នៅចិន មេធាវីសិទ្ធិមនុស្សម្នាក់បាត់ខ្លួនវិញក្នុងថ្ងៃរួចទោស
ដល់ថ្ងៃចេញហើយតែមិនឃើញ ! មេធាវីជំនាញសិទ្ធិមនុស្សចិនម្នាក់ ដែលត្រូវបានទទួលសេរីភាពវិញ នៅថ្ងៃព្រហស្បតិ៍ទី ២៨កុម្ភៈនេះ បន្ទាប់ពីជាប់ឃុំឃាំងក្នុងពន្ធនាគារពីរឆ្នាំពីបទញុះញង់ធ្វើវិទ្ធង្សនា ស្រាប់តែបាត់ខ្លួនទៅវិញ និងមិនអាចទាក់ទងបានឡើយ។ នេះបើតាមគូសបញ្ជាក់របស់ក្រុមគ្រួសារសាច់ញាតិ ដែលមករង់ចាំទទួលនៅមុខពន្ធនាគារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
កើតនៅឆ្នាំ១៩៧១ Jiang Tianyong ជាមេធាវី ដែលធ្លាប់ទទួលបន្ទុកកាន់សំណុំរឿងរសើបៗជាច្រើនដូចជា សំណុំរឿងក្តីការពារចលនាសាសនាFalung Gong ការពារសកម្មជនទីបេ ឬជនរងគ្រោះក្នុងរឿងអាស្រូវទឹកដោះគោពុល ... ប៉ុន្តែអាជ្ញាធរចិនបានដកសិទ្ធិនិងអាជ្ញាប័ណ្ណអាជីពជាមេធាវីពីលោកតាំងពីឆ្នាំ២០០៩មកម្ល៉េះ។ បន្ទាប់មកនៅឆ្នាំ២០១៦ ដោយគ្មានមូលហេតុ លោក Jiang Tianyong បានបាត់ខ្លួន ក្នុងមួយពព្រិចភ្នែក មិនដឹងទៅទីណា ស្រាប់តែនៅខែសីហា ឆ្នាំ២០១៧ តុលាការបើកសវនាការកាត់ទោសអតីតមេធាវីរូបនេះតែម្តង។
នៅថ្ងៃព្រហស្បតិ៍ទី ២៨កុម្ភៈនេះ លោក Jiang Tianyong ត្រូវបញ្ចប់និទណ្ឌភាព និងមានសេរីភាពឡើងវិញ ប៉ុន្តែពេលអ្នកគាំទ្រមកទទួលនៅមុខពន្ធនាគារ ប៉ូលិសបែរជាប្រាប់ថា គេនាំរូបមេធាវីទៅបាត់ហើយ។ តើទៅទីណា ? គ្មានចម្លើយបញ្ជាក់ទេ ! ហើយគេក៏ពុំអាចទាក់ទងអាជ្ញាធរដើម្បីបានព័ត៌មានលម្អិតឡើយ។
គួរឱ្យភ្ញាក់ផ្អើលជាងនេះទៀត បងស្រីនិងម្តាយរបស់លោកមេធាវី ដែលគ្រោងមកទទួលប្អូននិងកូននៅមុខពន្ធនាគារ ក៏បានបាត់ខ្លួន និងពុំអាចទាក់ទងបានដូចគ្នា។ នេះបើតាមការពន្យល់របស់អ្នកស្រី Jiang ជាភរិយា ពីសហរដ្ឋអាមេរិក។
ការបាត់ខ្លួនរបស់លោកមេធាវី Jiang Tianyong និងគ្រួសារ បានកើតឡើងក្នុងខណៈដែលប៉េកាំងកំពុងបើកយុទ្ធនាការបង្ក្រាបមេធាវីផ្នែកសិទ្ធិមនុស្ស។ គិតចាប់ពីខែកក្កដា ២០១៥មក មានមេធាវី អ្នកច្បាប់ សកម្មជនគ្រប់គ្រងសំណុំរឿងរសើបៗ ជាង២០០នាក់ ត្រូវចាប់ខ្លួន។ ភាគច្រើនត្រូវបានដោះលែងមកវិញ ប៉ុន្តែមួយចំនួនតូចទៀត រងការកាត់ទោសយ៉ាងធ្ងន់ធ្ងរនៅក្នុងពន្ធនាគារ។
កាលពីខែមុន មេធាវី ការពារកសិករបាត់ដីម្នាក់ ត្រូវតុលាការកាត់ទោសឱ្យជាប់ពន្ធនាគារ ៤ឆ្នាំកន្លះពីបទវិទ្ធង្សនា។ មេធាវីដែលមានសេរីភាព ត្រូវជាប់បម្រាមអាជ្ញាធរក្នុងការប្រកបអាជីពខ្លួន។ នេះបើតាមអ្នកស្រាវជ្រាវរបស់អង្គការAmnesty International ដែលជឿជាក់ថាអាជ្ញាធរប៉េកាំងគ្មានឆន្ទៈដោះលែង Jiang Tianyongទេ ទោះបីលោកអនុវត្តទោសចប់ក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ