ហុងកុង ៖ មហាបាតុកម្មប្រឆាំងនឹងច្បាប់ធ្វើបត្យាប័នជនសង្ស័យទៅចិន
ចុះផ្សាយនៅថ្ងៃ៖
នៅថ្ងៃអាទិត្យទី ៩ មិថុនា២០១៩នេះ មានមហាបាតុកម្មមួយបានរៀបចំឡើង នៅក្នុងហុងកុង ដើម្បីប្រឆាំងនឹងគម្រោងច្បាប់ធ្វើបត្យាប័នជនជាប់សង្ស័យ ទៅកាន់ចិនដីគោក ដើម្បីកាត់ទោស។ សម្រាប់អ្នកច្បាប់ និងសកម្មជនប្រជាធិបតេយ្យ គម្រោងច្បាប់នេះគឺជាតំណាងគ្រោះថ្នាក់ និងជាច្បាប់សម្លាប់សេរីភាព។ សម្រាប់ជនហុងកុងភាគច្រើន ច្បាប់នេះគឺ ការរិះគន់ប្រឆាំង កាន់តែរីកធំធាត់ខ្លាំងទៀត ដោយហេតុតែរដ្ឋាភិបាលបានបង្ហាញចេតនាចង់ធ្វើវិសោធនកម្មនិងអនុម័តច្បាប់ធ្វើឱ្យបានលឿនរហ័ស។
បាតុករចូលរួមដល់ទៅជាងកន្លះលាននាក់ ! ប៉ូលិសវិញ បានត្រៀមកម្លាំងរក្សាសន្តិសុខ ជាង២០០០នាក់ ពោលគឺជាទម្រង់បាតុកម្មដ៏ធំ ដែលពុំធ្លាប់កើតមានឡើយតាំងពី១៥ឆ្នាំមក។ ចំណែក សមាសភាពបាតុករលើកនេះ មិនមែនមានត្រឹមតែជាក្រុមសិស្សនិស្សិត និងសកម្មជនប្រជាធិបតេយ្យទេ តែជាបណ្តាជនហុងកុងគ្រប់ស្រទាប់វណ្ណៈ មានតាំងពីក្រុមអ្នកជំនួញ មេធាវី អ្នកច្បាប់ អ្នកស្រលាញ់លទ្ធិប្រជាធិបតេយ្យ អង្គការសង្គមស៊ីវិល ព្រមទាំងសហគមន៍សាសនាទៀត។
ក្រៅអំពីស្រែកបរិហារគម្រោងច្បាប់ថាការសម្លាប់សេរីភាពហុងកុង និងទាមទារឱ្យរដ្ឋាភិបាលហុងកុងដកសំណើធ្វើវិសោនធនកម្មច្បាប់នេះវិញ បាតុករមួយចំនួនក៏បានស្រែកទាមទារប្រមុខដឹកនាំហុងកុង ស្និទ្ធនឹងប៉េកាំង ចុះចេញពីតំណែងតែម្តង។
មុននឹងឈានដល់មានការប្រមូលផ្តុំធ្វើបាតុកម្មទ្រង់ទ្រាយធំនេះ បក្សប្រឆាំងនិងសង្គមស៊ីវីលបានចាប់ស្រែកប្រឆាំងនឹងរដ្ឋាភិបាលតាំងពីប៉ុន្មានខែមកហើយ។ កាលពីចុងខែមេសាមានបាតុករប្រមូលគ្នាបានប្រមាណជាងពីរម៉ឺននាក់ចុះថ្នល់។ នៅថ្ងៃព្រហស្បតិ៍ ទី ៦ មិថុនា អ្នកច្បាប់និងមេធាវី ប្រមាណពី២៥០០នាក់ទៅបីពាន់នាក់ ក្នុងសម្លៀកបំពាក់សខ្មៅ បាននាំគ្នាដើរដង្ហែក្បួនយ៉ាងស្ងៀមស្ងាត់ គ្មានបដា គ្មានជ័យឃោសអ្វីទាំងអស់ ពីតុលាការទៅដល់វិមានរដ្ឋាភិបាល ដោយឈរសម្រួមគារវកិច្ចបីនាទីផង។
សម្រាប់ក្រុមអ្នកប្រឆាំង គម្រោងច្បាប់ ដែលស្នើឡើងដោយរដ្ឋាភិបាលហុងកុងស្និទ្ធនឹងក្រុងប៉េកាំងនេះ គឺជាការគំរាមកំហែងសិទ្ធិសេរីភាព និងឯករាជភាពនៃប្រព័ន្ធតុលាការហុងកុង។ ច្បាប់នេះកំពុងធ្វើឱ្យពិភពពាណិជ្ជកម្មនិងអ្នកជំនួញ អាមេរិក ហុងកុងព្រួយបារម្ភយ៉ាងខ្លាំង។ ជាសរុបច្បាប់នេះមិនមែនជារូបភាពល្អទេសម្រាប់ហុងកុងដែលល្បីឈ្មោះជាក្រុងហិរញ្ញវត្ថុអន្តរជាតិឡើយ។
រដ្ឋាភិបាលហុងកុង ចង់ធ្វើវិសោធនកម្មច្បាប់ ដើម្បីសម្រួលដំណើរការធ្វើបត្យាប័នជនសង្ស័យ ទៅប្រទេស និងដែនដីផ្សេងទៀតរបស់ចិន ដូចជាចិនដីគោក ម៉ាកាវ និងទៅតៃវ៉ាន់ បន្ថែមពីលើប្រទេសជាង២០ ដែលហុងកុងមានច្បាប់ធ្វើបត្យាប័ន រួមគ្នាស្រាប់រួចទៅហើយ។
គឺទស្សនៈវិស័យបញ្ជូនជនសង្ស័យទៅកាត់ទោសនៅសាធារណរដ្ឋប្រជាមានិតចិននេះ ដែលអ្នកហុងកុងព្រួយបារម្ភនិងយល់ថាជាបញ្ហាអាសន្នបំផុតនោះ ព្រោះពួកគេគិតថា តាមរយៈច្បាប់ថ្មីនេះ ចិនអាចទាមទារធ្វើបត្យាប័ន នូវរាល់គ្រប់ជនសង្ស័យណាក៏បាន រាប់ទាំងសកម្មជនប្រជាធិបតេយ្យផង យកទៅកាត់ទោសនៅប៉េកាំង ឬចិនដីគោក ដែលមានប្រព័ន្ធតុលាការបែបកុម្មុនិស្ត គ្មានតម្លាភាព។
ហុងកុងអតីតដែនដីក្រោមអាណានិគមអង់គ្លេស ត្រូវបានបង្វិលមកឱ្យចិនពេញកាលពីឆ្នាំ១៩៩៧ ដោយផ្អែកលើគោលការណ៍ “ប្រទេសមួយ ប្រព័ន្ធពីរ” ពោលគឺហុងកុង ត្រូវស្ថិតនៅជាតំបន់មានស្វ័យភាពពេញលេញ សិទ្ធិសេរីភាពជាមូលដ្ឋានគ្រឹះរបស់មនុស្សជាតិ និងមានប្រព័ន្ធតុលាការដាច់ដោយឡែកពីប្រទេសចិន រហូតដល់ឆ្នាំ ២០៤៧។ ប៉ុន្តែ បើតាមអ្នកឯករាជ្យនិយម ប្រព័ន្ធតុលាការឯករាជ្យ និងជាទីគោរពរបស់ហុងកុងនេះ កំពុងត្រូវចិនជាន់ពន្លិច និងសង្គ្រប់ជីវិតនយោបាយកោះ តាមរយៈច្បាប់ធ្វើបត្យាប័ននេះឯង។
ក្រោយពី មានការតវ៉ានិងប្រឆាំងខ្លាំង រដ្ឋាភិបាលបានចេញមុខធានារ៉ាប់រង ព្រមធ្វើការកែប្រែគម្រោងច្បាប់ត្រង់ចំណុចខ្លះ ដោយបញ្ជាក់ថា ការស្នើសុំធ្វើបត្យាប័ន អាចអនុវត្តតែលើករណីបទឧក្រិដ្ឋ ដែលអាចមានទោសជាប់ពន្ធនាគារដល់៧ឆ្នាំ មិនមែនត្រឹមបីឆ្នាំដូចគកម្រោងច្បាប់ស្នើដំបូងទេ។ រដ្ឋាភិបាលហុងកុង ក៏បានព្រមព្រៀង លុបប្រភេទទោសឧក្រិដ្ឋ ចំនួន៩ ចេញពីបញ្ជីទោសដែលអាចធ្វើបត្យាប័ន។ ច្បាប់ដើមមានរាប់ឃើញបទឧក្រិដ្ឋជាង៤០ឯណោះដែលអាចធ្វើបត្យាប័ន។
ប៉ុន្តែសម្ពាធបាតុករ ប្រហែលជាមិនអាចធ្ងន់លើសសម្ពាធនយោបាយរបស់ប៉េកាំងឡើយ។ ជាលើកទីមួយ ការិយាល័យទំនាក់ទំនងចិននៅហុងកុង បានកោះហៅសមាជិកសភាហុងកុងទៅព្រមានប្រាប់អំពីកាតព្វកិច្ចរបស់តំណាងរាស្ត្រក្នុងការគាំទ្រគម្រោងច្បាប់នេះ។
មានន័យ ចិនបានលូកដៃកាន់តែជ្រៅខ្លាំង! គោលការណ៍ « ប្រទេសមួយប្រព័ន្ធនយោបាយពីរ » កំពុងចាប់សាបរលាប ដូចអ្វីដែល រដ្ឋមន្ត្រីក្រសួងការបរទេសចិនធ្លាប់ព្រលយកាលពីខែមិថុនា ឆ្នាំ២០១៧ថា សេចក្តីថ្លែងការណ៍ចិន-អង់គ្លេស កំណត់យកគោលការណ៍ “ប្រទេសមួយប្រព័ន្ធពីរ” នៅហុងកុង លែងសមនឹងកាលៈទេសៈហើយ។ ស្វ័យភាពហុងកុង ហូរជ្រុះបន្តិចម្តងៗ។ ពលរដ្ឋហុងកុងដែលឥលូវមានទម្លាប់និយាយថា ប្រទេសមួយប្រព័ន្ធមួយកន្លះ កំពុងភ័យថា យូរនិងឆាប់ នឹងមានតែ “ប្រទេសមួយ ប្រព័ន្ធមួយ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ