ណាសា៖ មីស៊ីលប្រឆាំងផ្កាយរណបរបស់ឥណ្ឌា បង្កឲ្យមានបំណែកដែលគ្រោះថ្នាក់ដល់ស្ថានីយ៍អវកាសអន្តរជាតិ
ទីភ្នាក់ងារអវកាសណាសាបានដំឡើងសំឡេង ខ្លាំងៗដាក់ឥណ្ឌា បន្ទាប់ពីមីស៊ីល ប្រឆាំងផ្កាយរណបរបស់ឥណ្ឌាបានបង្កឲ្យមានបំណែកអវកាសរាប់រយ ដែលអាចបង្កគ្រោះថ្នាក់ដល់ជីវិតរបស់អវកាសយាននិក ហើយស្ថានីយ៍អវកាសអន្តរជាតិ ISS។ នៅថ្ងៃព្រហស្បតិ៍សប្តាហ៍មុន នាយករដ្ឋមន្រ្តីឥណ្ឌា លោកណារិនដ្រា ម៉ូឌីបានលើកឡើងពីមោទនភាពជាតិរបស់ឥណ្ឌា បានចូលរួមក្នុងចំណោមប្រទេសមហាអំណាច៤ ដែលមានសមត្ថភាព បាញ់មីស៊ីលពីដី ដើម្បីបំផ្លាញ ផ្កាយរណប នៅក្នុង ទីអវកាស។ សម្រាប់ប្រមុខរដ្ឋាភិបាលឥណ្ឌា គោលដៅរបស់ឥណ្ឌា គឺសន្តិភាព ប៉ុន្តែមិនមែនបង្កើតបរិយាកាសធ្វើសង្រ្គាមនៅទីអវកាសនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
នៅក្រោយបាញ់សាកល្បងដោយជោគជ័យ មីស៊ីលបំផ្លាញ ផ្កាយរណប នៅក្នុងទីអវកាស រដ្ឋាភិបាលឥណ្ឌាធ្លាប់បានធានាអះអាងថា បំណែករបស់ផ្កាយរណប នឹងមិនបង្កគ្រោះថ្នាក់ ព្រោះផ្កាយរណបស្ថិតនៅកំពស់ ៣០០គីឡូម៉ែត្រពីផែនដី គឺទាបជាង ស្ថានីយ៍អវកាសអន្តរជាតិទៅទៀត។ ហើយ នៅក្នុងរយៈពេលប៉ុន្មានសប្តាហ៍ខាងមុខ វានឹងឆេះរលាយ ក្នុងពេលធ្លាក់ចុះក្នុងបរិយាកាស។
ប៉ុន្តែ នៅ៥ថ្ងៃក្រោយ ការបាញ់សាកល្បងរបស់ឥណ្ឌា ប្រធានទីភ្នាក់ងារអវកាសណាសា លោកJim Bridenstine បាននិយាយប្រាប់បុគ្គលិករបស់ណាសា ថា គេបានរកឃើញមានបំណែករបស់ផ្កាយរណបដែលមីស៊ីលឥណ្ឌាបាញ់បំផ្លាញ ដល់ទៅ៤០០បំណែក នៅក្នុងទីអវកាស។ តាមប្រធានរបស់ណាសា គេតាមដានជាពិសេស បំណែកដែលមានទំហំលើសពី១០សង់ទីម៉ែត្រ ដែលគេរកឃើញមាន៦០បំណែក។ ក្នុងចំណោម ៦០បំណែកទៀតសោត គឺមាន២៤បំណែក ដែលហោះនៅកំពស់ខ្ពស់ជាងស្ថានីយ៍អវកាសអន្តរជាតិ (៤១០គីឡូម៉ែត្រពីផែនដី) ដោយសារតែកម្លាំងបាញ់បំផ្លាញរបស់មីស៊ីល។
“ឥណ្ឌាបានចូលរួមក្នុងក្លិបរបស់ប្រទេសដែលមានសមត្ថភាព បាញ់មីស៊ីល បំផ្លាញផ្កាយរណប ក្នុងទីអវកាស” នេះជាការថ្លែងរបស់នាយករដ្ឋមន្រ្តីឥណ្ឌា នៅមួយថ្ងៃក្រោយ ការបាញ់សាកល្បងដោយជោគជ័យ មីស៊ីលប្រឆាំងផ្កាយរណប។ សម្រាប់នាយករដ្ឋមន្រ្តីឥណ្ឌា មីស៊ីលបំផ្លាញផ្កាយរណបរបស់ឥណ្ឌា គ្មានគោលដៅទៅប្រឆាំងនឹងប្រទេសណាមួយនោះទេ។
ប៉ុន្តែ ទាំងវ៉ាស៊ីនតោន ហើយនិងអឺរ៉ុបដែលមានជនជាតិរបស់ខ្លួនបម្រើការនៅស្ថានីយ៍អវកាសអន្តរជាតិ កំពុងបារម្ភពីបញ្ហា ដែលអាចបង្កឡើងដោយបំណែកសំរាម ដែលជាលទ្ធផលនៃការបាញ់មីស៊ីលបំផ្លាញ ផ្កាយរណប។
សម្រាប់ប្រធានណាសា ទង្វើបាញ់សាកល្បងមីស៊ីលប្រឆាំងផ្កាយរណបរបស់ឥណ្ឌា ជារឿងមួយ ដែលគេមិនអាចទទួលយកបាន ព្រោះថា បំណែករបស់ផ្កាយរណប ឥណ្ឌា កំពុងបង្កឲ្យមានគ្រោះថ្នាក់មួយបន្ថែមទៀត សម្រាប់ អាយុជីវិតរបស់អវកាសយានិក ដែលធ្វើការនៅស្ថានីយ៍អវកាសអន្តរជាតិ។
សព្វថ្ងៃនេះ ណាសាបានរកឃើញមានបំណែក ធំជាង ១០សង់ម៉ែត្រ ដល់ទៅជាង ២ម៉ឺន ៣ពាន់បំណែកដែលនៅក្នុងនោះ មាន៣ពាន់ ជាសំរាមដែលបង្កដោយមីស៊ីលបាញ់បំផ្លាញផ្កាយរណបរបស់ចិន កាលពីឆ្នាំ ២០០៧។ ដោយសារតែការបាញ់សាកល្បងមីស៊ីលប្រឆាំងផ្កាយរណបរបស់ឥណ្ឌាលើកនេះ គ្រោះថ្នាក់ បុកជល់ក្នុងទីអវកាស រវាងបំណែកសំរាម ហើយនឹងស្ថានីយ៍អវកាសបានកើនឡើងដល់៤០ភាគរយ។ នេះបើតាមប្រធានរបស់ណាសា។ ប៉ុន្តែ អត្រា គ្រោះថ្នាក់នេះនឹងអាចថយចុះមកវិញ នៅពេលដែលបំណែក ដែលស្ថិតនៅក្នុងកំពស់ទាប ហោះធ្លាក់ចុះក្នុងបរិយាកាសរបស់ផែនដី។
សម្រាប់នាយករដ្ឋមន្រ្តីឥណ្ឌា វាជាមោទនភាពជាតិ ដែលឥណ្ឌាបានចូលរួមជាមួយ សហរដ្ឋអាមេរិក ចិន និងរុស្ស៊ី ដែលមានសមត្ថភាពបាញ់មីស៊ីលបំផ្លាញផ្កាយរណប។ ប៉ុន្តែជាមួយគ្នានោះ វាជាសារបញ្ជាក់ទៅប៉ាគីស្ថានដែលជាគូប្រជែងរបស់ឥណ្ឌា។ បើសិនឥណ្ឌាមានសមត្ថភាពបាញ់មីស៊ីល បំផ្លាញផ្កាយរណបដែលស្ថិតក្នុងកំពស់ដ៏ខ្ពស់ នោះ ឥណ្ឌាគឺមានសមត្ថភាពជាពិសេស នៅក្នុងប្រព័ន្ធការពារជាតិ ដើម្បីបាញ់ទម្លាក់មីស៊ីលបាលីស្ទិក ដែលអាចមានផ្ទុកក្បាលគ្រាប់នុយក្លេអ៊ែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ