ហុងកុង បញ្ជូនបាតុករ៤៤នាក់ទៅតុលាការពីបទធ្វើកុប្បកម្ម
បាតុករជាសកម្មជនប្រជាធិបតេយ្យហុងកុង ចំនួន៤៤នាក់ ត្រូវបានបញ្ជូនទៅកាន់តុលាការនៅថ្ងៃនេះ ដោយរងការចោទប្រកាន់ពីបទចូលរួមធ្វើកុប្បកម្ម។ សេចក្តីសម្រេចដែលធ្លាក់មកតែ២៤ម៉ោងក្រោយប្រតិកម្មរបស់ប៉េកាំងនេះ អាចនឹងជំរុញឱ្យមានភាពតានតឹងកាន់តែខ្លាំង និងការប្រឈមមុខជាថ្មី រវាងក្រុមសកម្មជនគាំទ្របាតុករនិងប៉ូលិស។
ចុះផ្សាយនៅថ្ងៃ៖
អាជ្ញាធរហុងកុងបានប្រកាស នៅល្ងាចថ្ងៃអង្គារម្សិលមិញថា នៅក្នុងចំណោមបាតុករដែលចាប់ខ្លួនបាន មាន៤៤នាក់នឹងត្រូវបញ្ជូនទៅតុលាការ នៅថ្ងៃពុធនេះ ក្រោមបទចោទប្រកាន់ ធ្វើកុប្បកម្ម។ ការចូលរួមធ្វើកុប្បកម្មជាបទល្មើសដែលអាចជាប់ទោសដល់ទៅ១០ឆ្នាំក្នុងពន្ធនាគារ។
គ្រាន់តែសេចក្តីជូនដំណឹងត្រូវបានប្រកាសឡើងភ្លាម ភាពប្រឈមបានផ្ទុះឡើងភ្លាមដែរ នៅ មុខទីស្នាក់ការប៉ូលិសសង្កាត់ Kwai Chung ទីដែលមានឃុំខ្លួនបាតុករទាំងនោះ។ ប៉ុន្តែកងកម្លាំងប្រយុទ្ធប្រឆាំងនឹងអំពើហិង្សាកុប្បកម្មបានប្រើមធ្យោបាយធំបាញ់ឧស្ម័នបង្ហូរទឹកភ្នែក ទៅហ្វូងបាតុករដែលមានគ្នាជាច្រើនរយនាក់។ នេះបើតាមប្រភពសារព័ត៌មាន ដោយបានរៀបរាប់ទៀតថា ប៉ូលិសប្រដាប់ដោយអាវុធ និងខែល បានស្ទុះចេញពីទីស្នាក់ការទៅបំបែកហ្វូងបាតុករ ដែលប្រើដបជ័រនិងឆ័ត្រគប់មកលើប៉ូលិស និងដែលគូសវាសយ៉ាងក្រវេមក្រវាមពេញជញ្ជាំងប៉ុស្តិ៍ប៉ូលិស។
ហើយតាំងពីព្រឹកថ្ងៃពុធនេះ ថ្វីបើមានភ្លៀងខ្យល់ខ្លាំងយ៉ាងណា ក៏សកម្មជនប្រជាធិបតេយ្យជាច្រើនផ្សេងទៀត បានមកផ្តុំជុំគ្នានៅក្បែរតុលាការ ស្រែកទាមទារឱ្យដោះលែងបាតុករជាប់ចោទ។ នៅខាងក្នុងតុលាការវិញ បាតុករជាប់ចោទ (ជានិស្សិត គិលានុបដ្ឋាក ជាអ្នកបើកបរយន្តហោះ ជាជាងកាត់សក់ ជាចុងភៅ ជាកម្មករ ឬជាអ្នកឥតការងារធ្វើ) ភាគច្រើន សុទ្ធតែមានទឹកមុខស្ងប់ស្ងាត់ នៅដែលត្រូវបានបង្ហាញខ្លួន ម្តងម្នាក់ៗ នៅចំពោះមុខអង្គសវនាការ និងចៅក្រម។ តុលាការ បានសម្រេចធ្វើការចោទប្រកាន់ជាផ្លូវការពីបទបានចូលរួមធ្វើកុប្បកម្ម កាលពីថ្ងៃអាទិត្យ តែបានដោះលែងបាតុករទាំងនោះឱ្យនៅក្រៅឃុំដោយមានលក្ខខណ្ឌជាថ្នូរ។
សូមបញ្ជាក់ថា ហុងកុងអតីតដែនដីក្រោមអាណានិគមអង់គ្លេសបានឆ្លងវិបត្តិដ៏ធ្ងន់ធ្ងរ ដោយមានមហាបាតុកម្មទ្រង់ទ្រាយធំ តាំងពីថ្ងៃទី ៩មិថុនាមក ជាទូទៅដោយសន្តិវិធីទេ ដើម្បីប្រឆាំងនឹងគម្រោងច្បាប់ធ្វើបត្យាប័នទៅចិនប៉េកាំង តែក៏មានការរាលដាលប៉ះទង្គិចដ៏ហិង្សាជាមួយប៉ូលិសជាមួយក្រុមសកម្មជនប្រឆាំងជ្រុលនិយម។ អំពើហិង្សាខ្លាំងបំផុត គឺកាលពីថ្ងៃអាទិត្យ នៅមុខការិយាល័យទំនាក់ទំនងជាមួយចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ