តាលីបង់ និង អាហ្វហ្កានីស្ថាន សន្យារៀបចំផែនទីនាំទៅរកសន្តិភាព
នៅថ្ងៃអង្គារនេះ កាតាបានប្រកាសអំពីជោគជ័យនៃកិច្ចពិភាក្សាអន្តរភាគីអាហ្វហ្កានិស្ថាន ដែលប្រព្រឹត្តទៅរយៈពេលពីរថ្ងៃនៅទីក្រុងដូហា។ ជំនួបពិភាក្សាអន្តរអាហ្វហ្កានីស្ថាន ត្រូវបានរៀបចំឡើង ក្នុងកម្មវត្ថុសម្រួលកិច្ចចរចារវាងអាមេរិកនិងតាលីបង់ ដើម្បីឈានទៅដល់ការបិទបញ្ចប់ជម្លោះនៅអាហ្វហ្កានីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
មិនមែនជាកិច្ចព្រមព្រៀងទេ តែជាតំណាងនៃភាពជោគជ័យនិងជាដំណាក់កាលទីមួយ នៃដំណើរឆ្ពោះទៅរកសន្តិភាព។ តំណាងតាលីបង់ និងប្រតិភូអាហ្វហ្កានិស្ថានជាង៦០រូប (ជាសមាជិករដ្ឋាភិបាល ជាអ្នកនយោបាយជាន់ខ្ពស់ ជាតំណាងសង្គមស៊ីវិល បក្សប្រឆាំង ព្រមទាំងស្ត្រីផង) បានសម្រេចចេញសេចក្តីថ្លែងការណ៍រួម សន្យាកាត់បន្ថយអំពើហិង្សា បញ្ចុះចំនួនជនរងគ្រោះស៊ីវិល ឱ្យដល់កំរិតសូន្យ និង ដំឡើងគម្រោងផែនទីចង្អុលផ្លូវទៅរកសន្តិភាព ដោយឈរលើមូលដ្ឋាននៃការបើកកិច្ចចរចាសន្តិភាព ការវិលត្រលប់របស់ជនធ្វើបំលាស់ទីក្នុងផ្ទៃប្រទេស និងដោយឈរលើមូលដ្ឋាននៃការមិនជ្រៀតជ្រែករបស់មហាអំណាចក្នុងតំបន់។
សេចក្តីថ្លែងការណ៍រួម ៧០០ពាក្យ ក៏បានសន្យាគោរពការពារភាពថ្លៃថ្នូររបស់ពលរដ្ឋអាហ្វហ្កានីស្ថាន ជីវិត អចលនៈទ្រព្យ និងមានចែងអំពីគម្រោង ធានាសិទ្ធិស្ត្រីក្នុងវិស័យនយោបាយ សង្គមសេដ្ឋកិច្ច អប់រំ និងវប្បធម៌ ក្នុងក្របខ័ណ្ឌអ៊ីស្លាម។
ជួបពិភាក្សាគ្នារយៈពេលពីរថ្ងៃនៅដូហា ដែលសហការរៀបចំឡើងដោយអាល្លឺម៉ង់ និងកាតា ជាជំនួបលើកទីបី។ កម្មវត្ថុនៃកិច្ចពិភាក្សា គឺស្វែងរកការត្រូវរ៉ូវគ្នាអំពីលក្ខខណ្ឌនៃការចរចាសន្តិភាព។ ប៉ុន្តែកិច្ចពិភាក្សាអន្តរអាហ្វហ្កានីស្ថាននេះប្រព្រឹត្តទៅដោយគ្មានតំណាងអាមេរិក និងតំណាងរដ្ឋាភិបាលក្រុងកាប៊ូលជាផ្លូវការទេ គឺមានត្រឹមតែជាលក្ខណៈបុគ្គលប៉ុណ្ណោះ។ តាលីបង់បានបដិសេធជារហូតមកមិនចរចាដោយផ្ទាល់ជាមួយរដ្ឋាភិបាលកាន់អំណាចអាហ្វហ្កានីស្ថានទេ។
យ៉ាងណាក៏ដោយក៏ជំនួបពិភាក្សាប្រកបដោយជោគជ័យ គឺជាការបើកផ្លូវ សម្រួលឱ្យអាមេរិកនិងតាលីបង់ អាចឈានបញ្ចប់កិច្ចព្រមព្រៀង ដើម្បីសន្តិភាពអាហ្វហ្កានីស្ថាន។ អាមេរិកបានសន្យាដកទ័ពចេញពីអាហ្វហ្កានីស្ថាន ឯតាលីបង់បានសន្យាមិនបណ្តោយឱ្យប្រទេសធ្លាក់ខ្លួនជាជម្រកករបស់ពួកភេរវជន។ អាមេរិក និងតាលីបង់ ក៏ចាប់ផ្តើមបន្តកិច្ចចរចារបស់ខ្លួនទៀត ដោយសង្ឃឹមថានឹងអាចសម្រេចផ្តល់ជារូបរាងនៃកិច្ចព្រមព្រៀងពេញលេញមួយ ឱ្យបានមុខថ្ងៃ២៨កញ្ញា ២០១៩ ថ្ងៃបោះឆ្នោតប្រធានាធិបតីអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ