នាយករដ្ឋមន្ត្រីជប៉ុនផ្តើមទស្សនកិច្ចមួយជុំពិភពលោក ដើម្បីត្រៀមបើកជំនួបកំពូលG២០
លោក ស្ហ៊ីនហ្សូ អាបេ នាយករដ្ឋមន្ត្រីជប៉ុន ត្រូវផ្តើមទស្សនកិច្ចមួយជុំ ក្នុង៦ប្រទេស ចាប់ពីថ្ងៃទី ២២មេសា នេះ រហូតដល់ថ្ងៃទី ២៩មេសា ២០១៩។ លោកនឹងត្រូវទទួលជួបដោយប្រធានាធិបតីបារាំង អេម៉ាណុយអែល ម៉ាក្រុង នៅថ្ងៃអង្គារ។ បន្ទាប់មកលោកអាបេ នឹងបន្តទៅដំណើរទៅសហរដ្ឋអាមេរិក កាណាដា អ៊ីតាលី ប៊ែលហ្សិក និងស្លូវាគី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ដំណើរទស្សនកិច្ច របស់លោកស្ហ៊ីនហ្សូអាបេ ដែលធ្វើឡើងក្នុងក្របខ័ណ្ឌត្រៀមបើកជំនួបកំពូលហ្សេ២០ នៅជប៉ុន នៅខែមិថុនាខាងមុខ ត្រូវចាប់ផ្តើមពីប្រទេសបារាំង។ លោក អេម៉ាណុអែល ម៉ាក្រុង នឹងទទួលជួបលោកនាយករដ្ឋមន្ត្រីនៅវិមានអេលីហ្សេ នៅថ្ងៃអង្គារ បន្តដោយពិធីទទួលទានអាហារថ្ងៃត្រង់រួមគ្នាផង។ នេះបើតាមការគូសបញ្ជាក់របស់វិមានប្រធានាធិបតីបារាំង។ ប៉ុន្តែជំនួបរវាងមេដឹកនាំទាំងពីរ ប្រព្រឹត្ត ក្នុងបរិបទដ៏រសើបមួយ បង្កឡើងដោយសំណុំរឿងលោក កាឡូស ហ្គូន។ អតីតប្រធានក្រុមហ៊ុនរថយន្តរឺណូ និងនីសាន់ កំពុងជាប់ឃុំនៅជប៉ុន និងទើបត្រូវបានតុលាការតូក្យូ ធ្វើការចោទប្រកាន់ជាថ្មី ទីបួន នៅថ្ងៃចន្ទនេះ បទរំលោភទំនុករបស់ក្រុមហ៊ុននីសាន់។
យ៉ាងណាក៏ដោយ ក៏បើតាមវិមានអេលីហ្សេ ដំណើរមកដល់របស់លោក អាបេ ជាឱកាសល្អ នាំជប៉ុនប្រធានហ្សេ២០ និងបារាំងជាប្រធានហ្សេ៧ បានចាប់ដៃសហការគ្នាគិតគូរអំពីអាទិភាពសំខាន់ៗនៃការរៀបចំជំនួបកំពូលប្រចាំឆ្នាំ ដោយជប៉ុនត្រូវទទួលធ្វើនៅចុងខែមិថុនា ឯបារាំងនៅចុងខែសីហា។
ប្រធានាធិបតីបារាំង ចង់ពង្រឹងការផ្តោះប្តូរទ្វេ លើចំណុចបី ៖ កិច្ចសហប្រតិបត្តិការក្នុងតំបន់ប៉ាស៊ីហ្វិក ភាពជាដៃគូឧស្សាហកម្មនិងកិច្ចសហប្រតិបត្តិការសេដ្ឋកិច្ច និងចុងក្រោយគឺបន្តការផ្តោះប្តូរវប្បធម៌ ដោយគ្រោងបើកវគ្គវប្បធម៌បារាំងនៅជប៉ុន បន្តពីវគ្គវប្បធម៌ជប៉ុននៅបារាំង ក្នុងឆ្នាំ២០១៨។
ជាមួយអាមេរិកវិញ ដំណើរទស្សនកិច្ចនេះ ប្រព្រឹត្តចំពេលដែលតូក្យូនិងវ៉ាស៊ីនតោន បានចាប់ផ្តើមចរចាពាណិជ្ជកម្ម ស្វែងរកកិច្ចព្រមព្រៀងពាណិជ្ជកម្មទ្វេភាគី និងក្នុងខណៈដែលលោកដូណាល់ ត្រាំ គំរាមចង់យកពន្ធនាំចូលលើវិស័យរថយន្ត។ ប៉ុន្តែលោក ត្រាំ ក៏បានបង្ហាញឆន្ទៈចង់ធ្វើដំណើរទៅជប៉ុននាដើមខែក្រោយនេះដែរ ដើម្បីបានក្លាយជាប្រធានាធិបតីបរទេសដំបូង ដែលនឹងជួបព្រះចៅអធិរាជថ្មីរបស់ជប៉ុន គឺព្រះចៅ ណារូហ៊ីតូ ដែលត្រូវឡើងស្នងរាជពីបិតា នៅថ្ងៃទី១ឧសភា២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ