សហរដ្ឋអាមេរិក៖ក្រុមហ៊ុន Google ប្រកាសបិទបញ្ចប់កិច្ចសហប្រតិបត្តិការជាមួយក្រុមហ៊ុន Huawei
នៅសហរដ្ឋអាមេរិក ក្រុមហ៊ុន Google បានប្រកាសឲ្យដឹងនាថ្ងៃអាទិត្យ ទី១៩ ឧសភាពីគម្រោងព្យួរកិច្ចសហប្រតិបត្តិការជាមួយក្រុមហ៊ុន Huawei។ ផ្ទាំងស៊ីបរបស់ក្រុមហ៊ុន Google ផ្តោតសំខាន់លើប្រព័ន្ធ Android ដែលកំពុងបំពាក់នៅក្នុង Smartphone ភាគច្រើនលើលោក ក្នុងនោះក៏មាន Huawei មួយដែរ។ វិធានការរបស់ Google ចំពោះ Huawei គឺបិទទ្វារមិនឲ្យអតិថិជនរបស់ Huawei បន្តប្រើកម្មវិធី Google ដូចយ៉ាង Gmail Google Maps និងការបន្ទាន់សម័យលើប្រព័ន្ធ Android។ ការសម្រេចរបស់ក្រុមហ៊ុន Google ពេលនេះបានធ្វើឡើង បន្ទាប់ពីប្រធានាធិបតីអាមេរិកលោកត្រាំបានចេញក្រឹត្យមួយហាមក្រុមហ៊ុនទូរគមនាគមន៍អាមេរិកាំងមិនឲ្យបន្តធ្វើជំនួញជាមួយក្រុមហ៊ុនទូរគមនាគមន៍បរទេសដែលបង្កហានិភ័យដល់សន្តិសុខជាតិ។
ចុះផ្សាយនៅថ្ងៃ៖ កែប្រែថ្ងៃទី៖
គេនៅទាន់ដឹងថា តើចំណាត់ការរបស់ក្រុមហ៊ុន Google ចំពោះក្រុមហ៊ុន Huawei នឹងមានកម្រិតត្រឹមណាទេ។ តែនៅក្នុងលិខិតមួយផ្ញើទៅឲ្យ AFP ក្រុមហ៊ុន Google បានធានាថា សេវា Google Play និង Google Play Protect នឹងបន្តដំណើរការធម្មតានៅលើឧបករណ៍ម៉ាក Huawei ដែលមានស្រាប់។ តែប្រភពមួយស្និទ្ធិនឹងសំណុំរឿងនេះបានបញ្ជាក់ថា Google អាចនឹងបន្តផ្តល់សេវាឲ្យអ្នកប្រើប្រាស់ទូរស័ព្ទដៃ ឬ Tablette ម៉ាក Huawei ផ្សេងទៀតតែ Version open source ប៉ុណ្ណោះ មានន័យថា ជាកម្មវិធីដែលមិនមែនផលិតដោយ Google ឬជាកម្មសិទ្ធិរបស់ Google ដូចជា Gmail ឬ Google Maps។
ចំណែកប្រភពមួយទៀតស្និទ្ធិនឹងសំណុំរឿងដូចគ្នានេះបានលើកឡើងថានៅក្នុងជំហានដំបូង កម្មវីធីទាំងអស់នេះនឹងត្រូវបន្តដំណើរការ។ តែមិនច្បាស់ថាទៅថ្ងៃអនាគត ក្រុមហ៊ុន Huawei នឹងបន្តបំពាក់ប្រព័ន្ធ Android នៅក្នុងទូរស័ព្ទដៃ ឬ Tablette របស់ខ្លួន ងាកទៅបំពាក់ប្រព័ន្ធផ្សេង ឬមួយក៏ស្រាវជ្រាវប្រព័ន្ធផ្តាច់មុខរបស់ខ្លួនឬយ៉ាងណាទេ។ ខណៈនេះ ក្រុមហ៊ុន Huawei មិនបានធ្វើអត្ថាធិប្បាយអ្វីលើវិធានការរបស់ក្រុមហ៊ុន Google ពេលនេះទេ។ នៅថ្ងៃសៅរ៍ ទី១៨ ឧសភា ស្ថាបនិក និងជាប្រធានក្រុមហ៊ុន Huawei លោក Ren Zhengfei បានធានាជាថ្មីថា ក្រុមហ៊ុនមិនបានធ្វើអ្វីខុសច្បាប់ និងថា ក្រឹត្យរបស់លោកត្រាំអាចនឹងមានផលវិបាកតិចតួចចំពោះ Huawei។
តែគេមិនត្រូវភ្លេចនិយាយទេថា ក្រុមហ៊ុនចិនមួយនេះបានទិញគ្រឿងអេឡិចត្រូនិក និងគ្រឿងបន្លាស់ច្រើនណាស់ពីបរទេស។ ក្នុងមួយឆ្នាំៗ Huawei បានចំណាយ ៦៧ ០០០លានដុល្លារដើម្បីទិញគ្រឿងអេឡិចត្រូនិក និងគ្រឿងបន្លាស់ពីបរទេស ក្នុងនោះ ចំណាយទិញពីក្រុមហ៊ុនអាមេរិកាំងចំនួន ១១ ០០០លានដុល្លារ នេះបើយោងតាមកាសែតប្រចាំថ្ងៃជប៉ុនឈ្មោះ Nikkei។ អ្វីដែលរដ្ឋបាលអាមេរិកបារម្ភ គឺខ្លាចក្រុមហ៊ុន Huawei ដែលមានវត្តមាននៅក្នុង ១៧០ប្រទេសលើលោក និងមានបុគ្គលិកជិត ១៩០ ០០០នាក់ជាមេរោគរបស់រដ្ឋាភិបាលចិន ឬអាចនិយាយបែបម្យ៉ាងទៀតថា ជាចារកិច្ចរបស់ក្រុងប៉េកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ