ស្តាប់ ថតទុក Podcast
  • 00h00 - 01h00 GMT
    កម្មវិធីព័ត៌មាន 17/08 00h00 GMT
  • 06h00 - 07h00 GMT
    កម្មវិធីព័ត៌មាន 17/08 06h00 GMT
  • 12h00 - 13h00 GMT
    កម្មវិធីព័ត៌មាន 17/08 12h00 GMT
អាស៊ី

តុលាការ​ធម្មនុញ្ញ​ថៃ រារាំង​ប្រមុខដឹកនាំ​បក្ស​ប្រឆាំង​ថៃ ដ៏​មាន​ប្រជាប្រិយភាព​មិន​ឲ្យ​ចូលសភា

media លោក​ថាណាថន ប្រធាន​បក្ស​ប្រឆាំងដ៏មាន​ប្រជាប្រិយភាព​ចាកចេញ​ពីប៉ុស្តិប៉ូលិស​នៅ​ខែ​មេសា ២០១៩ ©REUTERS/Athit Perawon

បន្ទាប់ពី​អវត្តមាន​អស់ជាច្រើន ឆ្នាំ ដោយសារ​រដ្ឋប្រហារ​យោធា កាលពី​ឆ្នាំ ២០១៤ សភា​ថៃ​ថ្មី​ត្រូវ​បើកទ្វារ​ប្រជុំ​ជាផ្លូវការ នៅ​ថ្ងៃ សុក្រ​នេះ ដោយ​គ្មាន​វត្តមាន​របស់​ប្រមុខ​បក្ស​ប្រឆាំង​ដ៏​មាន​ប្រជាប្រិយភាព។ កាលពី​ថ្ងៃ​ព្រហស្បតិ៍ ពោល​គឺ​នៅមួយ​ថ្ងៃ​មុនរដ្ឋ​​សភា​បើក​សម័យប្រជុំពេញអង្គ តុលាការ​រដ្ឋធម្មនុញ្ញ​ថៃ បាន​សម្រេច​បើក​ការស៊ើបអង្កេត​លើ​ពាក្យ​បណ្តឹង ប្រឆាំង លោក ថាណាថន មេដឹកនាំ​គណបក្ស​អណាខុតម៉ៃ។

 

នៅក្នុង​សេចក្តីថ្លែងការណ៍​ចុះផ្សាយ កាលពី​ថ្ងៃ​ព្រហស្បតិ៍ តុលាការ​ធម្មនុញ្ញ​ថៃ បានបញ្ជាក់ថា តុលាការ​សម្រេច​ទទួល​យក​ពាក្យ​បណ្តឹង ប្រឆាំង​លោក​ថាណាថន ប្រធាន​គណបក្ស​ប្រឆាំង អណាខុតម៉ៃ។ ជាលទ្ធផល តំណែង​ជា​សមាជិក​រដ្ឋសភា របស់​លោក​ថាណាថន​ក៏នឹង​ត្រូវ​ព្យួរ រហូត​ដល់​មាន​ការសម្រេច​សាលក្រម​របស់​តុលាការ។

ការសម្រេច​របស់តុលាការ ធម្មនុញ្ញ​ថៃ មានន័យ​រារាំង មិន​ឲ្យ​ប្រមុខ​គណបក្ស​ដ៏ធំ លំដាប់​ទី​៣របស់​ថៃ បាន​ទៅ​ចូលរួម នៅ​ក្នុង​ការបើកសម័យប្រជុំ​លើកទី១​របស់​រដ្ឋសភាថៃ។ លោក​ថាណាថន​នឹង​អាក់ខាន​មិន​អាច​ទៅ​បោះឆ្នោត ជ្រើសរើស​អ្នកនាំពាក្យ​របស់​សភា ដែល​ត្រូវ​រៀបចំ​នៅថ្ងៃ​សុក្រនេះ នៅខណៈពេល​ដែល​ការបោះឆ្នោត​សភា ដើម្បី​ជ្រើសរើស នាយករដ្ឋមន្រ្តី​ថៃ​អាច​រៀបចំឡើង នៅ​សប្តាហ៍ក្រោយ។

តុលាការ​ធម្មនុញ្ញ​ថៃ​សម្រេច​បើកការស៊ើបអង្កេត បន្ទាប់ពី​គណៈកម្មការ​រៀបចំ​ការបោះឆ្នោត​ថៃ កាលពី​ចុងខែ​មេសា បាន​ចោទប្រកាន់​លោក​ថាណាថនថា ​បាន​រំលោភច្បាប់​បោះឆ្នោត ដោយសារ មាន​ភាគហ៊ុន​នៅក្នុង​ក្រុមហ៊ុន​ផ្សព្វផ្សាយ​ព័ត៌មាន។

ការសម្រេច​របស់​តុលាការ​ធម្មនុញ្ញ​ថៃ ជា​ចំណាត់ការ​ថ្មី​មួយទៀត របស់​របបសឹក ដើម្បី​បំផ្លាញ ប្រមុខ​ដឹកនាំ​បក្សប្រឆាំង​ដ៏មាន​ប្រជាប្រិយភាព ដែល​បាន​ទទួល​សំឡេង​គាំទ្រ​ដ៏ច្រើន គួរ​ឲ្យ​ភ្ញាក់ផ្អើល ប្រមាណ ៦​លាន​សំឡេង នៅក្នុង​ការបោះឆ្នោត​សភា កាលពី​ខែ មីនា​កន្លងទៅ។ ក្រៅតែ​ពីរង​បទចោទប្រកាន់ ថា​រំលោភ ច្បាប់​បោះឆ្នោត លោក​ថាណាថន មហាសេដ្ឋីវ័យ ៤០​ឆ្នាំរូបនេះ កំពុង​រង​ការចោទប្រកាន់​ផ្សេងទៀត ដូចជា រំលោភ​ច្បាប់​ឧក្រិដ្ឋកម្ម​អ៊ីនធ័រនែត ញុះញង់​ឲ្យ​មាន​ការបះបោរ​ជាដើម។ បទចោទប្រកាន់​ទី២នេះ​ធ្វើ​ឲ្យ​លោក​ថាណាថន អាច​​ប្រឈម​នឹង​ការផ្តន្ទា​ទោស​ជាប់ពន្ធនាគារ ៧ឆ្នាំ។

ការសម្រេច​យ៉ាងដូច្នេះ​របស់​តុលាការ​ធម្មនុញ្ញ​ថៃ កំពុង​ធ្វើ​ឲ្យ​អនាគត​របស់​គណបក្ស​អណាខុតម៉ៃ​របស់​លោក​ថាណាថន ដែល​ឈ្នះឆ្នោត ទទួល​បាន​អាសនៈ ចំនួន ៨០​នៅ​រដ្ឋសភា ស្ថិតក្នុង​ភាពមិន​ច្បាស់លាស់។ គេ​វាយតម្លៃថា តុលាការ​ធម្មនុញ្ញ​ថៃ ដែល​ធ្លាប់​រំលាយ​ចោល គណបក្ស​ប្រឆាំង​នឹង​របបសឹក​របស់​លោក​ប្រាយុទ្ធ ចាន់អូចារ ម្តងហើយ កាលពី កុម្ភៈ នឹង​អាច​សម្រេច ហាម​លោក ថាណាថន​មិន​ឲ្យ​ធ្វើ​នយោបាយ ចាប់ដាក់​ពន្ធនាគារ ហើយ​និង​រំលាយ​គណបក្ស​អណាខុតម៉ៃ​តែម្តង។

ជាថ្មី​ម្តងទៀត លោក​ថាណាថន កាលពី​ថ្ងៃ​ព្រហស្បតិ៍​បានអំពាវនាវ ឲ្យ​ប្រជាជន​ដែល​ស្នេហា​ភាពយុត្តិធម៌ រួបរួមគ្នា ងើបឈរ តស៊ូប្រយុទ្ធ​ជាមួយលោក។

នៅ​ចុង​ខែ​មេសា​កន្លងទៅ នៅ​ចំពោះ​មុខ​សកម្មជន​គាំទ្រ ដ៏​កកកុញ​នៅ មុខ​ទីស្នាក់ការ​គណៈកម្មការ​បោះឆ្នោត លោក ថាណាថន ធ្លាប់​បង្ហាញ​ជំនឿចិត្ត និង​ភាពស្មោះត្រង់ ដោយ​​អះអាង​ថា ភាគហ៊ុន​ដែល​លោក​មាន​ក្នុង​ក្រុមហ៊ុន​ឃោសនា​​ព័ត៌មាន​ ត្រូវ​បាន​លក់​ចេញ​ តាំង​ពី​ពីរបី​សប្តាហ៍​មុន​លោក​ដាក់​បេក្ខភាព​ឈរ​ឈ្មោះ​បោះឆ្នោត​ម្ល៉េះ។ដូច្នេះ ការចោទ​ប្រកាន់​របស់​គណៈកម្មការ​បោះឆ្នោត គឺ​ជា​ការចោទប្រកាន់ បែប​នយោបាយ​សុទ្ធ​សាធ៕

 

ទាក់ទង​នឹង​ប្រធានបទ​នេះ
 
សូមអភ័យទោស យើងមិនអាច​ភ្ជាប់​ទៅ​ទំព័រ​ដែល​លោកអ្នក​ស្នើសុំ​បានទេ