ក្រោយមហាបាតុកម្ម រដ្ឋាភិបាលហុងកុងមិនចុះញ៉ម ចំណែករដ្ឋាភិបាលចិនចង្អុលមុខបស្ចិមលោក
នៅហុងកុង រដ្ឋាភិបាលបានឆ្លើយច្បាស់ៗយ៉ាងដាច់ណាត់នៅថ្ងៃចន្ទ ទី១០ មិថុនាថា ខ្លួននឹងមិនបោះបង់សេចក្តីព្រាងច្បាប់ដែលអនុញ្ញាតឲ្យមានការធ្វើបត្យាប័នជនសង្ស័យទៅកាត់ទោសនៅចិនដីគោកឡើយ។ ចម្លើយរបស់រដ្ឋាភិបាលហុងកុងនេះបានធ្វើឡើង បន្ទាប់ពីមានប្រជាជនហុងកុងជាង ១លាននាក់បានចុះផ្លូវធ្វើបាតុកម្មប្រឆាំងនឹងសេចក្តីព្រាងច្បាប់ដ៏ចម្រូងចម្រាសមួយនេះ។ ចំណែកនៅក្រុងប៉េកាំងឯណោះវិញ សារព័ត៌មានផ្លូវការចិនបាននាំគ្នាចោទបស្ចិមលោកពីបទនៅពីក្រោយមហាបាតុកម្មនៅហុងកុង។ ក្រៅពីបារម្ភបាត់បង់សេរីភាពក្នុងការបញ្ចេញមតិ ពលរដ្ឋហុងកុងក៏ខ្លាចសេចក្តីព្រាងច្បាប់មួយនេះឈានទៅបំបាត់ប្រទេសមួយប្រព័ន្ធពីរដែលហុងកុងមានតាំងពីអង់គ្លេសបានប្រគល់ទឹកដីហុងកុងទៅឲ្យចិនប៉េកាំងវិញក្នុងឆ្នាំ ១៩៩៧។ លោកហ្សង់ ហ្រ្វង់ស័រ ហុយឈេ សាស្រ្តាចារ្យ និងជាប្រធានវិទ្យាស្ថានជាតិនៃភាសា និងអារ្យធម៌បូព៌ាក្នុងប្រទេសបារាំងបានយល់ឃើញថា ប្រមុខដឹកនាំហុងកុងលោកស្រីការី ឡាំគួរតែស្តាប់តាមការទាមទាររបស់បាតុករហុងកុងដែលមានពីគ្រប់មជ្ឈដ្ឋានទាំងអស់។
ចុះផ្សាយនៅថ្ងៃ៖
ស្តាប់ - ០១:៣១
« លោកស្រីឡាំ ការី ឡាំនឹងត្រូវស្តាប់តាមការទាមទាររបស់ប្រជាជនហុងកុងនៅតាមផ្លូវ ព្រោះគេបានសង្កេតឃើញថា មានបាតុករហុងកុងមកពីគ្រប់មជ្ឈដ្ឋានទាំងអស់ ពីគ្រប់សមាគមមេធាវី និងពីគ្រប់សមាគមអ្នកជំនួញដែលហាក់កំពុងមានក្តីបារម្ភខ្លាំងចំពោះសេចក្តីព្រាងច្បាប់ដែលរដ្ឋអំណាចហុងកុងកំពុងរៀបចំដាក់ឲ្យសភាអនុម័តនាពេលខាងមុខ។ ជាមួយនឹងច្បាប់មួយនេះ ពលរដ្ឋហុងកុងបារម្ភពីការចាប់បញ្ជូនជនសង្ស័យក្នុងបទឧក្រិដ្ឋមួយចំនួន មានទាំងបទឧក្រិដ្ឋសេដ្ឋកិច្ចផងទៅឲ្យចិនប៉េកាំងជាអ្នកកាត់ទោស។
គេឃើញថាជាថ្មីម្តងទៀត ប្រជាជនហុងកុងមិនបានឈរឱបដៃនៅស្ងៀមទេដោយបាននាំគ្នាចុះផ្លូវតវ៉ា ប្រឆាំង។ ពិតណាស់ បញ្ហានយោបាយជារឿងមួយ តែអ្វីដែលពួកគេកំពុងតវ៉ា ប្រឆាំងពេលនេះ គឺទាក់ទងនឹងសេរីភាពជាសារវន្តដែលប្រជាជនហុងកុងមិនបានទុកបណ្តោយឲ្យរដ្ឋអំណាចហុងកុងធ្វើស្រេចនឹងចិត្តដើម្បីតម្រូវចិត្តរដ្ឋាភិបាលចិននៅប៉េកាំងឡើយ។ គ្រប់គ្នាបានដឹងហើយថា របបក្រុងប៉េកាំងសព្វថ្ងៃបន្តប្រើនយោបាយគាបសង្កត់កាន់តែខ្លាំងនៅទីបេ ឬមួយនៅស៊ីជាំង។
គឺនយោបាយរបស់រដ្ឋាភិបាលចិនដីគោកមួយនេះឯងដែលបានធ្វើប្រជាជនហុងកុងភ័យខ្លាចកាន់តែខ្លាំង និងដែលជាហេតុផលជំរុញឲ្យប្រជាជនហុងកុងចុះផ្លូវធ្វើបាតុកម្មតវ៉ា ប្រឆាំងពេលនេះ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ