តៃវ៉ាន់នឹងបញ្ជាទិញគ្រឿងសព្វាវុធជាច្រើនពីអាមេរិក
តៃវ៉ាន់បានបញ្ជាក់ព័ត៌មាននៅថ្ងៃព្រហស្បតិ៍ទី ០៦ មិថុនានេះ ថាពិតជាកំពុងរៀបចំបញ្ជាទិញគ្រឿងសព្វាវុធ ក្នុងបរិមាណដ៏ច្រើន ពីអាមេរិក ដើម្បីយកមកជំនួសគ្រឿងសព្វាវុធចាស់ទ្រុឌទ្រោមផង និងដើម្បីការពារខ្លួនទល់នឹងការគំរាមកំហែងពីចិនផង។ នៅក្នុងគម្រោងបញ្ជាទិញដ៏សំខាន់នេះ គេរាប់ឃើញមានជាអាទិ៍រថពាសដែក និងប្រព័ន្ធមីស៊ីល។ គ្រាន់តែទទួលដំណឹងនេះភ្លាម ចិនបានបញ្ចេញប្រតិកម្មខឹងសម្បារយ៉ាងខ្លាំង។
ចុះផ្សាយនៅថ្ងៃ៖
ស្តាប់ - ០១:៤៨
ក្រសួងការពារជាតិតៃវ៉ាន់ បានបញ្ជាក់ជាផ្លូវការ ការបញ្ជាទិញ រថក្រោះ ប្រភេទM១A២ Abrams ចំនួន១០៨គ្រឿង មីស៊ីលប្រឆាំងរថពាសដែក Javelin និង Tow ចំនួនជាង១៥០០គ្រឿង ព្រមទាំងកាំភ្លើងបាញ់មីស៊ីលពីដីទៅអាកាសរយៈខ្លី ចំនួន២៥០គ្រឿង។ ការបញ្ជាទិញកំពុងចាប់ដំណើរការតាមសំណុំបែបបទហើយ។ នេះបើតាមសេចក្តីថ្លែងការណ៍របស់ក្រសួងការពារជាតិតៃវ៉ាន់ដដែល។
គ្រាន់តែបានឮសេចក្តីប្រកាសរបស់តៃវ៉ាន់នេះភ្លាម ចិនបានបញ្ចេញប្រតិកម្ម តាមរយៈសេចក្តីថ្លែងការណ៍របស់ក្រសួងការបរទេសភ្លាមដែរ។ “យើងបានប្រាប់អាមេរិកជាច្រើនដងមកហើយឱ្យគោរពគោលការណ៍ចិនតែមួយ និងថាការលក់អាវុធឱ្យតៃវ៉ាន់ជាប្រធានបទដ៏រសើបនិងជាសេចក្តីសម្រេចដ៏គ្រោះថ្នាក់បំផុត”។ នេះជាសំដីតើនរំលឹករបស់អ្នកនាំពាក្យក្រសួងការបរទេសចិន។
ថ្វីបើតាំងពីឆ្នាំ១៩៤៩ ឆ្នាំដែលបក្សកុម្មុយនិស្តឡើងកាន់អំណាចនៅប៉េកាំងមក និងក្រោយសង្គ្រាមស៊ីវិលបង្ហូរឈាមមក តៃវ៉ាន់ ស្ថិតក្រោមការដឹកនាំដាច់ដោយឡែក និងមានរបបដឹកនាំផ្ទុយពីចិនដីគោកក្តី ក៏ប៉េកាំងតែងចាត់ទុកតៃវ៉ាន់ជាចំណែកមួយនៃដែនដីទាំងមូលរបស់ចិនដដែល។ ហើយចិនមិនដែលបោះបង់គំនិត ប្រើកម្លាំងបាយទៅក្រសោបយកតៃវ៉ាន់មកច្របាច់បញ្ចូលជាចិនតែមួយឡើងវិញឡើយ។ គំនិតបែបនេះ ទើបត្រូវបានប៉េកាំងអះអាងជាថ្មីទៀត កាលពីប៉ុន្មានថ្ងៃមុន។
ចំណែកខាងវ៉ាស៊ីនតោន ដែលបានកាត់ផ្តាច់ទំនាក់ទំនងជាមួយកោះតៃវ៉ាន់ តាំងពី១៩៧៩ ដើម្បីភ្ជាប់ទំនាក់ទំនងការទូតនិងទទួលស្គាល់ប៉េកាំងជាតំណាងចិនតែមួយ នៅតែរក្សាខ្លួនជាសម្ព័ន្ធមិត្តដ៏មានអំណាច និងជាអ្នកផ្គត់ផ្គង់អាវុធដ៏ចំបងរបស់តៃវ៉ាន់ដដែល។ ទំនាក់ទំនងអាមេរិកតៃវ៉ាន់ កាន់តែត្រូវបានលាតត្រដាង និងពង្រឹងបន្ថែមទៀត ដោយប្រធានាធិបតី ដូណាល់ ត្រាំ តាមរយៈចេតនា ចង់លក់សព្វាវុធទំនើបទៅឱ្យតៃប៉ិ។ បើតាមភ្នាក់Bloomberg News រដ្ឋបាលអាមេរិកបានដាក់សំណើទៅសភារួចហើយអំពីគម្រោងចង់លក់សម្ភារៈបរិក្ខាយោធាទៅតៃវ៉ាន់ ក្នុងតម្លៃប្រមាណពីរពាន់លានដុល្លារសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ