តើលោកគីម យ៉ុងចុលកំពុងស្ថិតក្នុងជំរំលត់ដំ ឬមួយនៅបន្តជាប្រេសិតកូរ៉េខាងជើងសម្រាប់ចរចាបញ្ហានុយក្លេអ៊ែរ?
នៅកូរ៉េខាងជើង ទីភ្នាក់ងារសារព័ត៌មានផ្លូវការឈ្មោះ KCNA បានឲ្យដឹងថា លោកគីម យ៉ុងចុល មន្រ្តីការទូតជាន់ខ្ពស់ និងជាប្រេសិតទទួលបន្ទុកចរចាសំណុំរឿងនុយក្លេអ៊ែរបានមានវត្តមានជាមួយមេដឹកនាំកូរ៉េខាងជើងលោកគីម ជុងអ៊ុននៅក្នុងការសម្តែងសិល្បៈមួយ។ ការចុះផ្សាយព័ត៌មានមួយនេះរបស់ KCNA បានកើតមានឡើង បន្ទាប់ពីកាសែតកូរ៉េខាងត្បូងមួយឈ្មោះ « Chosun Ilbo » បានផ្សព្វផ្សាយក្នុងថ្ងៃសុក្រ ទី៣១ ឧសភាថា នៅក្រោយបរាជ័យជំនួបកំពូលរវាងលោកដូណាល់ ត្រាំ និងលោកគីម ជុងអ៊ុនក្នុងប្រទេសវៀតណាម លោកគីម យ៉ុងចុលត្រូវបានគេបណ្តេញចេញ និងកាត់ទោស រួចបញ្ជូនទៅដាក់នៅក្នុងជំរំលត់ដំការងារ។
ចុះផ្សាយនៅថ្ងៃ៖
ស្តាប់ - ០២:០៤
បើតាមខ្លឹមសារ និងរូបភាពចុះផ្សាយដោយទីភ្នាក់ងារសារព័ត៌មានផ្លូវការកូរ៉េខាងជើងឈ្មោះ KCNA លោកគីម យ៉ុងចុលមានវត្តមានក្នុងចំណោមអ្នកទទួលខុសត្រូវជាន់ខ្ពស់កូរ៉េខាងជើងប្រមាណជា ១២រូបផ្សេងទៀតដែលបានចូលរួមទស្សនាជាមួយលោកគីម ជុងអ៊ុន និងភរិយានៅក្នុងពិធីសិល្បៈមួយសម្តែងដោយភរិយានៃមន្រ្តីកងទ័ពនាថ្ងៃអាទិត្យ ទី២ មិថុនា។ ព័ត៌មានរបស់ KCNA នេះបានធ្លាក់មក បន្ទាប់ពីកាសែតកូរ៉េខាងត្បូងឈ្មោះ« Chosun Ilbo » បានចុះផ្សាយក្នុងថ្ងៃសុក្រ ទី៣១ ឧសភាថា លោកគីម យ៉ុងចុលត្រូវបានរបបក្រុងព្យុងយ៉ាងដកតួនាទី និងកាត់ទោស រួចបញ្ចូនទៅដាក់នៅក្នុងជំរំលត់ដំការងារ។
កាលពីខែមេសាកន្លងទៅ អ្នកទទួលខុសត្រូវជាន់ខ្ពស់កូរ៉េខាងត្បូងម្នាក់បានលើកឡើងពីការកំចាត់លោកគីម យ៉ុងចុលនៅក្រោយបរាជ័យនៃជំនួបកំពូលរវាងលោកត្រាំ និងលោកគីមក្នុងខែកុម្ភៈនៅប្រទេសវៀតណាម។ ដំណឹងមួយនេះក៏ត្រូវបានបញ្ជាក់បន្ថែមដោយអ្នកស្រាវជ្រាវម្នាក់នៃវិទ្យាស្ថានសិក្សានយោបាយអាស៊ីក្នុងទីក្រុងសេអ៊ូលដែរ តែអ្នកស្រាវជ្រាវរូបនេះមិនអាចបញ្ជាក់ពីកម្រិតទម្ងន់ទណ្ឌកម្មដែលលោកគីម យ៉ុងចុលបានទទួលទេ។ នៅក្នុងជំនួបកំពូលរវាងលោកគីម ជុងអ៊ុន និងប្រធានាធិបតីរុស្ស៊ីលោកពូទីនកាលពីថ្ងៃទី២៥ មេសាក្នុងទីក្រុង Vladivostok ក៏គេមិនបានឃើញវត្តមានលោកគីម យ៉ុងចុលដែរ។
គួររម្លឹកថា លោកគីម យ៉ុងចុលជាប្រេសិតទទួលបន្ទុកចរចាសំណុំរឿងនុយក្លេអ៊ែរជាមួយភាគីអាមេរិកដែលដឹកនាំដោយប្រមុខការទូតលោកម៉ៃ ប៉ុមប៉េអូ។ ឆ្លើយនឹងសំណួរនាថ្ងៃអាទិត្យ ទី២ មិថុនាដែលថា តើទំនាក់ទំនងចុងក្រោយរវាងលោកគីម យ៉ុងចុល និងលោកម៉ៃ ប៉ុមប៉េអូបានធ្វើឡើងក្នុងថ្ងៃណា ខែណា? លោកប៉ុមប៉េអូបានឆ្លើយនាថ្ងៃអាទិត្យ ទី២ មិថុនាថា លោកមិនចង់ធ្វើអត្ថាធិប្បាយអ្វីទាំងអស់។ តើលោកគីម យ៉ុងចុលកំពុងស្ថិតក្នុងជំរំលត់ដំ ឬមួយនៅបន្តជាប្រេសិតកូរ៉េខាងជើងសម្រាប់ចរចាបញ្ហានុយក្លេអ៊ែរ?។ មានតែកូរ៉េខាងជើងម្នាក់ឯងគត់ដែលអាចផ្តល់ចម្លើយពិតចំពោះសំណួរនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ