កាសែតកូរ៉េខាងត្បូង៖ក្រោយបរាជ័យជំនួបត្រាំ គីមនៅវៀតណាម ក្រុងព្យុងយ៉ាងប្រហារជីវិតថ្នាក់ដឹកនាំជាន់ខ្ពស់ចំនួន ៥រូប
កាសែតកូរ៉េខាងត្បូងឈ្មោះ « Chosun Ilbo » ចេញផ្សាយក្នុងថ្ងៃសុក្រ ទី៣១ ឧសភាឲ្យដឹងថា កូរ៉េខាងជើងបានប្រហារជីវិតថ្នាក់ដឹកនាំចំនួន ៥រូបដោយចោទពីបទបានធ្វើឲ្យជំនួបកំពូលលើកទី២ រវាងប្រធានាធិបតីអាមេរិកលោកដូណាល់ ត្រាំ និងមេដឹកនាំកូរ៉េខាងជើងលោកគីម ជុងអ៊ុនក្នុងប្រទេសវៀតណាមកាលពីខែកុម្ភៈទទួលបរាជ័យ។ ក្នុងចំណោមថ្នាក់ដឹកនាំទាំង ៥រូបនោះ មាន ៤នាក់ជាមន្រ្តីជាន់ខ្ពស់នៃក្រសួងការបរទេសដែលកាសែត« Chosun Ilbo » មិនប្រាប់ឈ្មោះ និងលោកគីម យ៉ុកចុល ប្រេសិតពិសេសដែលបានរៀបចំការងារសម្រាប់ជំនួបត្រាំ គីមនៅវៀតណាម ហើយរូបគាត់ក៏បានរួមធ្វើដំណើរនៅក្នុងរថភ្លើងរបស់លោកគីម ជុងអ៊ុនដែរ។ យ៉ាងណាក៏ដោយ ព័ត៌មានចុះផ្សាយដោយកាសែតកូរ៉េខាងត្បូងមួយនេះនៅមិនទាន់មានការបញ្ជាក់ពីប្រភពផ្សេង ឬប្រតិកម្មពីកូរ៉េខាងជើងនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
ផ្អែកតាមកាសែតកូរ៉េខាងត្បូង « Chosun Ilbo » ដែលបានដកស្រង់ពីប្រភពការទូតមួយមិនស្គាល់អត្តសញ្ញាណ លោកគីម យ៉ុកចុល រួមទាំងមន្រ្តីជាន់ខ្ពស់នៃក្រសួងការបរទេសកូរ៉េខាងជើង ៤រូបត្រូវបានគេប្រហារជីវិតចោលនៅអាកាសយានដ្ឋាន Mirim ក្នុងខែមីនា។ តាមកាសែតដដែល លោកគីម យ៉ុកចុល និងមន្រ្តីជាន់ខ្ពស់ទាំង ៤រូបបានជាប់ចោទពីបទក្បត់នឹងមេដឹកនាំកូរ៉េខាងជើងលោកគីម ជុងអ៊ុន និងបានធ្វើឲ្យជំនួបកំពូលលើកទី២ រវាងប្រធានាធិបតីអាមេរិកលោកត្រាំ និងលោកគីមក្នុងទីក្រុងហាណូយ ប្រទេសវៀតណាមកាលពីខែកុម្ភៈទទួលបរាជ័យ។ ចំណែកស្រ្តីអ្នកបកប្រែឲ្យលោកគីមឈ្មោះស្ហ៊ីន យីយ៉ុងត្រូវបានគេបញ្ជូនទៅកាន់ជំរំអ្នកទោសក្នុងបទមានកំហុស។
កំហុសនោះ គឺការមិនបានបកប្រែសំណើថ្មីរបស់លោកគីមទៅកាន់លោកត្រាំក្នុងពេលដែលលោកត្រាំបានថ្លែងថា គ្មានកិច្ចព្រមព្រៀង និងបានក្រោកដើរចេញពីតុចរចា។ គួររម្លឹកថា ជំនួបលើកទី២ ត្រាំ គីមក្នុងទីក្រុងហាណូយត្រូវបានបង្រួញពេលដោយគ្មានកិច្ចព្រមព្រៀង និងគ្មានសេចក្តីថ្លែការណ៍អ្វីទាំងអស់។ ក្រៅពីព័ត៌មានស្តីពីការប្រហារជីវិតមន្រ្តីជាន់ខ្ពស់ទាំង ៤រូប និងលោកគីម យ៉ុកចុលដែលជាប្រេសិតពិសេសបានរៀបចំការងារជំនួបកំពូលត្រាំ គីមនៅវៀតណាម កាសែតកូរ៉េខាងត្បូង « Chosun Ilbo » ក៏បានប្រាប់ឲ្យដឹងថា លោកគីម យ៉ុងចុលដែលជាអ្នករៀបចំ គ្រប់គ្រងជំនួបត្រាំ គីមនៅវៀតណាម និងជាអ្នកចរចាកូរ៉េខាងជើងស្តីពីនុយក្លេអ៊ែរត្រូវបានគេបញ្ជូនទៅកាន់ជំរំអប់រំការងារ។
តើព័ត៌មានចុះផ្សាយដោយកាសែតកូរ៉េខាងត្បូង « Chosun Ilbo » ជាព័ត៌មានពិតដែរឬទេ?។ ក្រសួងបង្រួបបង្រួមកូរ៉េនៅកូរ៉េខាងត្បូងបានបដិសេធមិនធ្វើអត្ថាធិប្បាយអ្វីទាំងអស់។ ទន្ទឹមគ្នានេះ ក៏នៅមិនទាន់មានការបញ្ជាក់ពីប្រភពណាផ្សេង ហើយក្រុងព្យុងយ៉ាងក៏នៅមិនទាន់បានបញ្ចេញប្រតិកម្មអ្វីដែរ។ តែនៅថ្ងៃព្រហស្បតិ៍ ទី៣០ ឧសភា កាសែតផ្លូវការនៃគណបក្សកុម្មុយនិស្តកូរ៉េខាងជើងបានព្រមានថា អ្នកទទួលខុសត្រូវដែលប្រព្រឹត្តទង្វើប្រឆាំងនឹងគណបក្ស ឬប្រឆាំងនឹងបដិវត្តនឹងត្រូវប្រឈមការវិនិច្ឆ័យទោសធ្ងន់ធ្ងរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ