វ៉ាស៊ីនតោននិងប៉េកាំងភ្ជាប់សំដីគ្នាដើម្បីបញ្ចប់សង្គ្រាមពាណិជ្ជកម្ម
សហរដ្ឋអាមេរិកនិងចិនលង់ក្នុងសង្គ្រាមពាណិជ្ជកម្មអស់ជាច្រើនថ្ងៃខែ ដោយមិនថានឹងដោះស្រាយចេញតាមច្រកណាទេ។ ប៉ុន្តែគេឃើញមានលេចសញ្ញានៃភាពធូរស្បើយ។ នៅថ្ងៃអង្គារម្សិលមិញ វ៉ាស៊ីនតោន និងប៉េកាំង បានប្រកាសបើកកិច្ចចរចា ជាន់ខ្ពស់ នឹងគ្នាឡើងវិញ ផ្តើមដោយកិច្ចសន្ទនាតាមទូរស័ព្ទរវាងលោកត្រាំ និងលោក ស៊ីជីនពីង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
លោកដូណាល់ ត្រាំ បានជូនដំណឹងមុនគេតាមរយៈសារទ្វីត ថាលោកបានជួបសន្ទនា តាមទូរស័ព្ទជាមួយប្រធានាធិបតីចិនលោក ស៊ី ជិនពីង។ ជាកិច្ចសន្ទនាដ៏ល្អនឹងគ្នា។ ហើយនៅសប្តាហ៍ក្រោយ ក្នុងឱកាសជំនួបកំពូលហ្សេ២០ នៅប្រទេសជប៉ុន លោកនឹងអាចនឹងមានជំនួបសមភាគីបានយូរទៀត។ នេះបើតាមប្រសាសន៍របស់លោកត្រាំដដែលដោយអះអាងថា ក្រុមការងារទាំងសងខាងបានចាប់ផ្តើមរៀបចំឱ្យមានជំនួបមួយទល់មួយ ត្រាំ-ស៊ី ដែលគ្រប់គ្នារង់ចាំបំផុត។
ចំណែកខាងចិនវិញ ទូរទស្សន៍ជាតិ បានផ្សព្វផ្សាយអំពីជំនួបតាមទូរស័ព្ទរវាងប្រធានាធិបតីទាំងពីរ និងអំពីឆន្ទៈ គាំទ្រឱ្យមានកិច្ចសហប្រតិបត្តិការរវាងគ្នា របស់លោកស៊ីជិនពីង។ "សហការគ្នា នាំចំណេញដល់អាមេរិកនិងចិន តែបើប្រឈមគ្នាគឺខាតទាំងពីរ" នេះជាប្រសាសន៍របស់លោក ស៊ី ជិនពីង សង្ខេបដោយប្រព័ន្ធឃោសនាព័ត៌មានរដ្ឋ។
ជំនួបនេះ មិនត្រឹមតែជាការផ្តល់សន្ទុះឱ្យមានដំណើរការចរចាពាណិជ្ជកម្មស្វែងរកកិច្ចព្រមព្រៀងនឹងអាចចាប់ផ្តើមឡើងវិញទេ តែថែមទាំងអាចបញ្ចប់ការតតាំងសំដីស្តីពីការដំឡើងបំប៉ោងយកពន្ធបន្ថែមដាក់ទណ្ឌកម្មគ្នាទៅវិញទៅមកទៀតផង។
ប៉ុន្តែទីប្រឹក្សាសេដ្ឋកិច្ចរបស់សេតវិមានបានដាស់តឿនគ្រប់គ្នាឱ្យរក្សាការប្រុងប្រយ័ត្ន ព្រោះគេពិបាកប៉ាន់ស្មានលទ្ធផលនៃជំនួបរវាងមេដឹកនាំទាំងពីរណាស់។ គ្មានអ្វីដែលអាចធានាបានសោះថាអាមេរិកនិងចិនអាចរកឃើញផ្លូវស្រុះស្រួលគ្នា។ រដ្ឋបាលលោកត្រាំ មិនប្តូរទិសដៅនយោបាយ និងប៉ងធ្វើឱ្យមានការប្តូរផ្លាស់ជាប្រព័ន្ធនិងបានរិះគន់ជាថ្មីចរិតមិនគោរពច្បាប់ពាណិជ្ជកម្មអន្តរជាតិរបស់ចិន។
សេចក្តីប្រកាសអំពីជំនួបនេះ ប្រព្រឹត្តទៅជួនចំពេលដែលរដ្ឋបាលលោកត្រាំកំពុងស្តាប់ សហគ្រិនអាមេរិកដែលព្រួយបារម្ភអំពីការយកពន្ធបន្ថែមចំនួន៣រយពាន់លានដុល្លារលើអចលនៈទ្រព្យចិន។ កាលពីសប្តាហ៍មុននេះទៀត លោក ដូណាល់ ត្រាំ ទើបដាក់បន្ទុកឱ្យក្រសួងពាណិជ្ជកម្មអាមេរិកសិក្សាមើលតើអាចដាក់ពន្ធអ្វីបន្ថែមទៀត ប្រសិនបើចិននិងអាមេរិកមិនអាចសម្រេចកិច្ចព្រមព្រៀងពាណិជ្ជកម្មនឹងគ្នាបាន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ