អង្គការសុខភាពពិភពលោកបើកយុទ្ធនាការប្រយុទ្ធប្រឆាំងជម្ងឺគ្រុនផ្តាសាយ
អង្គការសុខភាពពិភពលោក កាលពីថ្ងៃចន្ទម្សិលមិញ បានចាប់អនុវត្តយុទ្ធសាស្រ្តសកល ដើម្បីការពារប្រជាជនក្នុងពិភពលោក ពីការរាតត្បាត នៃជម្ងឺផ្តាសាយ នៅក្នុងរយៈពេលប៉ុន្មានទៅមុខ។ ស្ថាប័នជំនាញខាងផ្នែកសុខភាពរបស់អង្គការសហប្រជាជាតិ បានព្រមានរួចហើយពីឱកាសរាតត្បាតនៃជម្ងឺផ្តាយសាយ ដែលបានសម្លាប់មនុស្ស រាប់ម៉ឺននាក់ ក្នុងមួយឆ្នាំៗ។
ចុះផ្សាយនៅថ្ងៃ៖
ស្តាប់ - ០២:០៥
ពីឆ្នាំ នេះ រហូតដល់ឆ្នាំ ២០៣០ យុទ្ធសាស្រ្តសកលរបស់អង្គការសុខភាពពិភពលោក មានទិសដៅបង្កាការពារកុំឲ្យកើតមានជម្ងឺគ្រុនផ្តាសាយ គ្រប់គ្រងការឆ្លងរាតត្បាតមេរោគផ្តាសាយពីសត្វទៅមនុស្ស ហើយនិងត្រៀមខ្លួនដើម្បី ទប់ទល់នឹងការរីកសាយភាយមេរោគផ្តាសាយ ថ្មីៗផ្សេងទៀត។
ជម្ងឺផ្តាសាយ ដែលផ្ទុះឡើង ភាគច្រើន នៅពេលអាកាសធាតុចុះត្រជាក់ បានធ្វើឲ្យមនុស្សប្រមាណ១ពាន់លាននាក់ ក្នុងពិភពលោកធ្លាក់ខ្លួនឈឺ និងសម្លាប់មនុស្សរាប់ម៉ឺននាក់ នៅក្នុងមួយឆ្នាំៗ។ នេះបើតាមការវាយតម្លៃរបស់អង្គការសុខភាពពិភពលោក។
សម្រាប់ប្រធានអង្គការសុខភាពពិភពលោក Tedros Adhanom Ghebreyesus ការគំរាមកំហែងនៃជម្ងឺផ្តាសាយនៅតែមាន ហើយការរាតត្បាតនៃមេរោគផ្តាសាយថ្មីមួយទៀត គឺជារឿងដែលមិនអាចជៀសបាន ជាពិសេស នៅក្នុងកាលៈទេសៈពិភពលោកបច្ចុប្បន្ន។
សូមជម្រាបជូនថា ពិភពលោកធ្លាប់រងគ្រោះ រាតត្បាត ដោយមេរោគផ្តាសាយសម្លាប់មនុស្ស ដ៏ខ្លាំងបំផុត កាលពីឆ្នាំ ១៩១៨ នៅពេលដែលមេរោគផ្តាសាយអេស្ប៉ាញ៉ុលសម្លាប់មនុស្សជាង១០លាននាក់។ ជម្ងឺគ្រុនផ្តាសាយ បានផ្ទុះខ្លាំងឡើងបីដង ទៀត កាលពីឆ្នាំ ១៩៥៧ ឆ្នាំ ១៩៦៨ ហើយនិងចុងក្រោយបំផុត នៅឆ្នាំ ២០០៩ នៅពេលជម្ងឺគ្រុនផ្តាសាយបក្សី បានសម្លាប់មនុស្សជិត២ម៉ឺននាក់ (១៨ ៥០០)នាក់ ក្នុងប្រទេសចំនួន ១២៤។
នៅក្នុងយុទ្ធសាស្រ្តសកលរបស់ខ្លួន អង្គការសុខភាពសុខភាពពិភពលោកផ្តោតសំខាន់ទៅលើការបង្កាដែលត្រូវការចំណាយទុនតិច បើប្រៀបធៀបនឹងការខាតបង់ថវិកាដោយសារការរាតត្បាតរបស់មេរោគគ្រុនផ្តាសាយ។សម្រាប់អង្គការសុខភាពពិភពលោក រដ្ឋាភិបាលរបស់ប្រទេសនីមួយៗ ត្រូវពង្រឹងកម្មវិធីសុខភាពថ្នាក់មូលដ្ឋានរបស់ខ្លួន ហើយនិងត្រូវអភិវឌ្ឍកម្មវិធីច្បាស់លាស់ដើម្បី ប្រយុទ្ធប្រឆាំង និងបង្កាទប់ស្កាត់ កុំឲ្យកើតមានការឆ្លងរាតត្បាតមេរោគគ្រុនផ្តាសាយ។ នៅក្នុងកម្មវិធីបង្ការទប់ស្កាត់ អង្គការសុខភាពពិភពលោកជំរុញលើកទឹកចិត្តឲ្យមានការចាក់វ៉ាក់សាំង ប្រចាំឆ្នាំ ជាពិសេស សម្រាប់បុគ្គលសុខាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ