ចិននិងរុស្ស៊ីប្រឆាំងនឹងការឈប់ផ្តល់ប្រេងទៅឱ្យព្យុងយ៉ាង
នៅថ្ងៃអង្គារម្សិលមិញ រុស្ស៊ី និងចិន បាននាំគ្នា ខ្ទប់គំនិតផ្តួចផ្តើមរបស់សហរដ្ឋអាមេរិកដែលចង់បិទបង្ឃាំងការដឹកជញ្ជូនប្រេងចម្រាញ់រួចទៅឱ្យកូរ៉េខាងជើង។ អាមេរិកលើកសំណើយ៉ាងដូច្នេះមកពី សម្រាប់វ៉ាស៊ីនតោន កូរ៉េខាងជើងបាននាំចូលប្រេងហួសកំរិតអនុញ្ញាតរបស់អង្គការសហប្រជាជាតិហើយ សម្រាប់ឆ្នាំ២០១៩ តាមរយៈការលួចទិញប្រេងដោយខុសច្បាប់។ នេះបើតាមប្រភពអ្នកការទូត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
បើតាមរបាយការណ៍អាមេរិក កូរ៉េខាងជើង បាននាំចូលប្រេងហួសកំរិតអនុញ្ញាតប្រចាំឆ្នាំ២០១៩ កំណត់ដោយអង្គការសហប្រជាជាតិ តាមរយៈការបង្វែរទិញដោយខុសច្បាប់នៅកណ្តាលសមុទ្ទ។ ក្នុងរវាងពីខែមករា ដល់ខែមេសា មានការដឹកប្រេងទៅផ្ទេរឱ្យនាវាកូរ៉េខាងជើង កណ្តាលសមុទ្ទ ដោយខុសច្បាប់ចំនួន៧០ករណី ដោយប្រើនាវាដឹកប្រេងពាក់ផ្លាកបន្លំ និងក្រដាសស្នាមក្លែងក្លាយបន្លំភ្នែកអន្តរជាតិ ក្នុងមានយ៉ាងហោច៨ ត្រូវបានអាមេរិកនិងជប៉ុនវែកចាប់បាន។ នេះបើតាមរបាយការណ៍អាមេរិកដដែល។
ជាសរុប កូរ៉េខាងជើងបានរំលោភទណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិជាញឹកញយ ហេតុដូច្នេះហើយបានសហរដ្ឋអាមេរិកបានស្នើសុំទៅអង្គការសហប្រជាជាតិ ប្រកាស ហាមឃាត់មិនឱ្យមានដឹកជញ្ជូនប្រេងចម្រាញ់រួចទៅឱ្យព្យុងយ៉ាងទៀតទេ នៅពេលណាកូរ៉េខាងជើងបាននាំចូលប្រេងឆៅគ្រប់៥០ម៉ឺនធុង។
គំនិតផ្តួចផ្តើមរបស់អាមេរិកចង់បិទខ្ទប់ការដឹកជញ្ជូនប្រេងចម្រាញ់រួចទៅឱ្យកូរ៉េខាងជើងនេះ បានទទួលការគាំទ្រពីប្រទេសចំនួន២៥ នៅអង្គការសហប្រជាជាតិ មានជាអាទិ៍ប្រទេសបារាំង ជប៉ុននិងអាល្លឺម៉ង់...។ ប៉ុន្តែរុស្ស៊ីនិងចិនយល់ថា គេត្រូវការពេលវេលាច្រើនទៀតដើម្បីសិក្សាសំណើនេះ និងមិនដឹងត្រូវការរយៈពេលប៉ុន្មានឱ្យពិតឱ្យប្រាកដឡើយ។ កាលពីឆ្នាំ២០១៨ ប្រទេសទាំងពីរធ្លាប់ប្រឆាំងនឹងអាមេរិកម្តងហើយ ហើយសំណើសុំហាមឃាត់ការបញ្ជូនប្រេងថ្មីៗទៀតរបស់អាមេរិក មិនត្រូវបានអនុវត្តម្តងណាទេ។
ដើម្បីបង្ខំកូរ៉េខាងជើងឱ្យបោះបង់កម្មវិធីនុយក្លេអ៊ែរ ក្រុមប្រឹក្សាសន្តិសុខអង្គការសហប្រជាជាតិ បានអនុម័តសេចក្តីសម្រេចចិត្តដាក់ទណ្ឌកម្ម យ៉ាងធ្ងន់ធ្ងរ កំរិតការនាំចូលប្រេង និងដាក់បម្រាមប្រឆាំងនឹងការនាំចេញធ្យូងថ្ម នេសាទ និងវាយណភណ្ឌកូរ៉េខាងជើង។ ចិនសម្ព័ន្ធមិត្តតែមួយគត់របស់ព្យុងយ៉ាង ក៏បានចូលដៃជាមួយអន្តរជាតិដែរ។ ប៉ុន្តែក្រោយជំនួបកំពូលគីម-ត្រាំ ពីរលើមិនបានជោគជ័យមក ចិនត្រលប់មកជិតស្និទ្ធនឹងកូរ៉េខាងជើងជាថ្មី។ លោកស៊ី ជីនពីង នឹងអញ្ជើញទៅបំពេញទស្សនកិច្ចផ្លូវរដ្ឋនៅព្យុងយ៉ាងនៅថ្ងៃស្អែក និងបានប្រកាសគាំទ្រ នៅថ្ងៃពុធនេះ ជំហរត្រឹមត្រូវរបស់កូរ៉េខាងជើង ក្នុងដំណោះស្រាយឱ្យឧបទ្វីបកូរ៉េ ដែលកំពុងជាប់គាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ