ក្រោយធ្លាក់យន្តហោះនៅអេត្យូពី សិង្ហបុរីហាមមិនឲ្យយន្តហោះប៊ូអ៊ីង ៧៣៧ MAX ហោះឆ្លងកាត់ដែនអាកាសរបស់ខ្លួន
នៅក្នុងប្រទេសសិង្ហបុរី រដ្ឋអំណាចអាកាសចរណ៍ស៊ីវិលបានប្រកាសឲ្យដឹងពីការហាមមិនឲ្យយន្តហោះប៊ូអ៊ីង ៧៣៧ MAX ហោះចូលដែនអាកាសរបស់ខ្លួនចាប់ពីថ្ងៃអង្គារ ទី១២ មីនា។ ការសម្រេចរបស់សិង្ហបុរីពេលនេះបានធ្វើឡើង ក្រោយពីយន្តហោះ ៧៣៧ MAX បានជួបគ្រោះថ្នាក់ធ្លាក់នៅក្នុងប្រទេសអេត្យូពីកាលពីថ្ងៃអាទិត្យ ទី១០ មីនា ឆ្នាំ ២០១៩។ ចំណែកនៅសហរដ្ឋអាមេរិកឯណោះ ទីភ្នាក់ងារអាកាសចរណ៍ស៊ីវិលមិនបានហាមមិនឲ្យបន្តប្រើប្រាស់យន្តហោះប៊ូអ៊ីង ៧៣៧ MAX ដូចប្រទេសមួយចំនួនទេ តែបានជំរុញក្រុមហ៊ុនប៊ូអ៊ីងឲ្យពិនិត្យមើល និងកែប្រែឡើងវិញនូវប្រព័ន្ធបច្ចេកវិទ្យាដែលមានបំពាក់នៅក្នុងយន្តហោះ ៧៣៧ MAX។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
ចាប់ពីថ្ងៃអង្គារ ទី១២ មីនា និងរហូតដល់មានសេចក្តីសម្រេចថ្មី គ្រប់យន្តហោះប៊ូអ៊ីងប្រភេទ ៧៣៧ MAX ត្រូវបានប្រទេសសិង្ហបុរីហាមមិនឲ្យហោះឆ្លងកាត់ដែនអាកាសរបស់ខ្លួនទេ។ វិធានការរបស់សិង្ហបុរីពេលនេះបានធ្វើឡើង ៤៨ម៉ោងក្រោយការធ្លាក់យន្តហោះប៊ូអ៊ីង ៧៣៧ MAX របស់ក្រុមហ៊ុនអាកាសចរណ៍ Ethiopian Airline ដែលបានផ្តាច់ជីវិតមនុស្ស ១៥៧នាក់។ នៅមុនសិង្ហបុរី ក៏មានប្រទេសកាន់តែច្រើនឡើង ពិសេសប្រទេសដែលមានយន្តហោះប៊ូអ៊ីងប្រភេទ ៧៣៧ MAX ដូចយ៉ាងចិន កូរ៉េខាងត្បូង ឥណ្ឌូណេស៊ី ម៉ុងហ្គោលី អាហ្រ្វិកខាងត្បូង ម៉ិកស៊ិច និងប្រេស៊ីលបានហាមមិនឲ្យយន្តហោះប្រភេទនេះហោះហើរមួយរយៈ។
នៅអាហ្សង់ទីន ក្រុមអ្នកបើកយន្តហោះឲ្យក្រុមហ៊ុនអាកាសចរណ៍ Aerolineas Argentinas បានប្រកាសថា ពួកគេមិនបើកយន្តហោះប្រភេទនេះទេ ដរាបណាគ្មានព័ត៌មានគ្រប់គ្រាន់ និងការធានាពីក្រុមហ៊ុនប៊ូអ៊ីងនោះ។ ចំណែកនៅសហរដ្ឋអាមេរិក ទីភ្នាក់ងារអាកាសចរណ៍ស៊ីវិលមិនបានហាមមិនឲ្យបន្តប្រើប្រាស់យន្តហោះប្រភេទប៊ូអ៊ីង ៧៣៧ MAX ដូចប្រទេសមួយចំនួនទេ តែបានជំរុញក្រុមហ៊ុនប៊ូអ៊ីងឲ្យពិនិត្យមើល និងកែប្រែឡើងវិញនូវប្រព័ន្ធបច្ចេកវិទ្យាដែលមានបំពាក់នៅក្នុងយន្តហោះ ៧៣៧ MAX យ៉ាងយូរបំផុតត្រឹមខែមេសាខាងមុខ។ គួររម្លឹកថា យន្តហោះ ៧៣៧ MAX បានជួបគ្រោះថ្នាក់ធ្លាក់ពីរបន្តបន្ទាប់គ្នា។ លើកទី១ នៅឥណ្ឌូណេស៊ីកាលពីថ្ងៃទី២៩ តុលា ឆ្នាំ ២០១៨ ដោយបានផ្តាច់ជីវិតអ្នកដំណើរចំនួន ១៨៩នាក់ និងលើកទី២ នៅអេត្យូពីនាថ្ងៃអាទិត្យ ទី១០ មីនា ឆ្នាំ ២០១៩ ដោយស្លាប់អ្នកដំណើរចំនួន ១៥៧នាក់។
សោកនាដកម្មពីរដងនេះកំពុងធ្វើឲ្យក្រុមហ៊ុនប៊ូអ៊ីងឈឺក្បាលខ្លាំង និងកំពុងធ្វើឲ្យក្រុមអ្នកវិនិយោគព្រួយបារម្ភជាពន់ពេក។ បច្ចុប្បន្ននេះ មានយន្តហោះប៊ូអ៊ីងប្រភេទ ៧៣៧ MAX ដល់ទៅ ៣៥០គ្រឿងកំពុងធ្វើចរាចរណ៍នៅក្នុងលោក ហើយការដាក់ឲ្យដំណើរការលើកទី១ របស់វាទើបចាប់ផ្តើមក្នុងឆ្នាំ ២០១៧ ប៉ុណ្ណោះ។ វាជារឿងបន្ទាន់បំផុតដែលក្រុមហ៊ុនប៊ូអ៊ីងត្រូវពិនិត្យមើល និងស្វែងរកមូលហេតុដើម្បីកែតម្រូវផ្នែកបច្ចេកទេស និងប្រព័ន្ធបច្ចេកវិទ្យារបស់ប្រភេទយន្តហោះនេះឡើងវិញ។ បើមិនដូច្នោះទេ ផលវិបាកសេដ្ឋកិច្ចនឹងមានទំហំធំ ព្រោះសព្វថ្ងៃ ក្រុមហ៊ុនប៊ូអ៊ីងបានប្រើមនុស្សជាង ១៥ម៉ឺននាក់នៅអាមេរិក។ គ្រាន់តែក្នុងថ្ងៃចន្ទ ទី១១ មីនា តម្លៃភាគហ៊ុនប៊ូអ៊ីងនៅផ្សារភាគហ៊ុន Wall Street បានធ្លាក់ចុះ ៥,៣៦%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ