ហុងកុង៖គ្រាន់តែបានចេញពីគុកភ្លាម លោក Joshua Wong បានទាមទារឲ្យលោកស្រីការី ឡាំចុះចេញពីតំណែង
នៅហុងកុង លោក Joshua Wong សកម្មជនប្រជាធិបតេយ្យ និងអតីតមេដឹកនាំចលនាបះបោរឆ័ត្រឆ្នាំ ២០១៤ ត្រូវបានដោះលែងពីពន្ធនាគារនាថ្ងៃចន្ទ ទី១៧ មិថុនា។ គ្រាន់តែទទួលបានសេរីភាពភ្លាម សកម្មជនប្រជាធិបតេយ្យវ័យ ២២ឆ្នាំរូបនេះបានថ្លែងទៅកាន់ប្រមុខដឹកនាំហុងកុងលោកស្រីការី ឡាំដោយបានទាមទារឲ្យលោកស្រីចុះចេញពីតំណែង។ សម្រាប់លោក Wong លោកស្រីឡាំលែងមានលក្ខណៈសម្បត្តិគ្រប់គ្រាន់ដើម្បីបន្តជាប្រមុខដឹកនាំហុងកុងទៀតឡើយ។ គួររម្លឹកថា លោក Wong បានទទួលទោសជាប់គុកក្នុងវ័យ ១៧ឆ្នាំពីបទដឹកនាំចលនាបះបោរឆ័ត្រកាលពីឆ្នាំ ២០១៤។ តាមរដ្ឋអំណាច ការដោះលែងលោក Wong មុនពេលកំណត់ពេលនេះក៏ដោយសារតែលោកមានឥរិយាបទល្អក្នុងពេលជាប់គុក។
ចុះផ្សាយនៅថ្ងៃ៖
ស្តាប់ - ០២:២៧
ទោះបីជាការដោះលែងលោក Joshua Wong ត្រូវបានរដ្ឋអំណាចលើកយកហេតុផលអ្វីទៅពន្យល់ក៏ដោយក៏គេដឹងថា ការដោះលែងពេលនេះបានធ្វើឡើងក្នុងពេលដែលស្ថានការណ៍នយោបាយហុងកុងកំពុងឡើងកំដៅខ្លាំង។ សម្រាប់លោក Wong នេះជាឱកាសមួយល្អណាស់ដើម្បីបន្តការតស៊ូរបស់លោក។ អ៊ីចឹងហើយបានជាតាំងពីដាក់ជើងនៅក្រៅគុកភ្លាម លោក Wong ក៏បានចាប់អារម្មណ៍ភ្លាមភ្លែតលើមហាបាតុកម្មរបស់ពលរដ្ឋហុងកុងប្រឆាំងនឹងសេចក្តីព្រាងច្បាប់ស្តីពីការធ្វើបត្យាប័នជនសង្ស័យទៅកាត់ទោសនៅចិនប៉េកាំង។ « ក្នុងពេលខ្ញុំនៅក្នុងគុក ខ្ញុំបានឃើញលោកស្រីការី ឡាំយំនៅតាមកញ្ចក់ទូរទស្សន៍។ អ្វីដែលខ្ញុំអាចនិយាយបាន ខណៈពេលដែលលោកស្រីបង្ហួរទឹកភ្នែក ពលរដ្ឋហុងកុងបង្ហូរឈាម » នេះជាការថ្លែងរបស់លោក Wong នៅចំពោះមុខហ្វូងអ្នកកាសែត។
លោក Wong ចង់និយាយលើអំពើហឹង្សារបស់កម្លាំងប៉ូលិសដែលបានវាយប្រហារលើហ្វូងបាតុករហុងកុងក្នុងថ្ងៃពុធ ទី១២ មិថុនាកន្លងទៅ។ បន្ទាប់មក សកម្មជនប្រជាធិបតេយ្យ និងអតីតមេដឹកនាំចលនាបះបោរឆ័ត្រឆ្នាំ ២០១៤ វ័យ ២២ឆ្នាំរូបនេះបានអំពាវនាវត្រង់ឲ្យប្រមុខដឹកនាំហុងកុងលោកស្រីការី ឡាំចុះចេញពីតំណែងដោយលោក Wong យល់ថា លោកស្រីឡាំលែងមានលក្ខណៈសម្បត្តិគ្រប់គ្រាន់ដើម្បីបន្តជាប្រមុខដឹកនាំហុងកុងទៀតឡើយ។ « យើងស្នើឲ្យលោកស្រីការី ឡាំលាឈប់ពីតំណែង ដកសេចក្តីព្រាងច្បាប់ស្តីពីការធ្វើបត្យាប័នចេញចេញ និងដកពាក្យកុប្បកម្មដែលលោកស្រីបានប្រើចំពោះក្រុមបាតុករនាសប្តាហ៍កន្លងទៅ » នេះជាការបញ្ជាក់របស់លោក Wong។
គួររម្លឹកថា មានអាយុ ១៧ឆ្នាំនៅពេលផ្តើមមានចលនាបះបោរឆ័ត្រក្នុងឆ្នាំ ២០១៤ លោក Joshua Wong ត្រូវបានកាត់ទោសឲ្យជាប់ពន្ធនាគារចំនួន ៣ខែពីបទមិនគោរពតាមដីការតុលាការដែលបញ្ជាឲ្យជម្លៀសជំរំប្រមូលផ្តុំដោយចលនាឆ័ត្រ។ បន្ទាប់ពីដេកក្នុងគុកបាន ៦ថ្ងៃ លោក Wong ត្រូវបានដោះលែងឲ្យនៅក្រៅឃុំបណ្តោះអាសន្នក្នុងពេលរងចាំការពិនិត្យលើបណ្តឹងឧទ្ធរណ៍របស់លោក។ បន្ទាប់មកនៅពាក់កណ្តាលខែឧសភា ឆ្នាំ ២០១៩ ចៅក្រមបានសម្រេចឲ្យឃុំខ្លួនលោក Wong ជាបន្តទៀត តែបន្ថយបន្ទោសនៅត្រឹម ២ខែ។ តែការដោះលែងមុនពេលកំណត់ពេលនេះត្រូវបានរដ្ឋអំណាចពន្យល់ថា មកលោក Wong មានឥរិយាបទល្អក្នុងពេលជាប់គុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ