ស្រីលង្កា ៖ ចាប់ខ្លួនជនសង្ស័យ៧នាក់ពាក់ព័ន្ធនឹងភេរវកម្មនៅកូឡុំបូ
តុល្យការនៃជនរងគ្រោះ កាន់តែធ្ងន់ធ្ងរ ! ចំនួនមនុស្សស្លាប់បានឡើងដល់ ជាងពីររយនាក់ របួសជាង ៤៥០នាក់។ នៅក្នុងចំណោមជនរងគ្រោះបាត់បង់ជីវិត មានម្នាក់ជាជនជាតិហូឡង់ ម្នាក់ជាជនជាតិព័រទុយហ្កាល់ ពីរនាក់ចិន និងជាច្រើននាក់ជាអង់គ្លេស និងអាមេរិក។ ឯព័ត៌មានទាក់ទងសកម្មភាពភេរវកម្ម ដ៏ទទួលបានកាន់តែលម្អិតជាងមុន។ មានយ៉ាងហោចណាស់អត្តឃាតជនពីរនាក់ដែលបានចូលរួមធ្វើភេរវកម្មប្រឆាំងនឹងវិហារកាតូលិក និងសណ្ឋាគារនៅកូឡុំបូ កាលពីថ្ងៃអាទិត្យម្សិលមិញ។ បើតាមប៉ូលិស មានជនសង្ស័យ៧នាក់ ត្រូវបានចាប់ខ្លួន ក្នុងប្រតិបត្តិការឆែកឆេរ ក្រោយភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
តាមប្រភពសារព័ត៌មានស្រីលង្កា មានជនសង្ស័យចំនួន ៧ នាក់ ត្រូវបានចាប់ខ្លួន នៅរសៀលថ្ងៃអាទិត្យទី ២១មេសា នៅក្នុងប្រតិបត្តិការឆែកឆេរ នៅក្នុងផ្ទះមួយ ស្ថិតនៅតំបន់ភាគខាងជើង ជាយរដ្ឋធានីកូឡុំបូ។ ជាប្រតិបត្តិការ ដែលបញ្ចប់ទៅដោយការបំផ្ទុះភេរវកម្មលើកទី៨ ក្នុងថ្ងៃតែមួយ ពីសំណាក់អត្តឃាតជនម្នាក់ដែល បានចុចបំផ្ទុះគ្រាប់បែកជាប់នឹងខ្លួន។ កម្លាំងផ្ទុះបានធ្វើឱ្យធ្លាយពិដាន ធ្លាក់បាក់សង្កត់កងកម្លាំងប៉ូលិស។ អ្នកនាំពាក្យរបស់ប៉ូលិស មិនបានបញ្ជាក់អំពីការចាប់ខ្លួនជនសង្ស័យទេ តែបានអះអាងថាមាន ប៉ូលិសបីនាក់បាត់បង់ជីវិត នៅក្នុងប្រតិបត្តិការនោះ។
ប៉ូលិសក៏បានរកឃើញអត្តសញ្ញាណរបស់ភេរវជនម្នាក់ ដែលធ្វើការវាយប្រហារលើសណ្ឋាគារ Cinnamon Grand។ អត្តឃាតជននេះជាភ្ញៀវស្នាក់នៅក្នុងសណ្ឋាគារកាលពីថ្ងៃសៅរ៍ ក្រោមឈ្មោះថា Mohamed Azzam Mohamed។ បើតាមសាក្សីដែលជាបុគ្គលិករបស់សណ្ឋាគារ អត្តឃាតជន បានមកតម្រង់ជួរចុងប៉ូចគេដើម្បីស្រស់ស្រូបអាហារពេលព្រឹក រួចក៏ចុចគ្រាប់បែកឱ្យផ្ទុះឡើង។ អ្នកគ្រប់គ្រងសណ្ឋាគារម្នាក់ នៅឈរក្បែរនោះ បានស្លាប់ភ្លាមជាមួយភ្ញៀវផ្សេងទៀត។ ការបំផ្ទុះបានកើតឡើងនោវេលាម៉ោង ៨កន្លះព្រឹក ពេលមានមនុស្សម្នាច្រើន និង ស្ទើរទន្ទឹមពេលគ្នាជាមួយនឹងការបំផ្ទុះនៅសណ្ឋាគារSangri-la និងសណ្ឋាគារ Kingpuriដែលនៅក្បែរគ្នា និងការបំផ្ទុះភេរវកម្មប្រឆាំងនឹងវិហារកាតូលិកចំនួនបី។
សហគមន៍គ្រិស្តសាសនាស្រីលង្កា ត្រូវបានគេចាត់ទុកថាកម្លាំងបង្រួបបង្រួមជាតិសាសន៍ ព្រោះគេសង្កេតឃើញមានអ្នកកាន់សាសនាគ្រិស្ត ខ្លះ ដើមកំណើតតាមូល និងខ្លះជាលង្កា ដែលជាជាតិពិន្ទុភាគច្រើនក្នុងប្រទេស។ ប៉ុន្តែអ្នកកាន់សាសនាគ្រិស្តខ្លះ ក៏មានជាប់ឈ្មោះមិនល្អ ថាជាសហគមន៍ដែលបានគាំទ្រឱ្យមានការអង្កេតអន្តរជាតិពីបទប្រព្រឹត្តឧក្រិដ្ឋរបស់ក្រុមប្រដាប់អាវុធស្រីលង្កា ប្រឆាំងនឹងពួកឧទ្ទាមតាមូល ក្នុងសង្គ្រាមស៊ីវិល។ បើតាមរបាយការណ៍អាមេរិក សហគមន៍គ្រិស្តសាសនាស្រីលង្កាធ្លាប់រងការគំរាមកំហែងជាងមួយរយដងកាលពីឆ្នាំ២០១៧។ ហើយកាលពីឆ្នាំទៅ អាជ្ញាធរបានចេញក្រិត្យដាក់ប្រទេសក្នុងភាពអាសន្នអស់១២ថ្ងៃ ដើម្បីពន្លត់ភាពហិង្សារវាងក្រុមជ្រុលនិយមពុទ្ធសាសនាដែលជាប្រជាជនភាគច្រើន ទៅលើសហគមន៍អ៊ីស្លាមភាគតិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ