តៃវ៉ាន់សន្យាការពារបាតុករហុងកុង
ក្រុងហុងកុងបានក្លាយជាទីលានបាតុកម្ម ជាថ្មីនៅថ្ងៃទី ២០ កក្កដា ២០១៩ នេះ ! តែជាបាតុកម្មប្រឆាំងនឹងអំពើហិង្សា និងដើម្បីគាំទ្រប៉ូលិស ដូច្នេះមានន័យថាជាបាតុកម្មគាំទ្ររដ្ឋាភិបាលហុងកុងដែលស្និទ្ធនឹងប៉េកាំង មិនមែនជាបាតុកម្មរបស់ចលនាប្រឆាំងនឹងច្បាប់ធ្វើបត្យាប័នជនសង្ស័យទៅចិនឡើយទេ។ មេដឹកនាំចលនាប្រឆាំងជាច្រើន បាននាំគ្នារត់គេចខ្លួនចេញពីហុងកុង ទៅតៃវ៉ាន់។ តៃវ៉ាន់ ដែលបានប្រកាសសន្យានៅថ្ងៃសុក្រម្សិលមិញ ថានឹងជួយក្រុមបាតុករទាំងនោះ។ សេចក្តីសម្រេចដែលអាចនឹងធ្វើឱ្យចិនខឹងសម្បារកាន់តែខ្លាំងបន្ថែមទៀតជាក់ជាពុំខាន។
ចុះផ្សាយនៅថ្ងៃ៖ កែប្រែថ្ងៃទី៖
បើតាមសារព័ត៌មានក្នុងស្រុក មានបាតុករហុងកុងប្រមាណពី១០ ទៅ៣០នាក់ ដែលសុទ្ធសឹងជាសកម្មជន នាំគ្នាសម្រុកចូលកាន់កាប់ បំផ្លិចបំផ្លាញរដ្ឋសភាហុងកុង ក្នុងពេលថ្ងៃខួបប្រគល់ហុងកុងមកឱ្យចិន ថ្ងៃទី ១កក្កដា ២០១៩ បានរត់ទៅដល់តៃវ៉ាន់ ដើម្បីគេចខ្លួនពីការតាមចាប់របស់អាជ្ញាធរ និងបានទទួលជំនួយពីអង្គការក្រៅរដ្ឋាភិបាលតៃវ៉ាន់ហើយ។
ក្រុមប្រឹក្សាតៃវ៉ាន់ដែលមានបន្ទុកចាត់ចែងទំនាក់ទំនងជាមួយក្រុងប៉េកាំង មិនបានបញ្ជាក់អំពីការសុំសិទ្ធិជ្រកកោនរបស់ក្រុមបាតុករទាំងនោះទេ។ ប៉ុន្តែ ក្រុមប្រឹក្សាបានចេញផ្សាយសេចក្តីថ្លែងការណ៍មួយធានាអះអាងថា ប្រសិនបើបាតុករសុំ នោះតៃវ៉ាន់នឹងសិក្សាសំណើ ដោយឈរលើគោលការណ៍គោរព ការពារសិទ្ធិមនុស្ស និងមនុស្សធម៌។ គណៈកម្មការនឹងផ្តល់ជំនួយចាំបាច់ដល់គ្រប់ពលរដ្ឋហុងកុងណាដែលកំពុងរងការគំរាមកំហែងសន្តិសុខនិងសេរីភាព ដោយសារទស្សនៈនយោបាយ។
លោកស្រីប្រធានាធិបតីតៃវ៉ាន់ផ្ទាល់ ក៏បានប្រកាសគាំទ្រ គំនិតផ្តួចផ្តើមខាងលើ ជួយមិត្តហុងកុង តាំងពីប្រទេសសាំងលុយស៊ីដែលលោកស្រីកំពុងបំពេញទស្សនកិច្ច។
តៃវ៉ាន់ មិនដែលទទួលស្វាគមន៍ជនភៀសខ្លួនពីចិនដីគោកឡើយ ដោយមិនចង់ឃើញទំនាក់ទំនងជាមួយប៉េកាំងដុនដាបខ្លាំងផង និងខ្លាចមានចរន្តភៀសខ្លួនជាគំហុកមកពីចិនផង។ រដ្ឋធម្មនុញ្ញតៃវ៉ាន់ មិនទទួលស្គាល់សិទ្ធជ្រកកោនទេ។ តៃវ៉ាន់អាចត្រឹមតែផ្តល់ទិដ្ឋាការមនុស្សឬរយៈពេលវែង ម្តងម្កាលដល់ជនបះបោរនយោបាយតែប៉ុណ្ណោះ។
តែនៅថ្ងៃនេះ តៃវ៉ាន់បានប្តូរជំហរ ហ៊ានប្រកាសទទួលយកពលរដ្ឋហុងកុង ដោយចំហ។ បូកផ្សំនឹងបរិបទនៃការរៀបចំបោះឆ្នោតប្រធានាធិបតីតៃវ៉ាន់កាន់តែខិតមកដល់ (នៅខែមករា ២០២០ផង) ប៉េកាំង ពិតជានឹងខឹងសម្បារខ្លាំងជាក់ជាមិនខាន។ ទំនាក់ទំនងជាមួយចិន ជាប្រធានបទដ៏រសើបបំផុត និងជាប្រធានបទស្នូល រាល់គ្រប់ការបោះឆ្នោតប្រធានាធិបតីនៅតៃវ៉ាន់។
តាំងពីឡើងដឹកនាំប្រទេស នៅឆ្នាំ២០១៦មក តៃវ៉ាន់របស់លោកស្រី Tsai Ing-wen ដែលឈរឈ្មោះជាបេក្ខនារីប្រធានាធិបតីជាថ្មី មានទំនាក់ទំនងធ្លាក់ចុះជាលំដាប់ជាមួយចិន មិនថាជាទំនាក់ទំនងការទូត យោធា និងសេដ្ឋកិច្ចឡើយ ព្រោះលោកស្រី និងគណបក្សលោកស្រី មិនទទួលស្គាល់គោលការណ៍ចិនតែមួយ ដែលថាតៃវ៉ាន់ជាចំណែកមួយរបស់ចិនទេ ផ្ទុយស្រលះពីជំហររបស់បក្សប្រឆាំងតៃវ៉ាន់ Kuomintang ដែលមាននិន្នាការទេរទៅស្និទ្ធនឹងប៉េកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ