ចិនប្រកាសដាក់ទណ្ឌកម្មក្រុមហ៊ុនអាមេរិកដែលលក់អាវុធឱ្យតៃវ៉ាន់
ចិនតបតនឹងអាមេរិកដោយជាក់ស្តែងហើយ ! នៅថ្ងៃសុក្រនេះ ប៉េកាំងបានប្រកាសដាក់ទណ្ឌកម្មភ្លាមៗលើក្រុមហ៊ុនអាមេរិកដែលមានពាក់ព័ន្ធនឹងការលក់អាវុធតម្លៃ២២០០លានដុល្លារឱ្យតៃវ៉ាន់។ នេះបើតាមសេចក្តីថ្លែងការណ៍របស់អ្នកនាំពាក្យក្រសួងការបរទេសចិន។ ចិន ដែលចាត់ទុកជាកោះតៃវ៉ាន់ជាបូរណភាពដែនដីរបស់ខ្លួនទាំងមូល។ តើជាទណ្ឌកម្មអ្វីខ្លះ ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
“អាមេរិកលក់អាវុធទៅតៃវ៉ាន់ គឺជាការរំលោភបទដ្ឋានគ្រឹះនៃច្បាប់ និងទំនាក់ទំនងអន្តរជាតិ។ ដូច្នេះដើម្បីការពារផលប្រយោជន៍ជាតិ ចិននឹងដាក់ទណ្ឌកម្មប្រឆាំងនឹងរាល់ក្រុមហ៊ុនអាមេរិកដេលមានពាក់ព័ន្ធនឹងការលក់អាវុធទៅតៃវ៉ាន់” ! ។ នេះជាខ្លឹមសារនៃសេចក្តីថ្លែងការណ៍ដ៏ខ្លី របស់ចិន។ ប៉ុន្តែអ្នកនាំពាក្យក្រសួងការបរទេសចិន មិនបានបញ្ជាក់លម្អិតអំពីប្រភេទនៃទណ្ឌកម្ម និងអំពីឈ្មោះនៃក្រុមហ៊ុនដែលរងវិធានការសងសឹកទេ។
អាមេរិក បើកភ្លើងខៀវលក់សព្វាវុធឲ្យតៃវ៉ាន់ ចំនួន២២០០លានដុល្លារ
នេះមិនមែនជាលើកទីមួយឡើយ ដែលអាមេរិកព្រមលក់អាវុធទៅឱ្យតៃវ៉ាន់។ ហើយជារៀងរាល់លើកចិនតែងសម្តែងការប្រឆាំងជានិច្ច ប៉ុន្តែនៅលើកនេះ ខុសពីទម្លាប់ ចិនប្រកាសដាក់ទណ្ឌកម្មប្រឆាំងនឹងក្រុមហ៊ុនអាមេរិកតែម្តង។
ក្នុងពេលទន្ទឹមគ្នានោះ ស្ទើរក្នុងម៉ោងតែមួយ រដ្ឋមន្ត្រីក្រសួងការបរទេសចិន លោក វ៉ង់ យី ដែលកំពុងបំពេញទស្សនកិច្ចនៅប្រទេសហុងគ្រី បានព្រមានអាមេរិកដោយចំៗ កុំឱ្យសំណុំរឿងតៃវ៉ាន់ មកជ្រលរលេងនឹងភ្លើង។ ពាក្យគំរាមដែលគ្រលាស់ចេញឡើងក្នុងពេលលោកប្រមុខការទូតចិន កំពុងធ្វើសន្និសីទកាសែតរួមជាមួយសមភាគីហុងគ្រីតែម្តង។
សេចក្តីប្រកាសទណ្ឌកម្មនេះ ក៏ធ្លាក់មកជួនចំពេលដែលប្រធានាធិបតីតៃវ៉ាន់ លោកស្រី ត្សៃ អ៊ីនវ៉េន អ្នកឯករាជ្យនិយមតៃវ៉ាន់ កំពុងស្ថិតនៅក្នុងទីក្រុងញូវយ៉ក មុននឹងបន្តដំណើរទៅបំពេញទស្សនកិច្ចការទូតនៅក្នុងប្រទេសជាសម្ព័ន្ធមិត្តក្នុងតំបន់ការ៉ាអ៊ីប។ ចិនខឹងសម្បារខ្លាំងណាស់ នឹងទស្សនកិច្ចនេះ ជាពិសេសចិនហាមហាត់ខាតមិនឱ្យអាមេរិកទទួលអ្នកដឹកនាំនយោបាយជាន់ខ្ពស់តៃវ៉ាន់ឡើយ។
សូមបញ្ជាក់ថា សាធារណរដ្ឋចិនតែងចាត់ទុកតៃវ៉ាន់ជាដែនកោះ ឬខេត្តមួយរបស់ខ្លួន។ ជាដែនកោះដ៏ធំ មានប្រជាជនរស់នៅប្រមាណជាង ២៣លាននាក់ ភាគច្រើនជាជនជាតិហាន ពូជសាសន៍តែមួយនឹងពលរដ្ឋចិនដីគោក តៃវ៉ាន់ ត្រូវបានដឹកនាំនិងប្រកាន់របបនយោបាយផ្ទុយពីប៉េកាំង និងដោយក្រុមប្រឆាំងនឹងរបបកុម្មុយនិស្ត តាំងពីឆ្នាំ១៩៤៩មក។ នៅឆ្នាំ១៩៧៩ ដើម្បីអាចមានទំនាក់ទំនងជាមួយរដ្ឋាភិបាលកុម្មុយនិស្តចិន សហរដ្ឋអាមេរិកបានផ្តាច់ទូតពីតៃវ៉ាន់ តាមគោលការណ៍ចិនតែមួយ។ តែមិនដាច់ប៉ិតដូចកាត់ក្រដាសឡើយ អាមេរិកនៅតែរក្សាភាពជាសម្ព័ន្ធមិត្ត និងជាអ្នកផ្គត់ផ្គង់អាវុធដ៏ចំបងរបស់តៃវ៉ាន់ដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ