សង្រ្គាមពាណិជ្ជកម្ម៖អាមេរិក និងចិនចរចាលើកចុងក្រោយដើម្បីសម្រេចបានកិច្ចព្រមព្រៀងពាណិជ្ជកម្មរវាងគ្នា?
អាមេរិក និងចិនត្រៀមចរចាពាណិជ្ជកម្មលើកទី១១ រវាងគ្នារយៈពេល ២ថ្ងៃពីថ្ងៃព្រហស្បតិ៍នេះដល់ថ្ងៃសុក្រ ទី១០ ឧសភាក្នុងទីក្រុងវ៉ាស៊ីតោន។ ការបន្តជួបចរចាគ្នាពេលនេះបានធ្វើឡើង បន្ទាប់ប្រធានាធិបតីអាមេរិកលោកដូណាល់ ត្រាំបានប្រកាសព្រមានក្នុងថ្ងៃអាទិត្យ ទី៥ ឧសភាថា បើការចរចាលើកទី១១ នេះទទួលបរាជ័យ លោកនឹងដំឡើងពន្ធពី ១០% ទៅ ២៥% លើទឹកប្រាក់ ២០០ ០០០លានដុល្លារនៃការនាំទំនិញចិនចូលអាមេរិក។ ក្នុងថ្ងៃពុធ ទី៨ ឧសភា ពោលមួយថ្ងៃមុនការផ្តើមកិច្ចចរចា លោកត្រាំបានបញ្ជាក់ក្នុងន័យចំអកដាក់ចិនថា ការដែលក្រុមអ្នកចរចាចិនយល់ព្រមមកកាន់វ៉ាស៊ីនតោនជាថ្មីពេលនេះ គឺដើម្បីមកទទួលយកកិច្ចព្រមព្រៀងដែលចិនបានយល់ព្រមតាមការទាមទាររបស់អាមេរិកនៅក្នុងការចរចាលើកមុនៗ។
ចុះផ្សាយនៅថ្ងៃ៖
ស្តាប់ - ០២:២៦
គេនៅមិនទាន់ដឹងថា តើការចរចាពាណិជ្ជកម្មរវាងអាមេរិក និងចិនលើកទី១១ រយៈពេល ២ថ្ងៃនឹងហុចលទ្ធផលយ៉ាងណាទេ។ អ្វីដែលគេដឹង និងបើទោះបីជាមានការព្រមានពីលោកដូណាល់ ត្រាំក៏ដោយ ក៏ចិននៅតែប្រកាន់ជំហរសម្របសម្រួលដោយសុខចិត្តធ្វើដំណើរទៅជួបអាមេរិកក្នុងទីក្រុងវ៉ាស៊ីតោនដូចដែលបានគ្រោងទុក។ ការប្រកាន់ជំហររបៀបនេះមកពីក្រុងប៉េកាំងចង់បង្ហាញប្រាប់ក្រុងវ៉ាស៊ីនតោនថា ខ្លួនមិនចាញ់ការសម្លុតគំរាម និងសុខចិត្តធ្វើសម្បទានឲ្យលោកត្រាំដោយងាយៗនោះទេ។ តែជាថ្មីម្តងទៀត លោកត្រាំបានបញ្ចេញប្រតិកម្មបែបចំអកដាក់ចិនថា ចិនបានត្រឡប់មកកាន់អាមេរិកជាថ្មីពេលនេះដើម្បីមកទទួលយកកិច្ចព្រមព្រៀងដែលចិនបានយល់ព្រមតាមការទាមទាររបស់អាមេរិកនៅក្នុងការចរចាលើកមុនៗ។
អ្វីដែលលោកត្រាំបានលើកឡើងនេះគឺដូចគ្នានឹងការលើកឡើងរបស់អ្នកតំណាងក្រសួងពាណិជ្ជកម្ម និងរដ្ឋមន្រ្តីក្រសួងហិរញ្ញវត្ថុអាមេរិកក្នុងថ្ងៃចន្ទ ទី៦ ឧសភា។ តែបញ្ហានៅត្រង់ថា ចិនហាក់មិនបានបញ្ជាក់លើព័ត៌មាននេះ និងបានអះអាងជាថ្មីថា ឧបនាយករដ្ឋមន្រ្តីចិនលោកលីវ ហេដែលជាអ្នកដឹកនាំក្រុមអ្នកចរចាចិននឹងបន្តជជែក ត ថ្លៃជាមួយភាគីអាមេរិកលើប្រធានរឿងខ្វែងគំនិតគ្នារយៈពេល ២ថ្ងៃក្នុងទីក្រុងវ៉ាស៊ីនតោន។ ចំណែកកាសែតផ្លូវការចិនជាភាសាអង់គ្លេសឈ្មោះ Global Times បានឆ្លៀតស៊កថា រដ្ឋអំណាចចិនមិនដែលបានអះអាងជាមុនថានឹងមានកិច្ចព្រមព្រៀងមួយឡើយ និងថា បើការចរចាទទួលបរាជ័យ ចិននៅតែរឹងមាំ និងមានកម្លាំងគ្រប់គ្រាន់ដើម្បីទប់ទល់។
គួររម្លឹកថា ក្រៅពីចង់ឲ្យមានសមភាពនៃការដោះដូរពាណិជ្ជកម្មរវាងអាមេរិក និងចិន ក៏នៅមានប្រធានរឿងជាច្រើនទៀតដែលអាមេរិកបានលើកទៅចរចាជាមួយចិន រួមមាន ការផ្ទេរបច្ចេកវិទ្យាដោយបង្ខំ សិទ្ធិនៃកម្មសិទ្ធិបញ្ញា ចោរព័ត៌មានវិទ្យា កសិកម្ម ឬមួយក៏ការផ្តល់ប្រាក់ឧបត្ថម្ភធនឲ្យក្រុមហ៊ុន រោងចក្ររបស់រដ្ឋជាដើម។ គេនៅមិនទាន់ដឹងថា តើការចរចាលើកទី១១ រយៈពេល ២ថ្ងៃរវាងអាមេរិក និងចិនដែលគ្រប់គ្នាចាត់ទុកជាទឹកផ្តាច់ព្រ័ត្រនឹងទទួលបានផ្លៃផ្កាឬអត់ទេ។ អ្វីដែលគេដឹង ថ្ងៃសុក្រ ទី១០ ឧសភាដែលលោកត្រាំបានកំណត់ជាថ្ងៃដំឡើងពន្ធពី ១០% ទៅ ២៥% លើទឹកប្រាក់ ២០០ ០០០លានដុល្លារនៃការនាំទំនិញចិនចូលអាមេរិក ត្រូវបានលោកត្រាំរក្សាទុកដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ