ភាពរន្ធត់នៅហុងកុង នៅក្រោយការប៉ះទង្គិចដ៏ហិង្សា រវាងប៉ូលិស និងបាតុករ ប្រឆាំងច្បាប់ធ្វើបត្យាប័ន
ក្រោយពីត្រូវវាយបំបែក នៅយប់ថ្ងៃពុធទី ១២មិថុនា ២០១៩ ក្រុមបាតុកហុងកុង រាប់ពាន់នាក់ ដែលមានការចូលរួមពីសិស្សសាលាផងដែរ បានត្រលប់ទៅ ប្រមូលផ្តុំគ្នាសាជាថ្មី នៅព្រឹកថ្ងៃព្រហស្បតិ៍ នៅជុំវិញអគាររដ្ឋសភា ដើម្បី បន្តប្រឆាំងនឹងច្បាប់ស្តីពីការធ្វើបត្យាប័ន បញ្ជូនជនសង្ស័យពីហុងកុង ទៅកាន់ប្រទេសចិន ដីគោក។
ចុះផ្សាយនៅថ្ងៃ៖ កែប្រែថ្ងៃទី៖
អាជ្ញាធរហុងកុង នៅថ្ងៃព្រហស្បតិ៍នេះ បានសម្រេចបន្ត បិទអគារដ្ឋាភិបាល នៅក្នុងសង្កាត់ជំនួញដែលកើតមានការប៉ះទង្គិច កាលពីថ្ងៃពុធ។ កងកម្លាំងពិសេស ប្រឆាំងកុប្បកម្ម ត្រូវបានដាក់ពង្រាយ យ៉ាងសម្បើម នៅជុំវិញអគាររដ្ឋាភិបាល ជាទី ដែល ក្រុមបាតុករ ហើយនិងប៉ូលិស រក្សាសណ្តាប់ធ្នាប់ បានប៉ះទង្គិចគ្នាយ៉ាងហិង្សា កាលពីយប់ថ្ងៃពុធ ដែលបានធ្វើឲ្យមនុស្សច្រើនជាង ៧០នាក់របួស និងក្នុងនោះ ២នាក់ រងរបួសធ្ងន់។ រងរន្ធត់នឹងហេតុការណ៍ កាលពីយប់ថ្ងៃពុធ លោកស្រី ការី ឡាំ ប្រមុខដឹកនាំហុងកុង នៅថ្ងៃព្រហស្បតិ៍នេះ បានចេញមុខ រិះគន់ ក្រុមបាតុករ ដែលលោកស្រីចោទថា បានរៀបចំធ្វើកុប្បកម្មដ៏ហិង្សាកាលពីថ្ងៃពុធ។
ប្រសាសន៍របស់លោកស្រី ការី ឡាំ នៅទូរទស្សន៍ហុងកុង នៅថ្ងៃព្រហស្បតិ៍ ប្រែសម្រួលដោយឈាង បុប្ផា
ប្រសាសន៍របស់លោកស្រី Carrie Lam ប្រុមុខដឹកនាំហុងកុង
“ពេញមួយថ្ងៃ នៅជុំវិញ អគារដ្ឋសភា ទាំងអស់គ្នាបានឃើញរូបភាពដ៏ក្រៀមក្រំ។ សកម្មភាពកុប្បកម្មដែលបានបំផ្លាញសង្គមសន្តិភាព ដោយមិនរអែងខ្លាចច្បាប់ គឺជារឿងដែលគេមិនអាចទទួលយកបាន នៅក្នុងសង្គមស៊ីវិល័យមួយ។ ច្បាស់ណាស់ថា វាមិនមែនជាការប្រមូលផ្តុំតវ៉ាដោយសន្តិភាព ប៉ុន្តែ វាជាកុប្បកម្ម ដែលត្រូវបានរៀបចំ យ៉ាងបើកចំហរ។ វាមិនមែនជាឥរិយាបថដែលបង្ហាញក្តីស្រឡាញ់ដល់ទីក្រុងហុងកុងនោះឡើយ។
ខ្ញុំសង្ឃឹមថា សណ្តាប់ធ្នាប់សង្គមនឹងអាចត្រូវរៀបចំឲ្យល្អឡើងវិញ តាមតែអាចធ្វើទៅបាន។ ហើយខ្ញុំនឹងមិនសង្ឃឹមដែរទេថា នឹងឃើញមានអ្នករបួស សាជាថ្មី នៅក្នុងកុប្បកម្ម។ ខ្ញុំសូមអំពាវនាវឲ្យអ្នកដែលស្រឡាញ់ ស្នេហា សភាហុងកុង ស្ថិតនៅឆ្ងាយពីអំពើហិង្សា។ ខ្ញុំជឿក្នុងចិត្តយ៉ាងមុតមាំថា ក្នុងនាមជាសង្គមស៊ីវិល័យ ហុងកុងនៅតែអាចប្រើសន្តិភាពនិយម ហេតុផល ហើយនិងច្បាប់ ដើម្បីដោះស្រាយបញ្ហា ដើម្បី ផលប្រយោជន៍រួមរបស់ហុងកុង”។
ក្រុមបាតុករហុងកុងវិញ បានប្រកាសនៅថ្ងៃព្រហស្បតិ៍ថា ពួកគេនឹងត្រលប់មកធ្វើបាតុកម្មដ៏ធំសម្បើមមួយ នៅថ្ងៃ អាទិត្យចុងសប្តាហ៍នេះ។ ទាក់ទងនឹងបាតុកម្មប្រឆាំងច្បាប់ធ្វើបត្យាប័ន ទៅប្រទេសចិននេះ អ្នកនាំពាក្យរបស់ក្រសួងការបរទេសចិន នៅថ្ងៃនេះ បានបរិហារប្រតិកម្មបែប មិនទទួលខុសត្រូវ របស់សហភាពអឺរ៉ុប។ សហភាពអឺរ៉ុប ដែលបានចេញមុខ រិះគន់ការប្រើកម្លាំងច្រើនជ្រុលរបស់អាជ្ញាធរហុងកុង ទៅលើក្រុមបាតុករ។ សម្រាប់ទីក្រុងប៉េកាំង បញ្ហាហុងកុង ជាសំណុំរឿងផ្ទៃក្នុងសុទ្ធសាធរបស់ប្រទេសចិន ដែលគ្មានស្ថាប័ន ឬបុគ្គលណាមួយ អាចលូកដៃបានឡើយ។ មួយវិញ ទៀត សម្រាប់ប៉េកាំង ហេតុការណ៍ដែលឡើងនៅថ្ងៃម្សិលមិញ មិនមែនជាបាតុកម្ម ដោយសន្តិភាពនោះទេ ប៉ុន្តែ ជាកុប្បកម្ម រៀបចំទុកជាមុន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ