាប់​ផ្តើម​ពី​ថ្ងៃទី២៧ កុម្ភៈ​ក្នុង​ទីក្រុង​ហាណូយ ប្រទេស​វៀតណាម។ នៅ​ក្នុង​ជំនួបកំពូល​លើកទី២ ពេល​នេះ លោក​ត្រាំ​សង្ឃឹម​នឹង​ទទួល​បាន​ការ​ប្រកាស និង​កិច្ចសន្យា​ពិតប្រាកដ​ពី​លោក​គីម​ស្តីពី​ការ​រំសាយ​នុយក្លេអ៊ែរ​នៅ​ឧបទ្វីប​កូរ៉េ និយាយ​ជា​រួម និង​នៅ​កូរ៉េខាងជើង និយាយ​ដោយ​ឡែក។

តែ​ក្រុម​អ្នកជំនាញ​ខ្លះ​ហាក់​មាន​មន្ទិលសង្ស័យ​លើ​ឆន្ទៈ​ពិត​របស់​កូរ៉េខាងជើង។ ចំណែក​ក្រុម​អ្នកជំនាញ​ខ្លះ​ទៀត​បាន​មើល​ឃើញ​ថា លោក​ត្រាំ និង​លោក​គីម​អាច​សម្រេច​បាន​នូវ​សន្ធិសញ្ញា​សន្តិភាព​ជា​ជាង​សន្ធិសញ្ញា​រំសាយ​នុយក្លេអ៊ែរ។

លោក​ត្រាំ និង​លោក​គីម​បាន​ទៅ​ដល់​ទីក្រុង​ហាណូយ​នៅ​ថ្ងៃ​អង្គារ ទី២៦ កុម្ភៈ​ដូច​គ្នា គ្រាន់​តែ​លោក​គីម​បាន​ទៅ​ដល់​ពេល​ថ្ងៃ​តាម​រថភ្លើង ហើយ​លោក​ត្រាំ​បាន​ទៅ​ដល់​ពេល​យប់​តាម​យន្តហោះ Air Force One របស់​លោក។ តាម​កម្មវិធី​ដែល​បាន​គ្រោង​ទុក ជំនួបលើកទី២ រវាង​លោក​ត្រាំ និង​លោក​គីម​ប្រព្រឹតតិ​ទៅ​រយៈពេល​ ២ថ្ងៃ គឺ​ថ្ងៃ​ពុធ ទី២៧ និង​ថ្ងៃ​ព្រហស្បតិ៍ ទី២៨ កុម្ភៈ។ មាន​ការ​កត់សម្គាល់​ចំនួន​ពីរ ទី១ ទី លោក​គីម និង​លោក​ត្រាំ​បាន​ទទួល​ជួប​ដោយ​ប្រធានាធិបតី និង​នាយករដ្ឋមន្រ្តី​វៀតណាម​ដាច់​ដោយ​ឡែក​ពី​គ្នា​នៅ​ថ្ងៃ​អង្គារ ទី២៦ កុម្ភៈ និង​ទី២ ទីកន្លែងជំនួប​ក៏​ដូច​ជា​ប្រធានរឿង​ជំនួប​ត្រូវ​បាន​លាក់​ជា​សម្ងាត់។

គណៈប្រតិភូ​កូរ៉េខាងជើង​ស្នាក់នៅ​សណ្ធាគារ Mélia ហើយ​គណៈប្រតិភូ​អាមេរិកាំង​ស្នាក់​នៅ​សណ្ឋាគារ Marriot។ នៅ​ក្នុង​ជំនួប​ថ្ងៃទី១ លោក​ត្រាំ និង​លោក​គីម​បាន​ជួប​គ្នា​លើកទី១ រយៈពេល ២០នាទី​នៅ​ម៉ោង ៦ និង៣០នាទី​ល្ងាច​ម៉ោង​ក្នុង​ប្រទេស​វៀតណាម​ក្នុង​សណ្ឋាគារ Metropole។ បន្ទាប់​មក ឥស្សរជន​ទាំង​ពីរ​បន្ត​ស្រស់ស្រូប​អាហារ​ពេល​យប់​ជាមួយ​គ្នា។ ជំនួប​និយាយ​គ្នា​ជា​សាច់ការ​នឹង​ធ្វើ​ឡើង​នៅ​ថ្ងៃ​ព្រហស្បតិ៍ ទី២៨ កុម្ភៈ តែ​គេ​គ្មាន​ព័ត៌មាន​ស្តីពី​ទីកន្លែង​ជួប។ តាម​គម្រោង លោក​ត្រាំ និង​លោក​គីម​អាច​ជួប​គ្នា​ពី ៥ ទៅ ៦ដង​នា​ឱកាស​ជំនួបកំពូលលើកទី២ រយៈពេល ២ថ្ងៃ​ក្នុង​ទីក្រុង​ហាណូយ ប្រទេស​វៀតណាម។

ពិនិត្យ​លើ​សេចក្តីថ្លែងការណ៍​ចុះ​ហត្ថលេខា​ក្នុង​ប្រទេស​សិង្ហបុរី

នៅ​ក្នុង​ជំនួបកំពូលលើកទី១ ក្នុង​ប្រទេស​សិង្ហបុរី​កាល​ពី ៨ខែ​មុន លោក​ត្រាំ និង​លោក​គីម​បាន​ចុះ​ហត្ថលេខា​លើ​សេចក្តីថ្លែងការណ៍​មួយ​ដែល​ផ្តោត​សំខាន់​លើ ៤ ចំណុច ទី១ អាមេរិក និង​កូរ៉េខាងជើង​សន្យា​ស្ថាបនា​ទំនាក់ទំនង​ថ្មី​រវាង​គ្នា​ដោយ​អនុលោម​តាម​ឆន្ទៈ​សន្តិភាព និង​ភាព​រុងរឿង​របស់​ពលរដ្ឋ​នៃ​ប្រទេស​ទាំង​ពីរ ទី២ អាមេរិក និង​កូរ៉េខាងជើង​នឹង​រួបរួម​គ្នា​ប្រឹងប្រែង​កសាង​របប​សន្តិភាព​មួយ​យូរអង្វែង និង​មាន​ស្ថិរភាព​នៅ​ក្នុង​ឧបទ្វីប​កូរ៉េ ទី៣ បញ្ជាក់​ជា​ថ្មី​ពី​សេចក្តីថ្លែងការណ៍ Panmunjom ចុះ​ហត្ថលេខា​ថ្ងៃទី២៧ មេសា ឆ្នាំ ២០១៨ ដែល​កូរ៉េខាងជើង​សន្យា​បំបាត់​នុយក្លេអ៊ែរ​ចោល​ទាំង​ស្រុង​នៅ​ក្នុង​ឧបទ្វីប​កូរ៉េ និង​ទី៤ អាមេរិក និង​កូរ៉េខាងជើង​សន្យា​បន្ត​ស្វែង​រក​អដ្ឋិធាតុ​អ្នកទោសសង្រ្គាម និង​អ្នកបាត់ខ្លួន​ក្នុង​សម័យសង្រ្គាម ហើយ​បញ្ជូន​ចេញ​ភ្លាមៗ​ចំពោះ​អដ្ឋិធាតុ ឬ​អ្នក​បាត់ខ្លួន​ដែល​បាន​ស្គាល់​អត្តសញ្ញាណ។

គេ​អាច​និយាយ​បាន​ថា​នៅ​ជំនួបកំពូលលើកទី២ ពេល​នេះ លោក​ត្រាំ និង​លោក​គីម​អាច​លើក​យក​ទៅ​ពិនិត្យ​រួម​គ្នា​លើ​ចំណុច​មួយៗ​ដែល​មាន​ចែង​នៅ​ក្នុង​សេចក្តីថ្លែងការណ៍​ចុះ​ហត្ថលេខា​នៅ​សិង្ហបុរី ពោល​មើល​ថា តើ​មាន​ភាព​រីកចម្រើន ឬ​ក៏​អត់​នៅ​ក្នុង​ការ​អនុវត្ត​លើ​ចំណុច​នីមួយៗ។ បើ​ពិនិត្យ​ជា​រួម មាន​បញ្ហា​អាទិភាព​តែ​មួយ​គត់​ដែល​ហាក់​មិន​ចម្រើន​ទៅ​មុខ និង​ហាក់​កំពុង​បន្ត​ក្លាយ​ជា​ភាព​ចម្រូងចម្រាស​ខ្លាំង គឺ​រឿង​រំសាយនុយក្លេអ៊ែរ។ ៨ខែ​ក្រោយ​ជំនួប​នៅ​សិង្ហបុរី ពាក្យ​សន្យា​បន្ត​មាន​តែ​នៅ​លើ​ក្រដាស ហើយ​ការ​អនុវត្ត​ជាក់ស្តែង​មាន​តិចតួច។ ដូច្នេះ​កម្មវត្ថុ​របស់​លោក​ត្រាំ​លើក​នេះ​ក៏​មិន​ខុស​ពី​លើក​មុន​ដែរ គឺ​ជំនះ​លោក​គីម​ឲ្យ​រំសាយ​នុយក្លេអ៊ែរ។

វិធីសាស្រ្ត​របស់​លោក​ត្រាំ គឺ​ធានា​សន្តិសុខ និង​អនាគត​រុងរឿង​របស់​កូរ៉េខាងជើង

ដើម្បី​បញ្ចុះបញ្ចូល និង​ជំនះ​លោក​គីម​ឲ្យ​រំសាយ​នុយក្លេអ៊ែរ លោក​ត្រាំ​បាន​បន្ត​ព្យាយាម​និយាយ​ធានា​សន្តិសុខ និង​លួងលោម​លោក​គីម​នូវ​អនាគត​រុងរឿង​របស់​កូរ៉េខាងជើង ប្រសិន​បើ​លោក​គីម​យល់ព្រម​រំសាយ​នុយក្លេអ៊ែរ​នោះ។ វិធីសាស្រ្ត​មួយ​នេះ​ត្រូវ​បាន​លោក​ត្រាំ​ប្រើ​តាំង​ពី​ជិត ១ឆ្នាំ ហើយ​នៅ​មុន​ជំនួប​ទល់​មុខ​ជាមួយ​លោក​គីម​ថ្ងៃ​ពុធ ទី២៧ កុម្ភៈ​នេះ លោក​ត្រាំ​ក៏​បាន​ប្រើ​វិធីសាស្រ្ត​នេះ​ដដែល​ដោយ​សរសេរ​នៅ​ក្នុង​បណ្តាញ​សង្គម Twitter របស់​លោក​ជាមួយ​នឹង​លើក​សរសើរ​របប​កុម្មុយនិស្ត​ក្រុង​ហាណូយ និង​បាន​ចាត់​ទុក​វៀតណាម​ជា​ប្រទេស​គំរូ​មួយ​ល្អ​ឥតខ្ជោះ​សម្រាប់​កូរ៉េខាងជើង។

លោក​ត្រាំ​ហ៊ាន​ទាំង​បញ្ជាក់​ដោយ​ធានា​ថា បើ​កូរ៉េខាងជើង​បំបាត់​ចោល​នុយក្លេអ៊ែរ កូរ៉េខាងជើង​នឹង​ស្គាល់​ការ​អភិវឌ្ឍ​លឿន​រហ័ស​ជាង​វៀតណាម​ទៅ​ទៀត។ សឹង​តែ​គ្រប់​ពាក្យ លោក​ត្រាំ​តែ​ហៅ​លោក​គីម​ថា មិត្ត​គីម​របស់​ខ្ញុំ។ តែ​ទន្ទឹម​គ្នា​នេះ លោក​ត្រាំ​បាន​និយាយ​នៅ​មុន​ឡើង​យន្តហោះ​ទៅ​កាន់​ប្រទេស​វៀតណាម​ថា លោក​មិន​ប្រញិបប្រញាប់​ទេ ហើយ​លោក​ក៏​មិន​ចង់​បង្ខំ​នរណា​ម្នាក់​ដែរ។ បន្ទាប់​មក លោក​ត្រាំ​បាន​បញ្ជាក់​ពី​ការ​សប្បាយចិត្ត​របស់​លោក​ដែល​បាន​ឃើញ​កូរ៉េខាងជើង​ផ្អាក​ការ​សាកល្បង​នុយក្លេអ៊ែរ និង​ផ្អាក​ការ​សាងល្បង​គ្រាប់មីស៊ីល​បាលីស្ទិក។ តាម​ពាក្យសម្តី​ទាំង​នេះ​នាំ​ឲ្យ​គេ​យល់​ថា លោក​ត្រាំ​ហាក់​មាន​មន្ទិលសង្ស័យ​លើ​ឆន្ទៈ​របស់​លោក​គីម ពោល​ហាក់​គ្មាន​ជំនឿ​នឹង​អាច​និយាយ​ជំនះ​លោក​គីម​បាន​ទេ។

សន្ធិសញ្ញា​សន្តិភាព ឬ​សន្ធិសញ្ញា​រំសាយនុយក្លេអ៊ែរ?

គ្រប់​គ្នា​បាន​មើល​ឃើញ និង​ឯកភាព​ដូច​គ្នា​ថា ការ​ចង់​បាន​របស់​លោក​ត្រាំ​ឲ្យ​លោក​គីម​ចុះ​ហត្ថលេខា​លើ​កិច្ចព្រមព្រៀង​មួយ​ស្តីពី​ការ​រំសាយ​នុយក្លេអ៊ែរ គឺ​ប្រហែល​ជា​យ៉ាប់​បន្តិច ឬ​ថា​ប្រហែល​មិន​ទាន់​អាច​ទៅ​រួច​ផង។ ពិត​ណាស់ លោក​ត្រាំ​បាន​ធានា​គ្រប់​យ៉ាង​ចំពោះ​លោក​គីម ពិសេស​សន្តិសុខ និង​អនាគត​រុងរឿង​របស់​កូរ៉េខាងជើង បើ​លោក​គីម​យល់ព្រម​រំសាយ​នុយក្លេអ៊ែរ​ពិត​ប្រាកដ។ លោក​គីម​ក៏​យល់​មិន​ខុស​ពី​លោក​ត្រាំ​ដែរ តែ​លោក​គីម​មាន​ការ​ប្រយ័ត្នប្រយែង​ខ្លាំង​ណាស់ ពោល​មិន​ចេះ​តែ​ជឿ​ស៊ុប​តាម​ការ​បញ្ចុះបញ្ចូល លួងលោម​របស់​លោក​ត្រាំ​ទេ។ ត្រង់​ចំណុច​នេះ លោក​ត្រាំ​ខ្លួន​ឯង​ក៏​ដឹង​ដែរ។

ទាំង​នេះ​ស បញ្ជាក់​ឲ្យ​ឃើញ​ជា​ថ្មី​ថា ឧបសគ្គ​ចម្បង​រវាង​ភាគី​ទាំង​ពីរ គឺ​ការ​បន្ត​មិន​ទុក​ចិត្ត​គ្នា ព្រោះ​ចូរ​កុំ​ភ្លេច​ថា​សម្រាប់​របប​ក្រុង​ព្យុងយ៉ាង នុយក្លេអ៊ែរ និង​គ្រាប់មីស៊ីល​ជា​ដង្ហើម​ជីវិត​របស់​ខ្លួន និង​ដែល​បាន​ធ្វើ​ឲ្យ​ខ្លួន​ក្លាយ​ជា​រដ្ឋ​ស្មើ​មុខ ស្មើ​មាត់​មួយ​ដូច​រដ្ឋ​ផ្សេង​ទៀត​ក្នុង​លោក និង​អាច​អង្គុយ​និយាយ​ស្មើ​ភាព​ជាមួយ​អាមេរិក​ពេល​នេះ។ លោក​គីម​យល់​មិន​ច្រឡំ​ទេ​ថា កូរ៉េខាងជើង​កំពុង​មាន​សេដ្ឋកិច្ច​ត្រដរ​ខ្យល់ និង​ត្រូវ​ការ​ឲ្យ​មាន​ការ​អភិវឌ្ឍ​ន៍​ដូច​ប្រទេស​កុម្មុយនិស្ត​ផ្សេង​ទៀត​ដែល​មាន​វៀតណាម​ជា​គំរូ​ស្រាប់។ តែ​អ្វី​ដែល​លោក​គីម​ត្រូវ​ការ​នៅ​ចំពោះ​មុខ គឺ​ការ​ធានា​សន្តិសុខ​ពិតប្រាកដ​ចំពោះ​ខ្លួន មុន​នឹង​ឈាន​ដល់​ដំណាក់ការ​រំសាយ​នុយក្លេអ៊ែរ និង​គ្រាប់​មីស៊ីល។

នៅ​ក្នុង​ន័យ​នេះ លោក​គីម​ចង់​ឲ្យ​មាន​ការ​អនុវត្ត​នីតិវីធិ​ផ្សេងៗ​មួយ​ចំនួន​ជា​មុន មុន​នឹង​និយាយ​ដល់​រឿង​រំសាយ​នុយក្លេអ៊ែរ។ និតិវិធី​ផ្សេង​ទាំង​នោះ​រួម​មាន ការ​ភ្ជាប់​ទំនាក់ទំនង​ផ្លូវការ​រវាង​កូរ៉េខាងជើង និង​អាមេរិក ឬ​មួយ​ការ​ចុះ​ហត្ថលេខា​លើ​សន្ធិសញ្ញាសន្តិភាព​ដើម្បី​បញ្ចប់​សង្រ្គាម​នៅ​ឧបទ្វីប​កូរ៉េ។ គួរ​បញ្ជាក់​ថា ទោះ​បី​សង្រ្គាមកូរ៉េ​បាន​បិទបញ្ចប់​តាំង​ពី​ឆ្នាំ ១៩៥៣ ក៏​ដោយ​ក៏​កូរ៉េខាងត្បូង និង​កូរ៉េខាងជើង​នៅ​បន្ត​មាន​សង្រ្គាម​រវាង​គ្នា។ អ្វី​ដែល​បងប្អូនបង្កើត​គូសត្រូវ​ទាំង​ពីរ​បាន​ចុះ​ហត្ថលេខា គឺ​ត្រឹម​យុទ្ធសន្តិភាព។ លទ្ធផល​ដែល​គ្រប់​គ្នា​កំពុង​សម្លឹង​ឃើញ​នៅ​ក្នុង​ជំនួបកំពូលលើកទី២ រវាង​លោក​ត្រាំ និង​លោក​គីម​ពេល​នេះ គឺ​សន្ធិសញ្ញា​សន្តិភាព​ច្រើន​ជាង​សន្ធិសញ្ញា​រំសាយនុយក្លេអ៊ែរ៕


ទាក់ទង​នឹង​ប្រធានបទ​នេះ

  • ព្រឹត្តិការណ៍អន្តរជាតិប្រចាំថ្ងៃ

    ហេតុអ្វីលោក គីមជុងអ៊ុន ជ្រើសរើសជិះ​រថភ្លើង ទៅជួប​លោកត្រាំ នៅ​វៀតណាម ?

    ស្វែងយល់បន្ថែម

  • វៀតណាម-អាមេរិក-កូរ៉េខាងជើង

    ហេតុអ្វី​បាន​ជា​វៀតណាម​សុខចិត្ត​ធ្វើ​ជា​ម្ចាស់ផ្ទះ​រៀបចំ​ជំនួបកំពូល​រវាង​លោកត្រាំ និង​លោកគីម?

    ស្វែងយល់បន្ថែម

  • ព្រឹត្តិការណ៍អន្តរជាតិប្រចាំថ្ងៃ

    លោកដូណាល់ ត្រាំ ប្រកាសថា​នឹង​ជួប​លោក គីម ជុងអ៊ុន ជា​លើកទី២​នៅ​វៀតណាម

    ស្វែងយល់បន្ថែម

  • ព្រឹត្តិការណ៍អន្តរជាតិប្រចាំថ្ងៃ

    អាមេរិក-កូរ៉េខាងជើង៖​លោកគីម ជុងអ៊ុន​បាន​ត្រៀម​ខ្លួន​ជួប​លោក​ដូណាល់ ត្រាំជា​ថ្មី តែ​បាន​ព្រមាន និង​ដាក់​លក្ខខណ្ឌ

    ស្វែងយល់បន្ថែម

  1. 1
  2. 2
  3. 3
  4. ...
  5. បន្ទាប់ >
  6. ចុងក្រោយ >
កម្មវិធីផ្សាយផ្សេងទៀត
 
សូមអភ័យទោស យើងមិនអាច​ភ្ជាប់​ទៅ​ទំព័រ​ដែល​លោកអ្នក​ស្នើសុំ​បានទេ