G២០៖ លោកដូណាល់ ត្រាំដើរតួជាអ្នកចង់ផ្សះផ្សា
ចុះផ្សាយនៅថ្ងៃ៖
ស្តាប់ - ០៧:៣៣
ជំនួបកំពូល G20 ដែលប្រមូលផ្តុំ ក្រុមប្រទេសមហាអំណាចឧស្សាហកម្មក្នុងពិភពលោក បានចាប់ផ្តើម បើក នៅថ្ងៃសុក្រទី ២៨ មិថុនា នៅទីក្រុងអូសាកាប្រទេសជប៉ុន។ ថ្លែងបើកជំនួបកំពូល ដែលមានរយៈពេល២ថ្ងៃ នាយករដ្ឋមន្រ្តីជប៉ុន លោកស៊្ហីនហ្សូ អាបេ ក្នុងនាមជាម្ចាស់ផ្ទះ បានអំពាវនាវឲ្យមេដឹកនាំរបស់ក្រុមប្រទេសមហាឧស្សាហកម្ម ស្វែងរកដំណោះស្រាយ ផ្លូវកណ្តាល ជាជាងការប្រឈមមុខដាក់គ្នា។
លោកនាយករដ្ឋមន្រ្តី លោកស៊្ហីនហ្សូ អាបេ ក្នុងនាមជាម្ចាស់ផ្ទះ បានថ្លែងសុន្ទរកថា បើកជំនួបកំពូល ក្នុងក្តីសង្ឃឹមថា ការពិភាក្សាសំណុំរឿងធំៗ នឹងប្រព្រឹត្តទៅដោយរីករាយ សុខដុមរមនា ដូចជាឈ្មោះថ្មី របស់សករាជជប៉ុន “រ៉ៃវ៉ា”។
ជំនួបកំពូលG20 នៅប្រទេសជប៉ុន រៀបឡើង នៅក្នុងបរិបទដែលកំពុងកើតមានសង្រ្គាមពាណិជ្ជកម្ម អាមេរិក ចិន ហើយនិងភាពតានតឹងកាន់តែខ្លាំង នៅឈូងសមុទ្រពែរ្ស នៅក្រោយអ៊ីរ៉ង់បាញ់ទម្លាក់យន្តហោះដ្រូនរបស់អាមេរិក។
ប្រធានាធិបតី អាមេរិកញញឹមរួសរាយ
មេដឹកនាំដែលធ្វើ ដូច សារអំពាវនាវរបស់នាយករដ្ឋមន្រ្តីជប៉ុន គឺលោកដូណាល់ ត្រាំ។ នៅមុនជាន់ដីជប៉ុន លោកប្រធានាធិបតីអាមេរិក បានដំឡើងសំឡេង រិះគន់ មិនថា ប្រទេសសម្ព័ន្ធមិត្ត ឬប្រទេសគូប្រជែង។ លោកដូណាល់ ត្រាំ ធ្លាប់បានសំដែងការមន្ទិលសង្ស័យពីសម្ព័ន្ធភាព ជាមួយជប៉ុន។ នៅថ្ងៃពុធ លោកបាននិយាយប្រាប់ទូទស្សន៍អាមេរិកាំង Fox ថា អាមេរិកត្រៀមជួយជប៉ុនគ្រប់ពេលវេលា។ ប៉ុន្តែ បើសិនអាមេរិកត្រូវគេវាយប្រហារ នោះ ជប៉ុនបានត្រឹមតែមើល ការវាយប្រហារលើអាមេរិក តែតាមទូរទស្សន៍Sony តែប៉ុណ្ណោះ។ លោកដូណាល់ ត្រាំ ធ្លាប់រិះគន់ ចាត់ទុក អាល្លឺម៉ង់ថា ជាសម្ព័ន្ធមិត្តទន់ខ្សោយ ដែលបរាជ័យ។ ជាមួយ ឥណ្ឌាវិញ លោកត្រាំ ក៏មិនលើកលែងដែរ នៅក្រោយឥណ្ឌាប្រកាសដាក់ពន្ធលើទំនិញនាំចូលពីអាមេរិក។
ប៉ុន្តែ នៅថ្ងៃសុក្រ នៅក្នុងជំនួប ផ្ទាល់ ជាមួយមេដឹកនាំ ជប៉ុន ឥណ្ឌា លោកដូណាល់ ត្រាំ បែរជាមានជំហរទន់ភ្លន់ ត្រជាក់ និងនិយាយកោតសរសើរ សមភាគីជប៉ុន ឥណ្ឌា ទៅវិញ។ លោកដូណាល់ ត្រាំ និយាយល្អូកល្អឺនជាមួយ លោកនាយករដ្ឋមន្រ្តីជប៉ុន បន្ទាប់ពីនាយករដ្ឋមន្រ្តីជប៉ុនបង្ហាញបញ្ជីឈ្មោះ ក្រុមហ៊ុនជប៉ុនដែលនឹងទៅសាងសង់រោងចក្រផលិតរថយន្តនៅក្នុងទឹកដីអាមេរិក។ ជាមួយ នាយករដ្ឋមន្រ្តីឥណ្ឌាវិញ ប្រធានាធិបតី អាមេរិក អះអាងថា លោកចង់ចុះសម្រុងជាមួយឥណ្ឌា និងថា លោកកំពុងពិចារណាមើលថា តើឥណ្ឌាអាចចូលរួមក្នុងគម្រោងវិនិយោគ ប្រព័ន្ធ ទូរស័ព្ទទំនើប 5Gរបស់អាមេរិកដែរឬទេ។ នៅក្នុងជំនួបជាមួយលោកស្រី នាយករដ្ឋមន្រ្តីអាល្លឺម៉ង់វិញ លោកដូណាល់ ត្រាំ សរសើរថា លោកស្រី ជាមនុស្សស្រីដ៏អស្ចារ្យ និងសំណាងណាស់ ដែលលោកមានមិត្តភក្តិដូចជាលោកស្រី។
ប្រធានាធិបតីអាមេរិក បង្ហាញផងដែរ ភាពធូរស្រាល ក្នុងសំណុំរឿងអ៊ីរ៉ង់។ ប៉ុន្មានថ្ងៃមុននេះ លោកធ្លាប់បានលើកឡើងពីការវាយប្រហារធ្វើសង្រ្គាមរយៈពេលខ្លី ទៅលើអ៊ីរ៉ង់ នៅក្រោយអ៊ីរ៉ង់ បាញ់ទម្លាក់យន្តហោះដ្រូនរបស់អាមេរិក នៅឈូងសមុទ្រពែរ្ស។ ប៉ុន្តែ នៅថ្ងៃសុក្រនេះ នៅប្រទេសជប៉ុន លោកដូណាល់ ត្រាំបានបន្ធូរបន្ថយភាពតានតឹងមកវិញ ដោយបានអះអាងថា គេមិនចាំបាច់បន្ទាន់រឿងអ៊ីរ៉ង់នោះទេ។ គេនៅមានពេលវេលាច្រើន ដើម្បីដោះស្រាយភាពតានតឹងជាមួយអ៊ីរ៉ង់។
វិមានក្រេមឡាំង៖ លោកពូទីនអញ្ជើញលោកដូណាល់ ត្រាំ ទៅម៉ូស្គូនៅឆ្នាំក្រោយ
លោកដូណាល់ ត្រាំ មានអារម្មណ៍ល្អ ផងដែរ នៅពេលលោកជួបពិភាក្សា ទ្វេភាគីជាមួយ លោកប្រធានាធិបតីរុស្ស៊ី វ្លាឌីមៀរ ពូទីន។ លោកត្រាំបានបញ្ជាក់ពីចំនុចវិជ្ជមាន នៅពេលប្រធានាធិបតីរុស្ស៊ី បាននិយាយអញ្ជើញលោកឲ្យចូលរួមក្នុងពិធីរំលឹកខួប៧៥ឆ្នាំ នៃជ័យជំនះទៅលើអាល្លឺម៉ង់ ក្នុងសង្រ្គាមលោកលើកទី២ ដែលនឹងរៀបចំឡើងនៅម៉ូស្គូ ខែឧសភាឆ្នាំក្រោយ។ ប្រធានាធិបតីអាមេរិក រុស្ស៊ី ញញឹមរាក់ទាក់ដាក់គ្នា នៅក្នុងកាលៈទេសៈដែល ប្រទេសទាំងពីរកំពុងនិយាយ ចោទប្រកាន់គ្នាទៅវិញ ទៅមក ក្នុងរឿងរំលោភសន្ធិសញ្ញាស្តីពីមីស៊ីលបាញ់ចម្ងាយមធ្យម។ នៅថ្ងៃពុធ អាមេរិកដែលបានគំរាមដកខ្លួន ចេញពីសន្ធិសញ្ញាអន្តរជាតិជាមួយ រុស្ស៊ី នៅដើមខែសីហាក្រោយនេះ បាននិយាយប្រាប់រុស្ស៊ីឲ្យបំផ្លាញចោលមីស៊ីលចម្ងាយមធ្យម ដែលអាមេរិក និងអូតង់ ចាត់ទុក ជាគ្រោះថ្នាក់ អាចពាំនាំក្បាលគ្រាប់នុយក្លេអ៊ែរ ទៅវាយប្រហារប្រទេសអឺរ៉ុប។
លោកដូណាល់ ត្រាំ គ្មានចិត្តចង់បញ្ចប់ជម្លោះពាណិជ្ជកម្ម ជាមួយ ចិន
មេដឹកនាំប្រទេសមហាអំណាចឧស្សាហកម្ម បង្ហាញភាពរាក់ទាក់ ស្វាគមគ្នាទៅវិញ ទៅមក នៅមុនពេលជំនួបកំពូលហ្សេ ២០ នៅទីក្រុងអូសាកាត្រូវពិភាក្សា ដោះស្រាយសំណុំរឿងឈឺក្បាល តាំងពីសង្រ្គាមពាណិជ្ជកម្មអាមេរិក ចិន ភាពតានតឹង ខ្លាំងរវាងអាមេរិក និងអ៊ីរ៉ង់ជាដើម។ ជម្លោះ ពាណិជ្ជកម្ម ចិន អាមេរិក ធ្វើឲ្យគ្រប់គ្នាព្រួយបារម្ភ ព្រោះថា នៅពេលមហាអំណាចសេដ្ឋកិច្ចធំទាំងពីរឈ្លោះគ្នា គឺសេដ្ឋកិច្ចពិភពលោក ទាំងមូលដែលរង្គោះរង្គើ។ នយោបាយការពារជាតិនិយម ការកើនឡើងនៃនយោបាយប្រជាភិថុត កំពុងធ្វើឲ្យជំនួបកំពូលពិបាករកបានសេចក្តីថ្លែងការណ៍រួមមួយ ជាពិសេសនៅក្នុងរឿងពាណិជ្ជកម្ម ហើយនិងអាកាសធាតុ។
នៅក្នុងជំនួបកំពូល លើកនេះ មេដឹកនាំរបស់ប្រទេសមហាអំណាច ឧស្សាហកម្មគ្រោងនឹងជជែកផងដែរ ពីការធ្វើកំណែទម្រង់ អង្គការពាណិជ្ជកម្មពិភពលោក ដែលអាមេរិកចាត់ទុកចាស់គំរិល ប៉ុន្តែ រុស្ស៊ី និងចិនវិញ មិនចង់ឲ្យគេប៉ះពាល់ស្ថាប័នអន្តរជាតិមួយនេះទេ។ សម្រាប់មេដឹកនាំចិន និងរុស្ស៊ី អង្គការពាណិជ្ជកម្មពិភពលោកមិនមែនជាបញ្ហា ប៉ុន្តែ អ្វីដែលគ្រោះថ្នាក់ដល់សេដ្ឋកិច្ចពិភពលោក សព្វថ្ងៃ គឺ នយោបាយ ឯកតោភាគី សេដ្ឋកិច្ចការពារជាតិនិយម របស់ប្រទេសអភិវឌ្ឍន៍ដូចជាអាមេរិក។
សង្រ្គាមពាណិជ្ជកម្ម ចិនអាមេរិក៖ សង្ឃឹមដ៏តិចតួច
គេកំពុងរង់ចាំ មើលជំនួបទ្វេភាគី លោកដូណាល់ ត្រាំ និងលោកប្រធានាធិបតីស៊ី ជីនពីង នៅក្រៅក្របខ័ណ្ឌ ហ្សេ ២០ ដែលប្រព្រឹត្តទៅនៅថ្ងៃសៅរ៍ ទី២៩ មិថុនា។ គេមិនសង្ឃឹមថា នៅក្នុងជំនួបទ្វេភាគី លោកដូណាល់ ត្រាំ និងលោកស៊ី ជីនពីង នឹងអាចព្រមព្រៀងគ្នា រកឃើញដំណោះស្រាយរួម ដើម្បីបិទបញ្ចប់ជម្លោះពាណិជ្ជកម្មរវាងប្រទេសទាំងពីរនោះទេ។អ្នកជំនាញជាច្រើនវាយតម្លៃថា ជំនួបរវាងលោកដូណាល់ ត្រាំ ហើយនិងលោក ស៊ី ជីនពីង នៅថ្ងៃសៅរ៍ គ្រាន់តែអាចបន្ធូរបន្ថយភាពតានតឹងឲ្យធ្លាក់ចុះមួយកម្រិត តែប៉ុណ្ណោះ។ អ្វីដែលគេអាចសង្ឃឹមបាន គឺការផ្អាកជម្លោះ មួយរយៈ ពោលគឺអាមេរិក និងចិនមិនគួរចាត់វិធានការសងសឹកគ្នា ដែលនឹងធ្វើឲ្យប្រទេសទាំងពីរ កាន់តែធ្លាក់ផុងជ្រៅ ទៅក្នុងសង្រ្គាមពាណិជ្ជកម្ម ដោយគ្មានថ្ងៃ វិលត្រលប់នោះទេ។
នៅក្នុងសង្រ្គាមពាណិជ្ជកម្ម ភាគីចិន និងអាមេរិក ហាក់មិនបន្ទន់ជំហរដាក់គ្នាទាល់តែសោះ។ អាមេរិកបានគំរាមដំឡើងពន្ធបន្ថែមទៀត លើទំនិញនាំចូលពីចិន ដែលនៅសល់ ជាង ៣០០ពាន់លានដុល្លារ ផ្សេងទៀត។
ចំណែកចិនវិញ ក៏មិនចុះញ៉ម ដែរ។ នៅមុនជួបទ្វេភាគីជាមួយ លោកដូណាល់ ត្រាំទៅទៀត ប្រធានាធិបតីចិន បាន ស្វែងរកការគាំទ្រ ពីមេដឹកនាំប្រទេសផ្សេងទៀត នៅមុនជំនួបហ្សេ២០។ តាមលោកDai Bing អ្នកទទួលខុសត្រូវម្នាក់របស់ក្រសួងការបរទេសចិន នៅមុខមេដឹកនាំក្រុមប្រទេសBRICS លោកប្រធានាធិបតីស៊ី ជីនពីង បាននិយាយព្រមានពីនយោបាយ ការពារជាតិនិយម របស់ក្រុមប្រទេសអភិវឌ្ឍន៍ ដែលកំពុងបំផ្លាញ បទដ្ឋានពាណិជ្ជកម្មពិភពលោក។ ការណ៍នេះនឹងប៉ះពាល់ដល់ផលប្រយោជន៍ របស់ក្រុមប្រទេសកំពុងអភិវឌ្ឍ លុបបាំងជិត សន្តិភាព ហើយនិងស្ថិរភាពពិភពលោកទាំងមូល។
គេវាយតម្លៃថា ការប្រើពាក្យធ្ងន់ៗរបស់លោកប្រធានាធិបតីចិន អាចបញ្ជាក់ថា លោកស៊ី ជីនពីងនឹងប្រកាន់ជំហរ តឹងរ៉ឹង នៅពេលលោកជួបពិភាក្សាជាមួយ លោកដូណាល់ ត្រាំ នៅថ្ងៃ សៅរ៍។
មុនទៅដល់ប្រទេសជប៉ុន លោកដូណាល់ ត្រាំ បានបញ្ជាក់ថា ភាគីចិនចង់ឲ្យមានការផ្អាកសង្រ្គាមពាណិជ្ជកម្ម។ “សេដ្ឋកិច្ចរបស់ចិន កំពុងធ្លាក់ចុះ។ ចិនចង់ឲ្យមានកិច្ចព្រមព្រៀង" នេះជាប្រសាសន៍របស់លោកដូណាល់ ត្រាំ។
ភាគីចិនមិនចង់មានសង្រ្គាមពាណិជ្ជកម្មជាមួយអាមេរិក ប៉ុន្តែ ក៏មិនចង់ចុះចាញ់ ក្រោមសម្ពាធរបស់អាមេរិកដែរ។ កាសែត អាមេរិកាំង Wall Street Journal បានសរសេរថា នៅក្នុងការចរចាពាណិជ្ជកម្ម ដែលជាប់គាំងតាំងពីខែ ឧសភា ប៉េកាំងធ្លាប់បានទាមទារឲ្យអាមេរិក លុបចោលទណ្ឌកម្មលើក្រុមហ៊ុនបច្ចេកវិទ្យា Huawei៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ