តៃវ៉ាន់៖សភាអនុម័តច្បាប់ឲ្យមានអាពាហ៍ពិពាហ៍រវាងអ្នកស្រឡាញ់ភេទដូចគ្នា
តៃវ៉ាន់បានក្លាយជាប្រទេសអាស៊ីដំបូងគេដែលបានអនុញ្ញាតឲ្យមនុស្សស្រឡាញ់ភេទដូចគ្នាអាចរៀបការជាមួយគ្នាបាន។ នៅថ្ងៃសុក្រ ទី១៧ ឧសភា សភាតៃវ៉ាន់បានអនុម័យលើច្បាប់មួយដែលអនុញ្ញាតឲ្យមានអាពាហ៍ពិពាហ៍រវាងអ្នកស្រឡាញ់ភេទដូចគ្នា។ ទន្ទឹមគ្នានេះ ប្តី ប្រពន្ធមានភេទដូចគ្នាទាំងពីរក៏អាចសុំចុះឈ្មោះក្នុងបញ្ចីអត្រានុកូលដ្ឋានអាពាហ៍ពិពាហ៍ផងដែរ។ អ្វីជាការកត់សម្គាល់ សភាតៃវ៉ាន់បានអនុម័តច្បាប់មួយនេះចំថ្ងៃទិវាពិភពលោកប្រឆាំងនឹងការស្រឡាញ់ភេទដូចគ្នា។
ចុះផ្សាយនៅថ្ងៃ៖
ស្តាប់ - ០២:១៨
ជាមួយនឹងសម្លេងគាំទ្រភាគច្រើន សភាតៃវ៉ាន់បានអនុម័តលើច្បាប់មួយដែលអនុញ្ញាតឱ្យគូស្នេហ៍មានភេទដូចគ្នាអាចរៀបការបង្កើតជាគ្រួសារអចិន្រ្តៃយ៍ផ្តាច់មុខជាមួយគ្នាបាន។ បន្ទាប់មក សភាតៃវ៉ាន់ក៏បានបោះឆ្នោតយល់ព្រមឲ្យពួកគេអាចសុំចុះឈ្មោះក្នុងបញ្ចីអត្រានុកូលដ្ឋានអាពាហ៍ពិពាហ៍ផងដែរ។ ការបោះឆ្នោតរបស់សភាលើច្បាប់មួយនេះបានធ្វើឡើង ២ឆ្នាំក្រោយពីតុលាការធម្មនុញ្ញបានចេញសេចក្តីសម្រេចមួយក្នុងខែឧសភា ឆ្នាំ ២០១៧ ដែលបញ្ជាក់ថា ការហាមមនុស្សស្រឡាញ់ភេទដូចគ្នាមិនឲ្យរៀបអាពាហ៍ពិពាហ៍ជាការប្រឆាំងនឹងច្បាប់រដ្ឋធម្មនុញ្ញ។ កាលណោះ តុលាការធម្មនុញ្ញបានទុកពេលរហូតដល់ថ្ងៃទី២៤ ឧសភា ឆ្នាំ ២០១៩ ដើម្បីឲ្យរដ្ឋាភិបាលកែច្បាប់។
សម្រាប់ក្រុមសមាគមការពារអ្នកស្រឡាញ់ភេទដូចគ្នា គឺជាជោគជ័យមួយដែលមានតែការសាទរ។ គួររម្លឹកថា ក្រុមអ្នកអភិរក្សនិយមដែលជាគណបក្សប្រឆាំងបានធ្វើសកម្មភាពគ្រប់យ៉ាងដើម្បីប្រឆាំងនឹងអាពាហ៍ពិពាហ៍សម្រាប់ទាំងអស់គ្នា។ ក្នុងខែវិច្ឆិកា ឆ្នាំ ២០១៨ ពួកគេបានរៀបចំឲ្យមានការបោះឆ្នោតប្រជាមតិមួយចំនួនដែលសម្លេងភាគច្រើនបានយល់ឃើញថា អាពាហ៍ពិពាហ៍អាចធ្វើឡើងតែរវាងភេទពីរខុសគ្នាប៉ុណ្ណោះ ពោលរវាងស្រ្តី និងបុរស។ តែក្នុងថ្ងៃសុក្រ ទី១៧ ឧសភាដែលជាទិវាពិភពលោកប្រឆាំងនឹងការស្រឡាញ់ភេទដូចគ្នា និងជិត ១សប្តាហ៍មុននឹងថ្ងៃឱសានវាទរបស់តុលាការធម្មនុញ្ញ សភាបានពិនិត្យលើសេចក្តីព្រាងច្បាប់ ៣ ដើម្បីដោះស្រាយរឿងអ្នកស្រឡាញ់ភេទដូចគ្នា។
ទីបំផុត សេចក្តីព្រាងច្បាប់មួយដែលគ្រប់គ្នាទន្ទឹងរងចាំមានពាក្យ « អាពាហ៍ពិពាហ៍ » ត្រូវបានអនុម័តជាផ្លូវការ។ « យើងមានសំណាងសរសេរប្រវត្តិសាស្រ្ត និងបង្ហាញពិភពលោកថា តម្លៃនៃភាពចម្រើនទៅមុខអាចចាក់ឫសនៅក្នុងសង្គមអាស៊ីខាងកើត » នេះជាសំណេររបស់ប្រធានាធិបតីតៃវ៉ាន់លោកស្រីសៃ អ៊ីនវេននៅក្នុងបណ្តាញសង្គម Twitter មុននឹងការបោះឆ្នោតរបស់សភា។ គួរបញ្ជាក់ថាក្នុងរយៈពេល ១០ឆ្នាំចុងក្រោយនេះ តៃវ៉ាន់បានក្លាយជាសង្គមមួយដែលមានគំនិតចម្រើននិយមខ្លាំងនៅអាស៊ីស្តីពីសិទ្ធិរបស់អ្នកស្រឡាញ់ភេទដូចគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ