មាតុភូមិនិវត្តន៍ជនជាតិរ៉ូហ៊ីងយ៉ា៖ ភូមានឹងបន្តចរចាជាមួយ មេក្រុមរ៉ូហ៊ីងយ៉ា នៅបង់ក្លាដែស
អាជ្ញាធរភូមានឹងបន្តចរចាស្តីពីការធ្វើមាតុភូមិនិវត្តន៍ជនជាតិភាគតិចរ៉ូហ៊ីងយ៉ា ដែលបានរត់គេចខ្លួនពីអំពើហិង្សានៅរដ្ឋរ៉ាឃីន និងដែលកំពុងរស់ជ្រកកោន ក្នុងជំរំភៀសខ្លួននៅទឹកដីបង់ក្លាដែស។ នៅថ្ងៃអាទិត្យ ទី ២៨កក្កដា មន្រ្តីបង់ក្លាដែសបានអះអាងថា ការចរចារវាងភាគីភូមា ហើយនិងអ្នកតំណាងរ៉ូហ៊ីងយ៉ា នៅក្នុងជំរំ Cox’s Bazar នឹងបន្តមានតទៅទៀត បន្ទាប់ពីមានសញ្ញាវិជ្ជមានស្តីពីការវិលត្រលប់របស់ជនភៀសខ្លួន ទៅប្រទេសភូមា។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងរយៈពេលជិតមួយឆ្នាំ នេះជាលើកទី២ ដែលគណៈប្រតិភូភូមាធ្វើដំណើរទៅជំរំជនភៀសខ្លួន ក្នុងទឹកដីបង់ក្លាដែស ដើម្បី បញ្ចុះបញ្ចូលប្រជាជនរ៉ូហ៊ីងយ៉ា ឲ្យយល់ព្រមវិលត្រលប់ ទៅរដ្ឋរ៉ាឃីន ភាគខាងជើងភូមា។ កាលពីខែ តុលាឆ្នាំមុន អ្នកតំណាងប្រជាជនភាគតិចរ៉ូហ៊ីងយ៉ាធ្លាប់បានបដិសេធ មិនចូលរួមក្នុងកម្មវិធីធ្វើមាតុភូមិនិវត្តរៀបចំដោយអាជ្ញាធរភូមា ដោយហេតុផលថា ពួកគេនឹងអាចប្រឈមនឹងគ្រោះថ្នាក់ សន្តិសុខ បើសិនគ្មានការធានាច្បាស់លាស់ពីរដ្ឋាភិបាលភូមា។
នៅថ្ងៃសៅរ៍ គណៈប្រតិភូភូមា ដឹកនាំដោយលេខាអចិន្ត្រៃយ៍របស់ក្រសួងការបរទេស និងអមដំណើរដោយអ្នកតំណាងរបស់ក្រុមប្រទេសអាស៊ាន បានធ្វើដំណើរទៅជំរំភៀសខ្លួន Cox’s Bazarក្នុងទឹកដីបង់ក្លាដែស ដើម្បី ពន្យល់ប្រជាជនភាគតិចរ៉ូហ៊ីងយ៉ា ពីដំណើររៀបចំ ធ្វើមាតុភូមិនិវត្តន៍ទៅរដ្ឋរ៉ាឃីន។
តាមលេខាអចិន្រ្តៃយ៍ របស់ក្រសួងការបរទេសភូមា ការជួបពិភាក្សាជាមួយមេក្រុមអ្នកតំណាងជនភៀសខ្លួនរ៉ូហ៊ីងយ៉ា កាលពីថ្ងៃសៅរ៍ផ្តោតទៅលើទិដ្ឋភាពបី។ ទី១ គឺការបន្តការចរចារវាងភាគីទាំងពីរ។ ទី២ ការចូលរួមរបស់គណៈប្រតិភូអាស៊ាន ក្នុងការពិភាក្សា។ ចំណែកទី៣ គឺភូមានឹងបើកការពិភាក្សាជាមួយក្រសួងបង់ក្លាដែស ដើម្បីនិយាយពីមាតុភូមិនិវត្តន៍ ជនជាតិភាគតិច រ៉ូហ៊ីងយ៉ា កាន់សាសនាហិណ្ឌូ ហើយនិងរ៉ូហ៊ីងយ៉ាកាន់គ្រិស្តសាសនា។
តាមមេដឹកនាំក្រុមរ៉ូហ៊ីងយ៉ា កាន់សាសនាអ៊ីស្លាម គេបានរាយរ៉ាប់ ប្រាប់គណៈប្រតិភូភូមា ពីលក្ខខណ្ឌ ចង់បានរបស់ប្រជាជនរ៉ូហ៊ីងយ៉ា នោះ គឺ សញ្ជាតិ សុវត្ថិភាព ហើយនិងសន្តិសុខ នៅពេលពួកគេត្រលប់ទៅរស់នៅរដ្ឋរ៉ាឃីន។ មួយវិញទៀត ពួកគេចង់ត្រលប់ទៅរស់នៅតាមភូមិផ្ទះសម្បែងចាស់របស់ពួកគេ ប៉ុន្តែ មិនមែននៅក្នុងជំរំដែលរៀបចំឡើងកងទ័ពភូមានោះទេ។ មេដឹកនាំក្រុមរ៉ូហ៊ីងយ៉ា កាន់គ្រឹស្តសាសនាវិញ ទាមទារចង់បានការគោរព ប្រតិបត្តិសាសនាដោយសេរី នៅពេលត្រលប់ទៅរស់នៅរដ្ឋរ៉ាឃីន។
អ្នកតំណាងជនជាតិរ៉ូហ៊ីងយ៉ា បានលើកឡើងពីសញ្ញាវិជ្ជមាន នៅពេលគណៈប្រតិភូយល់ព្រមស្តាប់ និងត្រលប់មកផ្តល់ចម្លើយ នៅ២ខែខាងមុខ។
ការទន្ទឹងចង់បានរបស់ជនជាតិរ៉ូហ៊ីងយ៉ា ជាពិសេសនៅក្នុងរឿងទទួលសញ្ជាតិ ភូមា នឹងអាចបរាជ័យ ព្រោះថា ភូមារហូតមក បដិសេធមិនផ្តល់សញ្ជាតិ ដល់ជនជាតិភាគតិចរ៉ូហ៊ីងយ៉ាដែលកងទ័ពភូមាចាត់ទុកជាជនអន្តោប្រវេសន៍ ខុសច្បាប់ ឆ្លងមកពីប្រទេសបង់ក្លាដែស។
អំពើហិង្សា ដែលកើតឡើងមកពីការប៉ះទង្គិចគ្នារវាងកងទ័ពភូមា ហើយនិងឧទ្ទាមរ៉ូហ៊ីងយ៉ា នៅឆ្នាំ ២០១៧ បានជំរុញឲ្យប្រជាជនរ៉ូហ៊ីងយ៉ាជាង ៧សែននាក់ រត់ចាកចេញពីរដ្ឋរ៉ាឃីន សំដៅ ប្រទេសជិតខាង បង់ក្លាដែស។ ការកកកុញ ជនភៀសខ្លួនរ៉ូហ៊ីងយ៉ានៅក្នុងជំរំស្អេកស្កះ ក្នុងទឹកដីបង់ក្លាដែសបានបណ្តាលឲ្យប្រទេសជិតខាងទាំងពីរ មើលមុខមិនចំ។ នៅពេលបង់ក្លាដែសអះអាងថា នឹងមិនបង្ខំចាប់បញ្ជូន ជនជាតិរ៉ូហ៊ីងយ៉ាទៅភូមា រដ្ឋាភិបាលភូមាឯណោះ កំពុងប្រឈមការដាក់សំពាធពីសហគមន៍អន្តរជាតិ ដែលទាមទារឲ្យភូមាយល់ព្រមទទួល និងផ្តល់សញ្ជាតិ ភូមា ដល់ប្រជាជនរ៉ូហ៊ីងយ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ