បន្ទាប់ពីបេសកកម្មទៅកាន់ឋានព្រះចន្ទ ចិនបន្តមហិច្ឆតាអវកាសទៅកាន់អាចម៍ផ្កាយទៀត
នៅថ្ងៃព្រហស្បតិ៍ ទី១៨ មេសា ទីភ្នាក់ងារអវកាសចិនបានប្រកាសឲ្យដឹងពីគម្រោងបញ្ជូនយានអវកាសឆ្ពោះទៅកាន់អាចម៍ផ្កាយ។ លោកលីវ ស៊ឺជុង នាយកមជ្ឈមណ្ឌលរុករក និងវិស្វកម្មអវកាសចិនបានថ្លែងប្រាប់ក្រុមអ្នកកាសែតថា យានអវកាសនឹងនាំដីអាចម៍ផ្កាយមកកាន់ផែនដីដើម្បីធ្វើការសិក្សា វិភាគ។ តែលោកលាវ ស៊ឺជុងមិនបញ្ជាក់ថា តើពេលណាទើបបេសកកម្មបញ្ជូនយានអវកាសទៅកាន់អាចម៍ផ្កាយនឹងត្រូវចាប់ផ្តើមនោះទេ។ គួររម្លឹកថាក្នុងរយៈពេលប៉ុន្មានឆ្នាំចុងក្រោយនេះ បេសកកម្មដូចគ្នានេះធ្លាប់បានធ្វើឡើងដោយសហភាពអឺរ៉ុប សហរដ្ឋអាមេរិក និងប្រទេសជប៉ុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៣
បេសកកម្មទៅកាន់អាចម៍ផ្កាយត្រូវមានរយៈពេល ១០ឆ្នាំ ហើយអាចម៍ផ្កាយដែលចិនចង់ទៅនោះមានឈ្មោះថា ២០១៦ H០៣ មានវិជ្ជមាឌប្រវែង ៤១ម៉ែត្រ និងស្ថិតនៅចម្ងាយប្រមាណជា ៥ ២០០ ០០០គីឡូម៉ែត្រពីភពផែនដី។ នៅចំពោះមុខក្រុមអ្នកកាសែត នាយកមជ្ឈមណ្ឌលរុករក និងវិស្វកម្មអវកាសចិនលោកលីវ ស៊ឺជុងមិនបានបញ្ជាក់ពីកាលវិភាគនៃការបញ្ជូនយានអវកាសទៅកាន់អាចម៍ផ្កាយនោះទេ តែគ្រាន់បញ្ជាក់ថា យានអាវកាសនោះនឹងត្រូវនាំដីអាចម៍ផ្កាយមកកាន់ផែនដីវិញដើម្បីធ្វើសិក្សា វិភាគស្វែងយល់ពីប្រព័ន្ធព្រះអាទិត្យរបស់យើង។ លោកលីវ ស៊ឺជុងបានឲ្យដឹងទៀតថា នៅពេលវិលត្រឡប់ចុះមកផែនដីវិញ យានអវកាសនោះនឹងត្រូវបំបែកខ្លួនជាពីរដោយម៉ូឌុលមួយនាំដីអាចម៍ផ្កាយមកកាន់ផែនដី ហើយម៉ូឌុលមួយទៀតត្រូវធ្វើដំណើរទៅកាន់ផ្កាយដុះកន្ទុយមួយឈ្មោះ ១៣៣P ដែលមានចម្ងាយជាង ៣០០លានគីឡូម៉ែត្រពីភពផែនដី។
នាយកមជ្ឈមណ្ឌលរុករក និងវិស្វកម្មអវកាសចិនរូបនេះដដែលបានអំពាវនាវដល់ពួកអ្នកប្រាជ្ញក្នុងលោកឲ្យចូលរួមចែករំលែកបទពិសោធន៍របស់ពួកគេនៅក្នុងបេសកកម្មមួយនេះ។ គួររម្លឹកថា មហិច្ឆតារបស់ចិនចង់ទៅកាន់អាចម៍ផ្កាយពេលនេះបានធ្វើឡើង បន្ទាប់ពីជប៉ុនសម្រេចបានជោគជ័យនាខែកុម្ភៈកន្លងទៅក្នុងការបញ្ជូនយានអវកាស Hayabusa២ ទៅកាន់អាចម៍ផ្កាយមួយឈ្មោះ Ryugu ដែលមានចម្ងាយ ៣៤០លានគីឡូម៉ែត្រពីភពផែនដី។ បន្ទាប់មកក្នុងខែតុលា Hayabusa២ បានទម្លាក់លើ Ryugu នូវយានយន្តតូចមួយឈ្មោះ Mascot ដែលផលិតរួមគ្នាដោយអាល្លឺម៉ង់ និងបារាំង។
Mascot ត្រូវបានគេចាត់ទុកដូចជាប្អូនប្រុសរបស់យានយន្ត Philae ដែលយានអាវកាសអឺរ៉ុប Rosetta បានបញ្ជូនក្នុងឆ្នាំ ២០១៤ ទៅកាន់ផ្កាយដុះកន្ទុយ Tchouri ដែលមានចម្ងាយជាង ៥០០លានគីឡូម៉ែត្រពីភពផែនដី។ បន្ទាប់ពីជប៉ុន និងសហភាពអឺរ៉ុប ក្រុមហ៊ុនណាហ្សាអាមេរិកបានបញ្ជូននាដើមខែមករា ឆ្នាំ ២០១៩ នេះនូវយានអាវកាស New Horizons ទៅក្បែរអាចម៍ផ្កាយឈ្មោះ Ultima Thule ដែលមានចម្ងាយពីភពផែនដីដល់ទៅ ៦ ២០០លានគីឡូម៉ែត្រ។ កាលពីដំណាច់ខែធ្នូ ឆ្នាំ ២០១៨ ក្រុមហ៊ុនណាហ្សាដដែលបានបញ្ជូនយានអាវកាសមួយទៀតឈ្មោះ Osiris-Rex ទៅដាក់ក្នុងគន្លងតារាវិថីជុំវិញអាចម៍ផ្កាយឈ្មោះ Bennu ដែលមានចម្ងាយតែប្រមាណ ១១០លានគីឡូម៉ែត្រពីភពផែនដី។
គេត្រូវរង់ចាំមើលថា តើចិននឹងទទួលបានជោគជ័យឬអត់នៅក្នុងបេសកកម្មទៅកាន់អាចម៍ផ្កាយឈ្មោះ ២០១៦ H០៣។ គួររម្លឹកថាចាប់ពីពេលនេះតទៅ ចិនចំណាយច្រើនជាងរុស្ស៊ី និងជប៉ុនសម្រាប់កម្មវិធីអវកាសស៊ីវិលជាមួយនឹងថវិកាចំនួន ៨ ៤០០លានដុល្លារក្នុងឆ្នាំ ២០១៧ ពោលស្ថិតលំដាប់ទី២ ក្នុងលោកបន្ទាប់ពីអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ