អង្គការRSF៖ ការស្អប់រើសអើងជំរុញឲ្យមានអំពើហិង្សាកាន់តែច្រើនទៅលើអ្នកកាសែត
ចុះផ្សាយនៅថ្ងៃ៖
ស្តាប់ - ០៧:២៩
ទិវាសេរីភាពសារព័ត៌មានពិភពលោក ឆ្នាំនេះ ប្រារព្ធធ្វើឡើងនៅក្នុងបរិបទដែលពិភពលោកកាន់តែគ្រោះថ្នាក់ សម្រាប់អ្នកសារព័ត៌មាន។ នៅក្នុងរបាយការណ៍ប្រចាំឆ្នាំរបស់ខ្លួន ដែលចេញផ្សាយ នៅថ្ងៃព្រហស្បតិ៍ម្សិលមិញ អង្គការអ្នកកាសែតគ្មានព្រំដែនបានវាយតម្លៃ សិទ្ធិសេរីភាពសារព័ត៌មាននៅក្នុងពិភពលោក កាន់តែធ្លាក់ចុះ ព្រោះថា គ្រោះថ្នាក់ ហើយនិងកម្រិតស្អប់អ្នកកាសែតបានកើនឡើងដល់កម្រិតមួយខ្ពស់ មិនធ្លាប់មានពីមុនមក។ តើអ្វី ជាកត្តាសំខាន់ ធ្វើឲ្យស្ថានភាពសេរីភាពសារព័ត៌មានក្នុងពិភពលោកធ្លាក់ចុះ?
នៅក្នុងឱកាស ពិភពលោក ប្រារព្ធទិវាសេរីភាពសារព័ត៌មាន នៅថ្ងៃទី ៣ឧសភា នេះ អង្គការអ្នកកាសែតគ្មានព្រំដែន RSF បានចេញផ្សាយរបាយការណ៍សម្រាប់ឆ្នាំ ២០១៩ ដែលនៅក្នុងនោះ អង្គការបានលើកនិយាយពី សេរីភាពសារព័ត៌មាន កាន់តែធ្លាក់ចុះអាក្រក់ នៅក្នុងពិភពលោក។
ជាទូទៅ អ្នកកាសែតលែងបានធ្វើការក្នុងលក្ខខណ្ឌដ៏ល្អប្រសើរទៀតហើយ។ ក្នុងពិភពលោក តាំងពីអាហ្វ្រិក អាស៊ី អឺរ៉ុប រហូតដល់ទ្វីប អាមេរិក អ្នកកាសែតធ្វើការក្នុងភាពភ័យខ្លាច រងការគំរាមកំហែង ដល់អាយុជីវិត ឬប្រឈមនឹងការចាប់ដាក់ពន្ធនាគារ ដោយសារតែការងាររបស់ពួកគេ។ ការងារដែលគោលដៅតែមួយគត់ គឺផ្តល់ព័ត៌មានមិនលំអៀង និងការពិត។ អ្នកកាសែតដែលធ្វើការស៊ើបអង្កេត ទៅលើអំពើពុករលួយ ការលួចគេចពន្ធ ការកាប់ព្រៃឈើ ឬបទឧក្រិដ្ឋ ជាក្រុម បើមិនត្រូវប្រឈមនឹងការចាប់ដាក់ពន្ធនាគារ ក៏ត្រូវស្លាប់ បាត់បង់ជីវិត ឬត្រូវគេតាមធ្វើបាប មិនឲ្យរស់នៅបានសុខស្រួលនោះទេ។
អ្នកកាសែត យ៉ាងតិច ៩៥នាក់ត្រូវគេសម្លាប់ ចំណែក អ្នកកាសែត ២៥១នាក់ ត្រូវចាប់ដាក់ពន្ធនាគារ
តាមរបាយការណ៍របស់អង្គការ សហព័ន្ធអន្តរជាតិនៃអ្នកសារព័ត៌មាន នៅឆ្នាំ ២០១៨ មានអ្នកកាសែត យ៉ាងតិច ៩៥នាក់ ត្រូវបានគេសម្លាប់ នៅពេលពួកគេបំពេញការងារយកព័ត៌មាន។ ចំនួននេះតិចណាស់បើប្រៀបធៀបនឹងឆ្នាំ ២០០៦ ដែលមានអ្នកកាសែត ដល់ទៅ ១៥៥នាក់បានស្លាប់ ប៉ុន្តែ យ៉ាងណាក៏ដោយវានៅតែកើនឡើងច្រើន បើប្រៀបធៀបនឹងឆ្នាំ ២០១៧។ ប្រជាភិថុត ការរើសអើង ស្អប់អ្នកកាសែត អំពើពុករលួយ ហើយនិងបទឧក្រិដ្ឋ គឺជាកត្តាសំខាន់ រួមផ្សំ ធ្វើឲ្យ អ្នកកាសែតត្រូវគេលួចសម្លាប់ ក្នុងពេលប្រកបការងារស៊ើបអង្កេតរបស់ពួកគេ។ អង្គការ សហព័ន្ធអន្តរជាតិនៃអ្នកសារព័ត៌មាន បានវាយតម្លៃថា អ្នកកាសែតដែលត្រូវគេសម្លាប់ ដោយសារតែការងាររាយការណ៍ពីសង្គម ឬប្រទេស របស់ពួកគេ គឺ មានចំនួនច្រើនជាងអ្នកកាសែត ដែលស្លាប់នៅក្នុងសមរភូមិសង្រ្គាមទៅទៀត។
នៅត្រង់ចំណុចនេះ អង្គការអ្នកកាសែតគ្មានព្រំដែនកត់សំគាល់ឃើញ ដូចគ្នា ព្រោះថា នៅឆ្នាំ ២០១៨ គឺ គំនិតស្អប់អ្នកកាសែត រហូតរាលដាលទៅជាអំពើហិង្សា ដែលបានបង្កឲ្យមានភាពភ័យខ្លាច ជាពិសេស សម្រាប់អ្នកដែលមានអាជីព ជាអ្នកយកព័ត៌មាន។ បរិយាកាសស្អប់ មិនទុកចិត្តអ្នកកាសែត ដែលបង្កើតឡើងដោយក្រុមអ្នកនយោបាយ និងមេដឹកនាំប្រទេសតែម្តង ដែល បានជំរុញឲ្យកើតមានអំពើហិង្សា ក្នុងទ្រង់ទ្រាយធំ និងធ្ងន់ធ្ងរ ទៅលើអ្នកកាសែត។ គេបានលើកយកករណីសម្លាប់ស្រ្តីអ្នកកាសែត នៅប្រទេសអង់គ្លេស ដោយសារស្នាដៃរបស់ក្រុមជ្រុលនិយម នៅអៀរឡង់ខាងជើង ឬ ការបាញ់សម្លាប់អ្នកកាសែត អាមេរិកាំង បួននាក់ នៅMaryland ប្រទេសអាមេរិក កាលពីឆ្នាំមុន។ នៅមុនពេលចូលទៅបាញ់រះសម្លាប់អ្នកកាសែត ខ្មាន់កាំភ្លើងបានបង្ហោះ ចែកចាយ សារស្អប់អ្នកកាសែត ពេញបណ្តាញសង្គមតែម្តង។
បរិយាកាសរើសអើង ស្អប់អ្នកកាសែត កើនឡើងនៅតំបន់ដែលធ្លាប់តែបរិយាកាសល្អសម្រាប់អ្នកកាសែត
សេរីភាពសារព័ត៌មានធ្លាក់ចុះ នៅក្នុងតំបន់ដែលធ្លាប់តែមានបរិយាកាសល្អ សម្រាប់អ្នកសារព័ត៌មាន។ នេះជាកង្វល់ចំបងរបស់អង្គការតាមដានសេរីភាពសារព័ត៌មានក្នុងពិភពលោក។ នៅក្នុងបញ្ជីចំណាត់ថ្នាក់ស្តីពីសេរីភាពសារព័ត៌មានរបស់ខ្លួន អង្គការអ្នកកាសែតគ្មានព្រំដែន បានចាត់ថ្នាក់អាមេរិកក្នុងលេខរៀងទី ៤៨ ពោលគឺធ្លាក់ចុះ អស់៣ថ្នាក់ ដោយសារតែបរិយាកាស ស្អប់ រើសអើងទៅលើអ្នកកាសែត ដែលលោកដូណាល់ ត្រាំបានបង្កើតឡើងចាប់តាំងពីដើមអាណត្តិរបស់លោក។ តាមអង្គការអ្នកកាសែតគ្មានព្រំដែន នេះជាលើកដំបូង ដែល អ្នកកាសែតអាមេរិកប្រឈមនឹងការគំរាមសម្លាប់ច្រើនមិនធ្លាប់មាន។ ដោយសារតែការគំរាមសម្លាប់ អ្នកកាសែតអាមេរិកកាន់តែច្រើនបានជួលក្រុមហ៊ុនឯកជន ឲ្យធានាការពារសន្តិសុខឲ្យពួកគេ។
ងាកមកនិយាយពីអឺរ៉ុបវិញ បើទោះបីជាប្រទេសនៅអឺរ៉ុបខាងជើងមួយចំនួន ជាប់ចំណាត់ថ្នាក់ល្អ ជាងគេ ដូចជា ន័រវែស ជាប់ចំណាត់លេខ១ ខាង គោរពសេរីភាពសារព័ត៌មាន នាំមុខប្រទេសហ្វាំងឡង់ ប្រទេសនៅអឺរ៉ុបខាងត្បូង ខាងលិច ឬខាងកើត ឯណោះវិញ កំពុងមានបរិយាកាសមិនសូវល្អប៉ុន្មានទេ សម្រាប់អ្នកកាសែត។
នៅបារាំង ដោយសារតែចលនារបស់ក្រុមអាវកាក់លឿង ដែលមិនជឿទុកចិត្តលើបណ្តាញផ្សព្វផ្សាយ ដែលពួកគេចោទថា លំអៀងទៅលើរដ្ឋាភិបាល ក្រុមអ្នកកាសែតអាចប្រឈមគ្រប់ពេលវេលានឹងការវាយធ្វើបាប។ ពួកគេត្រូវពាក់មួកការពារសុវត្ថិភាព និងត្រូវមានអង្គរក្សជួយការពារ នៅពេលចុះទៅយកព័ត៌មាន ពីបាតុកម្មហិង្សា របស់ក្រុមអាវកាក់លឿង។ នៅប្រទេសម៉ាល់ អ្នកកាសែតត្រូវគេសម្លាប់ ចំណែក នៅហុងគ្រី គណបក្សកាន់អំណាច របស់លោកនាយករដ្ឋមន្រ្តី Viktor Orban តែងបដិសេធមិននិយាយជាមួយអ្នកកាសែត ដែលមិនធ្វើការឲ្យប្រព័ន្ធផ្សព្វផ្សាយដែលគាំទ្រខ្លួន។
អាស៊ីប៉ាស៊ីហ្វិក អួរអ័ព្ធដោយបរិយាកាសមិនល្អសម្រាប់អ្នកកាសែត
ការឃោសនារបស់មេដឹកនាំផ្តាច់ការ ការកំណត់ដែនធ្វើការ មិនហ៊ានសរសេររិះគន់ ដោយអ្នកកាសែត ខ្លួនឯង ការបំភិតបំភ័យ អំពើហិង្សាទៅលើរាងកាយ ហើយនិងនិន្នាការសរសេរប្រមាថតាមបណ្តាញសង្គម។ តំបន់អាស៊ីប៉ាស៊ីហ្វិក ប្រមូលផ្តុំទៅដោយចំណុចអវិជ្ជមានសម្រាប់អ្នកកាសែត។ នៅអាហ្វហ្កានីស្ថាន ប៉ាគីស្ថាន និងឥណ្ឌា អ្នកកាសែតជាគោលដៅសម្លាប់របស់ក្រុមភេរវនិយម ក្រុមជ្រុលនិយម ហិណ្ឌូជាដើម។ តាមអង្គការអ្នកកាសែតគ្មានព្រំដែន ព័ត៌មានក្លែងក្លាយ គឺជាបញ្ហាសំខាន់ប្រចាំតំបន់អាស៊ីប៉ាស៊ីហ្វិក។ នៅភូមា បណ្តាញសង្គមត្រូវបានគេប្រើដើម្បី ចែកចាយសារជាតិនិយម ស្អប់ជនជាតិភាគតិចរ៉ូហ៊ីងយ៉ាង។ ដោយសារតែបញ្ហាជាតិនិយមនេះ អ្នកកាសែតភូមារបស់ទីភ្នាក់ងារReuters ២នាក់ ត្រូវតុលាការភូមាផ្តន្ទាទោសឲ្យជាប់ពន្ធនាគារ៧ឆ្នាំ ដោយសារតែពួកគេស៊ើបអង្កេតលើករណីសម្លាប់រង្គាលទៅលើជនជាតិរ៉ូហ៊ីងយ៉ា។
មួយវិញទៀត បើតាមការកត់សំគាល់របស់អង្គការអ្នកកាសែតគ្មានព្រំដែន នៅក្រោមឥទ្ធិពលរបស់មហាអំណាចចិន ដែលជាប់ចំណាត់មិនល្អសម្រាប់សេរីភាពសារព័ត៌មាន គឺជាប់លេខរៀងទី ១៧៧ ក្នុងចំណោមប្រទេស ១៨០ ប្រទេសសិង្ហបុរី ឬកម្ពុជា ជាដើម ដែលជាប់ចំណាត់ថ្នាក់ទី ១៤៣ កំពុងមានបញ្ហា ដែលអ្នកកាសែត ដាក់បម្រាមខ្លួនឯង មិនហ៊ានសរសេរព័ត៌មានរិះគន់ ឬព័ត៌មានស៊ើបអង្កេតទៅលើករណីពុករលួយ ឬបទឧក្រិដ្ឋក្នុងប្រទេសរបស់ពួកគេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ