ការប្រែប្រួលអាកាសធាតុ កំពុងក្លាយជាប្រធានបទស្នូលរបស់អង្គការសហប្រជាជាតិ
ចុះផ្សាយនៅថ្ងៃ៖
ស្តាប់ - ០៦:០៩
លោកអគ្គលេខាធិការអង្គការសហប្រជាជាតិ អង់តូនីញ៉ូ ហ្គូទែរស៍ (Antonio Guterres) ដែលកំពុងចាប់ផ្តើមបំពេញទស្សនកិច្ចមួយជុំ នៅតំបន់ប៉ាស៊ីហ្វិកខាងត្បូង បានអះអាងពិភពលោកកំពុងដើរយឺតជាងការប្រែប្រួលអាកាសធាតុ។ កម្មវត្ថុនៃការទប់កំរិតសីតុណ្ហភាពផែនដីមិនឱ្យឡើងលើសពី១,៥អង្សា ទំនងជាមិនអាចសម្រេចដូចបំណងឡើយ។ បើដូច្នេះមែន តើអង្គការសហប្រជាជាតិត្រូវធ្វើយ៉ាងណា ?
លោកអគ្គលេខាធិការអង្គការសហប្រជាជាតិ កំពុងស្ថិតនៅក្នុងប្រទេសនូវែលហ្សេឡង់ នៅថ្ងៃអាទិត្យនេះ សម្រាប់រយៈពេលបីថ្ងៃ។ បន្ទាប់មកលោកនឹងបន្តដំណើរទៅកាន់បណ្តាប្រទេសងាយរងគ្រោះជាកូនកោះតូចៗក្នុងមហាសមុទ្ទប៉ាស៊ីហ្វិក ៖ ហ្វីជី ទូវ៉ាឡូ និងវ៉ានួតូ ទៀត។
ដំណើរទស្សនកិច្ចមួយជុំរបស់លោកអគ្គលេខាធិការ នៅតំបន់ប៉ាស៊ីហ្វិកខាងត្បូង ធ្វើឡើងក្នុងទស្សនៈវិស័យនៃការរៀបចំមហាសន្និបាតអង្គការសហប្រជាជាតិ ស្តីអំពីអាកាសធាតុដែលនឹងប្រព្រឹត្តទៅថ្ងៃទី ២៣កញ្ញា ដើម្បីបង្កើនកិច្ចខិតខំប្រឹងប្រែងប្រយុទ្ធប្រឆាំងនឹងការប្រែប្រួលអាកាសធាតុ។
ការប្រែប្រួលអាកាសធាតុដែលកំពុងដើរលឿនជាងមនុស្ស នេះបើតាមប្រសាសន៍របស់លោកនៅចំពោះមុខអ្នកសារព័ត៌មាននូវែលហ្សេឡង់ ព្រឹកមិញ ដោយបន្ថែមទៀតថា “យើងឃើញនៅគ្រប់ទី គ្រប់កន្លែង យ៉ាងជាក់ច្បាស់ថា យើងកំពុងដើរខុសទិសដៅដែលមានកំណត់ក្នុងកិច្ចព្រមព្រៀងប៉ារីស កំរិតការឡើងកម្តៅសីតុណ្ហភាពហើយ ! យើងកំពុងតែប្រយុទ្ធចាញ់អាកាសធាតុ ! ប្រសិនបើគ្មានការបត់និន្នាការទេ នោះ សោកនាដកម្មនឹងកើតមានសម្រាប់ពិភពលោកទាំងមូល”។ ហេតុដូច្នេះហើយបាន អង្គការប្រជាជាតិមិនអាចមិនអើពើបានឡើយ។ លោកយល់ថា ការប្រែប្រួលអាកាសធាតុដែលជា បញ្ហាប្រឈមដ៏ចម្បងក្នុងសម័យនេះ កំពុងក្លាយជាយុទ្ធនាការស្នូលរបស់អង្គការហើយ។
កុំមកតែពាក្យ
ក្រៅអំពីទស្សនកិច្ចនេះ ដែលអាចផ្តល់គំនិតថ្មី ស៊ីជម្រៅ និងវែងឆ្ងាយ ឱ្យសន្និសីទ លោកអគ្គលេខាធិការអង្គការសហប្រជាជាតិ បានប្រកាសជូនដំណឹងរួចជាស្រេចទៅហើយ ការបើកជំនួបប្រជុំមួយទៀត នៅថ្ងៃទី ៣០មិថុនា ដល់ថ្ងៃទី ១ កក្កដា នៅប្រទេសអេមីរ៉ាត់អារ៉ាបរួម ដើម្បីប្រមូលសំណើ ឬដំណោះស្រាយណាដែលល្អប្រសើរជាងគេ ក្នុងការប្រយុទ្ធប្រឆាំងនឹងការឡើងកម្តៅសីតុណ្ហភាពផែនដី។
នៅក្នុងលិខិតអញ្ជើញ លោកហ្គូទែរស៍ បានបញ្ជាក់ឱ្យប្រទេសជាសមាជិក កុំមកប្រជុំ តែជាមួយនឹងក្រដាសសុន្ទរកថាអី គឺត្រូវមកជាមួយនឹងផែនការច្បាស់លាស់ និងជាផែនការដែលអាចសម្រេច កាត់បន្ថយឧស្ម័នផ្ទះកញ្ចក់ កំរិត៤៥% ក្នុងរយៈពេល១០ឆ្នាំខាងមុខ និង កាត់បន្ថយទាំងស្រុងការបញ្ចេញឧស្ម័នបំពុលបរិយាកាស នៅឆ្នាំ២០៥០។
សន្និសីទអង្គការសហប្រជាជាតិស្តីអំពីអាកាសធាតុ ដែលជាផែនការរបស់លោកអគ្គលេខាធិការ មានសំណាងនឹងអាចសម្រេចលទ្ធផល បើទោះបីជាអាមេរិកមានជំហរបញ្ច្រាសស្រកីពីគេយ៉ាងណាក៏ដោយ ព្រោះបរិបទពេលនេះខុសពីកាលពី៥ឆ្នាំ ឬ១០ឆ្នាំមុន ដែលប្រទេសនីមួយៗប្រចាំគ្នា សំលឹងមើលប្រទេសជិតខាងថាធ្វើបានអ្វីខ្លះសិនបានធ្វើតាមក្រោយ។ តែពេលនេះ ពិភពលោកចាប់ផ្តើមមានស្មារតី ដឹងអំពីភាពបន្ទាន់នៃការបញ្ចេញសកម្មភាពហើយ។ នេះបើតាមអន្តរការីរបស់អង្គការសហប្រជាជាតិទទួលបន្ទុកផ្នែកអាកាសធាតុ។
ភាពកន្តើយរបស់សហរដ្ឋអាមេរិក
ប៉ុន្តែឆន្ទៈដ៏មុះមុតរបស់លោក ហ្គូទែរ ក្នុងការប្រយុទ្ធប្រឆាំងនឹងប្រែប្រួលអាកាសធាតុ ផុសឡើងក្នុងកាលៈទេសៈដែលសហរដ្ឋអាមេរិក ម្ចាស់វិភាគទានផ្នែកហិរញ្ញវត្ថុដ៏សំខាន់លំដាប់ទីមួយរបស់អង្គការសហប្រជាជាតិ មិនទទួលស្គាល់ការពិតនៃបម្រែបម្រួលអាកាសធាតុនិងចង់សើរើរាល់គ្រប់កិច្ចសន្យាពាក់ព័ន្ធទៀត។
ក្រៅពីដកខ្លួនចេញពីកិច្ចព្រមព្រៀងអាកាសធាតុក្រុងប៉ារីស កាលពីសប្តាហ៍មុនអាមេរិកបានបដិសេធមិនត្រូវការដឹងឮនិងឃើញពាក្យ "បម្រែបម្រួលអាកាសធាតុ” រហូតធ្វើឱ្យកិច្ចប្រជុំរបស់ក្រុមប្រទេសនៅតំបន់អាកទិកមិនអាចចេញសេចក្តីថ្លែងការណ៍រួមបាន។ ជាងនេះទៅទៀត លើវិស័យការទូត តាំងពីឯកអគ្គរដ្ឋទូតអាមេរិកប្រចាំអង្គការសហប្រជាជាតិ បានសុំលាលែងចេញពីតំណែងកាលពីខែធ្នូមក អាមេរិកពុំទាន់មានតំណាងថ្មីតែងតាំងជាផ្លូវការនៅឡើយទេ។ លោកប្រធានាធិបតីអាមេរិកបានជ្រើសរើស លោកស្រីKelly Knight Craft មកជំនួសហើយ តែពុំទាន់ចូលកាន់តំណែងទេ ព្រោះព្រឹទ្ធសភាមិនទាន់អនុម័តអនុញ្ញាត។ ប៉ុន្តែ លោកស្រី មានស្វាមីជាអ្នកឧស្សាហកម្មក្នុងវិស័យធ្យូងថ្ម លោកស្រី ធ្លាប់បានបញ្ជាក់ថាជឿ លើអ្នកវិទ្យាសាស្ត្រទាំងសងខាង ស្តីពីឥទ្ធិពលនៃការឡើងកម្តៅអាកាសធាតុចំពោះមនុស្ស តែគ្មានកន្លែងណាបញ្ជាក់ថាលោកស្រី មានជំហរត្រូវជាមួយលោកអគ្គលេខាធិការអង្គការសហប្រជាជាតិឡើយ។
ការងើយកន្តើយរបស់អាមេរិកចំពោះបញ្ហាអាកាសធាតុ បានធ្វើឱ្យទុកកន្លែងឱ្យចិន បានក្លាយជាតួអង្គសំខាន់ក្នុងការធានារ៉ាប់រងអាយុជីវិតកិច្ចព្រមព្រៀងប៉ារីស និងក្លាយជាតួអង្គដែលមិនអាចខ្វះបានក្នុងការចរចាស្តីអំពីអាកាសធាតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ