ស្វ៊ីស កូឡុំប៊ី និងស៊ុយអែត សិស្សល្អជាងគេផ្នែកធ្វើអន្តរកាលថាមពលដើម្បីបរិស្ថាន
បើតាមការសិក្សារបស់ក្រុមហ៊ុនហិរញ្ញវត្ថុអន្តរជាតិ Edmond de Rothschild ចេញផ្សាយនៅថ្ងៃពុធទី ២៧ មីនា ២០១៩នេះ ស្វ៊ីស កូឡុំបូ និងស៊ុយអែត ជាប្រទេសបីនាំមុនគេបំផុតខាងផ្នែកធ្វើអន្តរកាលថាមពលដើម្បីបរិស្ថាន។ ចំណែកអ្នកជាប់លេខចុងប៉ូចគេបំផុតគឺកាតា បន្ទាប់មកគឺសិង្ហបុរីនិងអេមីរ៉ាតអារ៉ាប់រួម។ បារាំងស្ថិតនៅលំដាប់ទី៧ អាល្លឺម៉ង់លេខ២៨ ចិនលេខ៤១ និងអាមេរិកជាប់ចំណាត់ថ្នាក់លេខ៤៨។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
នៅឆ្នាំ២០១៧ កាតា ប្រើប្រាស់ថាមពល ច្រើនជាងបង់ក្លាដែសដល់ទៅ១០០ដង ។ អាមេរិក ប្រើថាមពលបីដងលើសចិន។ ហើយអ្នកដែលថាមពលច្រើនជាងគេបំផុត គឺអារ៉ាប៊ីសាអូឌីត កូវ៉ែត កាតា និងអេមីរ៉ាតអារ៉ាប់រួម។ នេះបើគិតជាមធ្យមភាគរបស់ប្រជាជនម្នាក់ៗ។ បារាំង អាចឈរនៅលំដាប់ខ្ពស់(លេខ៧) ក៏ព្រោះតែមានប្រភពថាមពលច្រើនអាចប្រើលាយគ្នា ពោលគឺប្រើថាមពលធ្យូងថ្មតែត្រឹម៥២%ទល់នឹង៨៥%សម្រាប់ប្រទេសផ្សេងទៀតនៅលើពិភពលោក និងមានថាមពលនុយក្លេអ៊ែរ៣៨%។
នេះជាលទ្ធផលនៃការសិក្សាវិភាគទិន្នន័យ នៅក្នុងប្រទេសចំនួន៦០ តាំងពីឆ្នាំ១៩៨០ ដោយផ្អែកលើកត្តាសំខាន់បួនយ៉ាង ៖ ការប្រើប្រាស់ថាមពល ការបញ្ចេញឧស្ម័នកាបូនិក ចំណែកនៃការប្រើថាមពលធ្យូងថ្ម របស់មនុស្សម្នាក់ៗ និងប្រសិទ្ធភាពថាមពល។
ក្រៅអំពីផ្តល់ចំណាត់ថ្នាក់ឱ្យប្រទេសនីមួយៗ ការសិក្សារបស់Edmond de Rothschild បានបង្ហាញឱ្យឃើញ អំពីកំណើននៃការប្រើប្រាស់ថាមពលនៅលើពិភពលោក។ ជាកំណើនដ៏ច្រើនហួសប្រមាណ ប្រើប្រៀបទៅនឹងភាពជឿនលឿនផ្នែកកាត់បន្ថយការបញ្ចេញឧស្ម័នកាបូនិក។
វិធីដ៏សាមញ្ញនៃការកាត់បន្ថយឧស្ម័នកាបូនិក គឺត្រូវកាត់បន្ថយការប្រើប្រាស់ថាមពល ប៉ុន្តែបើតាមភ្នាក់ងារថាមពលអន្តរជាតិ ពិភពលោកគ្រោងនឹងមានតម្រូវការថាមពលកើនឡើងដល់ទៅប្រមាណ២៥%នៅឆ្នាំ២០៤០។ ឯចំណែកការប្រើប្រាស់ថាមពលធ្យូងថ្ម ក៏បានកើនឡើងខ្លាំង នៅឆ្នាំ២០១៧ ដើម្បីទ្រទ្រង់កំណើនសេដ្ឋកិច្ច។
ដូច្នេះហើយបានជាអ្នកដឹកនាំការសិក្សាដដែលនេះយល់ថា ដើម្បីអាចឆ្លងអន្តរកាលថាមពលគេមានមធ្យោបាយសំខាន់ៗពីរ ៖ ធ្វើឱ្យប្រសើរឡើងការនូវប្រសិទ្ធភាពថាមពល ដោយត្រូវជួលជុលថាមពល ឬជ្រើសរើសមធ្យោបាយដឹកជញ្ជូនដើរដោយអគ្គិសនី និងត្រូវចេះជ្រើសរើសប្រភពថាមពល (ចែកចាយថាមពលធ្យូងថ្ម វារីអគ្គិសនី ថាមពលបានមកពីខ្យល់ សម្រាប់ប្រើប្រាស់ក្នុងប្រទេសឱ្យបានប្រសើរឡើង)។
ករណីប្រទេសស្វ៊ីស កូឡុំប៊ី និងស៊ុយអែត ដែលបានជាប់លំដាប់ថ្នាក់ដំបូងគេ ជាឧទាហរណ៍ជាក់ស្តែង។ ប្រទេសទាំងបីនេះ មានភាពអនុគ្រោះខ្លាំងផ្នែកប្រភពថាមពលមិនចេះរីងស្ងួត (វារីអគ្គិសនី ថាមពលបានមកពីខ្យល់ ...) និងមានចំណាត់ការច្បាស់លាស់ផ្នែកថាមពល។ អាជ្ញាធរមិនត្រឹមតែយកពន្ធខ្លាំងលើថាមពលធ្យូងថ្ម និងការបញ្ចេញឧស្ម័នកាបូនិកទេ តែថែមទាំងបានសម្រួលពន្ធដារអនុគ្រោះដល់ការប្រើប្រាស់ថាមពលមិនចេះរីងស្ងួត ផ្តល់ការគាំទ្រដល់ក្រុមហ៊ុននិងកម្មវិធីស្រាវជ្រាវដើម្បីបរិស្ថានទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ