ឥណ្ឌូណេស៊ី និងអូស្រ្តាលីចុះហត្ថលេខាលើកិច្ចព្រមព្រៀងពាណិជ្ជកម្មដែលមានទឹកប្រាក់រាប់ពាន់លានដុល្លារ
នៅថ្ងៃចន្ទ ទី៤ មីនា ប្រទេសឥណ្ឌូណេស៊ី និងអូស្រា្តលីបានចុះហត្ថលេខាលើកិច្ចព្រមព្រៀងពាណិជ្ជកម្មមួយដែលមានទឹកប្រាក់រាប់ពាន់លានដុល្លារ។ គួររម្លឹកថា កិច្ចព្រមព្រៀងពាណិជ្ជកម្មមួយនេះត្រូវបានភាគីទាំងពីរបានផ្តើមចរចាតាំងពីឆ្នាំ ២០១០ និងគ្រោងចុះហត្ថលេខានៅមុនដំណាច់ឆ្នាំ ២០១៨។ តែត្រូវបានពន្យារពេលមកដល់ថ្ងៃនេះដោយសារថា ឥណ្ឌូណេស៊ីមិនសប្បាយចិត្តនឹងអូស្រា្តលីដែលបានសម្រេចទទួលស្គាល់ហ្សេរ៉ុយសាឡិមខាងលិចជាទីក្រុងរបស់ប្រទេសអ៊ីស្រាអែល និងគ្រោងរើស្ថានទូតអូស្រា្តលីពីទីក្រុងតេឡាវីទៅដាក់នៅទីក្រុងហ្សេរ៉ុយសាឡិមខាងលិច។
ចុះផ្សាយនៅថ្ងៃ៖
ស្តាប់ - ០២:២២
កិច្ចព្រមព្រៀងដៃគូសេដ្ឋកិច្ច និងពាណិជ្ជកម្មរវាងឥណ្ឌូណេស៊ី និងអូស្រ្តាលីត្រូវបានចុះហត្ថលេខាដោយរដ្ឋមន្រ្តីក្រសួងពាណិជ្ជកម្មនៃប្រទេសទាំងពីរក្នុងទីក្រុងហ្សាការតា។ រដ្ឋមន្រ្តីក្រសួងពាណិជ្ជកម្មអូស្រ្តាលីបានថ្លែងសាទរដោយបានចាត់ទុកកិច្ចព្រមព្រៀងនេះថា ជាការរំកិលខិតចូលកាន់តែជិតរវាងប្រទេសជិតខាងទាំងពីរដែលមិនធ្លាប់មានពីពេលមុនទេ។ ផ្អែកតាមកិច្ចព្រមព្រៀងដែលមានទឹកប្រាក់រាប់សិបពាន់លានដុល្លារ ឥណ្ឌូណេស៊ីដែលមានពលរដ្ឋរស់នៅចំនួន ២៦០លាននាក់នឹងបើកទីផ្សារឲ្យកាន់តែទូលាយថែមទៀតសម្រាប់វិស័យចិញ្ចឹមសត្វគោ និងសត្វចៀមអូស្រ្តាលី។ បន្ទាប់មក ឥណ្ឌូណេស៊ីនឹងជួយសម្រួលបែបបទដល់ក្រុមអ្នកជំនាញសុខភាព និងបុគ្គលិកផ្នែករ៉ែធ្យូងថ្មរបស់អូស្រា្តលីដែលចង់ចូលទៅបំពេញការងារក្នុងប្រទេសឥណ្ឌូណេស៊ី។
ពីខាងអូស្រ្តាលីវិញ អូស្រ្តាលីនឹងបើកទីផ្សាររបស់ខ្លួនឲ្យកាន់តែទូលាយថែមទៀតសម្រាប់វិស័យឧស្សាហកម្មរថយន្ត និងវិស័យវាយនភ័ណ្ឌដូចជាការនាំឈើចេញ ផលិតផលអេឡិចត្រូនិច និងឱសថ។ គេសង្ឃឹមថាជាមួយនឹងកិច្ចព្រមព្រៀងនេះ ការដោះដូរពាណិជ្ជកម្មរវាងឥណ្ឌូណេស៊ី និងអូស្រា្តលីដែលមានទឹកប្រាក់ជិត ១២ ០០០លានដុល្លារក្នុងឆ្នាំ ២០១៧ នឹងកើនទ្វេដងសម្រាប់ឆ្នាំខាងមុខ។ គួររម្លឹកថា កិច្ចព្រមព្រៀងពាណិជ្ជកម្មដែលទើបបានចុះហត្ថលេខាពេលនេះត្រូវបានក្រុងហ្សាការតា និងក្រុងកង់បេរ៉ាផ្តើមចរចាតាំងពីឆ្នាំ ២០១០ និងគ្រោងចុះហត្ថលេខានៅមុនដំណាច់ឆ្នាំ ២០១៨។
តែត្រូវបានអាក់ខាន និងអូសបន្លាយដោយសារតែរដ្ឋាភិបាលអូស្រា្តលីបានសម្រេចទទួលស្គាល់ហ្សេរ៉ុយសាឡិមខាងលិចជាទីក្រុងរបស់ប្រទេសអ៊ីស្រាអែល និងគ្រោងរើស្ថានទូតរបស់ខ្លួនពីទីក្រុងតេឡាវីទៅដាក់នៅទីក្រុងហ្សេរ៉ុយសាឡិមខាងលិច។ ក្នុងខែធ្នូ ឆ្នាំ ២០១៨ នាយករដ្ឋមន្រ្តីអូស្រ្តាលីលោក Scott Morrison បានប្រកាសជាផ្លូវការដូចសហរដ្ឋអាមេរិក និងប្រទេសខ្លះទទួលស្គាល់ហ្សេរ៉ុយសាឡិមខាងលិចជាទីក្រុងរបស់ប្រទេសអ៊ីស្រាអែល តែបានសម្រេចមិនរើស្ថានទូតអូស្រា្តលីទៅដាក់នៅហ្សេរ៉ុយសាឡិមខាងលិចទេ។ លោក Scott Morrison បានលើកហេតុផលទៅពន្យល់ថា ដរាបណាគ្មានកិច្ចព្រមព្រៀងសន្តិភាពរវាងអ៊ីស្រាអែល និងប៉ាឡេស្ទីន ស្ថានទូតអូស្រ្តាលីប្រចាំអ៊ីស្រាអែលនឹងមិនប្តូរទីតាំងឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ