ច្បាប់អ៊ីស្លាម "Charia” របស់ព្រុយណេកំពុងរងការរិះគន់កាន់តែខ្លាំង
បន្ទាប់ពី តារាភាពយន្តហូលីវ៉ូតអាមេរិក George Clooney តារាចម្រៀង Elton John សហគមន៍អន្តរជាតិ បានបញ្ចេញប្រតិកម្មកាន់តែខ្លាំងឡើងប្រឆាំងនឹងព្រះចៅស៊ុលតង់របស់ព្រុយណេ។ ស្របតាមច្បាប់របស់អ៊ីស្លាម ចាប់ពីថ្ងៃទី ៣មេសា ២០១៩នេះ ព្រុយណេនឹងចាប់អនុវត្តច្បាប់ថ្មី ដែលនឹងគ្រោងនឹងដាក់ទោសប្រហារជីវិត អ្នកស្រលាញ់ភេទដូចគ្នា ព្រមទាំងជនផិតក្បត់។ ច្បាប់ថ្មីរបស់ព្រុយណេ ក៏គ្រោងដាក់ទោសកាត់ដៃ-ជើង ចំពោះករណីទោសលួចផង។ អង្គការរដ្ឋាភិបាល បានបរិហារច្បាប់ថ្មីនេះថាជាច្បាប់បង្ក្រាប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ច្បាប់ថ្មី នឹងចូលជាធរមាន ចាប់ពីថ្ងៃទី ៣ មេសា ២០១៩ទេ ប៉ុន្តែប្រតិកម្មបានផ្ទុះឡើងតាំងតែពីថ្ងៃសៅរ៍ ជាលក្ខណៈអន្តរជាតិ និងផ្តើមដំបូងដោយយុទ្ធនាការ របស់តារាភាពយន្តអាមេរិក George Clooney។ លោកបានអំពាវនាវពិភពលោក ឈប់ចូលសណ្ឋាគារដ៏ប្រណិតៗ ជារបស់ព្រះចៅនៃរាជាណាចក្រព្រុយណេ ជាមួយនឹងការបង្ហោះសារថា “ព្រុយណេនឹងចាប់អនុវត្តច្បាប់ប្រហារជីវិត ដោយវាយនឹងរំពាត់ ព្រមទាំងគប់ដុំថ្ម រហូតដល់ស្លាប់ លើរាល់រូបពលរដ្ឋណាដែលស្រលាញ់ភេទដូចគ្នា ! សម្រាប់លោក Clooney ការជួលបន្ទប់ឬទៅទទួលទានអាហារ ឬរៀបចំកម្មវិធីផ្សេង នៅក្នុងសណ្ឋាគារណាមួយរបស់ព្រុយណេ ប្រៀបដូចជាយកលុយទៅដាក់ក្នុងហៅប៉ៅរបស់មនុស្សម្នាក់ដែលរំលោភច្បាប់មនុស្សជាតិ រើសអើងស្អប់ខ្ពើមអ្នកស្រលាញ់ភេទដូចគ្នា។
ព្រះចៅស៊ុលតង់ព្រុយណេ ជាអ្នកមានខ្លាំងជាងគេម្នាក់នៅលើពិភពលោក មានភ្នាក់ងារវិនិយោគ និងជាម្ចាស់សណ្ឋាគារដ៏ប្រណិតចំនួន៩ នៅទីក្រុងប៉ារីស ឡុងដ៍ និងសហរដ្ឋអាមេរិក។ តាំងពីឆ្នាំ១៩៦៧មក ព្រះចៅស៊ុលតង់ ហាស្សាណា បុលគីអះ បានដឹកនាំព្រុយណេ ដែលស្ថិតនៅលើកោះ Bornéo មានប្រជាជនសរុបប្រមាណជាង៤៣០០០០នាក់ ឱ្យបានក្លាយជារាជាណាចក្រប្រេងកាតដ៏មានបានបំផុតមួយក្នុងតំបន់អាស៊ីអាគ្នេយ៍ តែដោយប្រើអំណាចផ្តាច់ការបំផុត និងបានបញ្ចូលច្បាប់អ៊ីស្លាម "Charia" មកក្នុងរាជាណាចក្រ តាំងពីឆ្នាំ២០១៣មក។
ប៉ុន្តែ ដោយបញ្ហាប្រឈមជាក់ស្តែង និងដោយមានការប្រឆាំងពីមតិសាធារណៈ ការអនុវត្តច្បាប់ ត្រូវបានលើកពេល។ ទើបតែថ្ងៃសៅរ៍ចុងសប្តាហ៍នេះ ការិយាល័យនាយករដ្ឋមន្ត្រីព្រុយណេ បានចេញសេចក្តីថ្លែងការណ៍រំលឹកថា ប្រទេសនឹងចាប់អនុវត្តប្រព័ន្ធតុលាការទ្វេ ៖ មួយជាច្បាប់អ៊ីស្លាម ដែលអនុវត្តលើគ្រប់អ្នកកាន់សាសនាអ៊ីស្លាម (ជាង២/៣នៃប្រជាជនព្រុយណេ) និងច្បាប់មួយទៀត ជាច្បាប់ស៊ីវិល ដែលគ្របដណ្តប់លើផ្ទៃប្រទេសនិងសម្រាប់ប្រជាពលរដ្ឋទាំងអស់ ដើម្បីធានាសន្តិភាព សណ្តាប់ធ្នាប់ ការពារសាសនា ជីវិតគ្រួសារ និងមនុស្សទូទៅ។ ច្បាប់ថ្មីនេះ ក៏មានចែងឱ្យដាក់ទោសកាត់ដៃ ឬកាត់ជើង ផងក្នុងករណីលួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ