បាតុកម្មហុងកុង៖ ប៉េកាំងបង្ហាញដំបងដែក និងរថពាសដែក នៅក្នុងវីដេអូឃោសនាក្រសួងការពារជាតិចិន
រថពាសដែក កងទ័ពចិនប្រដាប់ដោយអាវុធគ្រប់ដៃ និងដំបងដែកបង្រ្កាបបាតុករ។ ទាំងនេះ មាននៅក្នុងវីដេអូ ឃ្លីប ឃោសនារយៈពេល៣នាទី ដែលកងយោធភូមិភាគចិន នៅទីក្រុងហុងកុង បានបង្ហោះផ្សព្វផ្សាយ កាលពីថ្ងៃពុធ ទី៣១ កក្កដា ២០១៩ ថ្ងៃដែលបាតុករហុងកុង ជាង ៤០នាក់ ឡើងបង្ហាញមុខ នៅតុលាការក្នុងបទចោទប្រកាន់ចូលរួម ធ្វើកុប្បកម្ម នៅក្នុងអំឡុងបាតុកម្មប្រឆាំងរដ្ឋអំណាចហុងកុង កាលពីដើមខែកក្កដា។
ចុះផ្សាយនៅថ្ងៃ៖
វីដេអូឃ្លីបឃោសនារយៈពេល ៣នាទី ដែលកងយោធភូមិភាគចិន ប្រចាំនៅហុងកុង បង្ហោះផ្សាយ តាមអ៊ីនធ័រនែត កាលពីថ្ងៃពុធ បង្ហាញ ពីរថពាសដែក ឧទ្ធម្ភាចក្រ មីស៊ីល ហើយនិងក្រុមប្រឆាំងភេរវកម្ម នៅសមយុទ្ធ មួយ ជាមួយនឹងពាក្យស្លោកថា កងទ័ពចិន មានជំនឿទុកចិត្ត ហើយនិងសមត្ថភាពដើម្បី ធានារក្សា សន្តិសុខនៅទីក្រុងពាក់កណ្តាលស្វយ័ត ហុងកុង។
នៅក្នុងសមយុទ្ធដែលធ្វើឡើង នៅភាគខាងត្បូងហុងកុង មានផងដែរ ការហាត់សម បង្រ្កាបក្រុមបាតុកម្ម ដែលនៅក្នុងនោះ ទាហានចិន បំពាក់ដោយអាវុធ គ្រប់ដៃ និងមានជំនួយពីឡានទឹក បើកប្រតិបត្តិការ បង្រ្កាប ទៅលើបាតុករ ដោយប្រើគ្រាប់បែកផ្សែង បង្ហូរទឹកភ្នែក ឬដំបងដែក។ វីដេអូឃ្លីបបានបិទបញ្ចប់ជាមួយនឹងទាហានចិន ចាប់អូស បាតុករដែលមានដៃជាប់ខ្នោះទៅក្រោយ សំដៅ កន្លែងដែលមានស្លាកសញ្ញា សំគាល់ថា ជាមន្ទីរឃុំឃាំង។
នេះជាលើកទី១ ដែល យោធភូមិភាគ ចិន នៅទីក្រុងហុងកុង បង្ហាញវីដេអូ ស្តីពីសមយុទ្ធបង្រ្កាបបាតុកម្ម។ យោធភូមិភាគចិន ដែលមានប្រមូលផ្តុំដោយទាហានចិនរាប់ពាន់នាក់ ត្រូវបានប្រទេសចិន បង្កើត តាំងទី នៅទីក្រុងហុងកុង ចាប់តាំងអង់គ្លេសប្រគល់ ហុងកុង ទៅឲ្យចិន គ្រប់គ្រង នៅឆ្នាំ ១៩៩៧។
វីដេអូបង្ហាញសាច់ដុំយោធាចិន ទៅលើក្រុមបាតុកម្ម ត្រូវបានផ្សព្វផ្សាយ នៅមួយសប្តាហ៍ក្រោយ ទីក្រុងប៉េកាំងបានគំរាមថា នឹងអាចដាក់ពង្រាយ កងទ័ពចិន នៅតាមផ្លូវ ក្នុងទីក្រុងហុងកុង ក្នុងករណីមានសំណើពីរដ្ឋអំណាចហុងកុង។
តាំងពីមានមហាបាតុកម្មរបស់ប្រជាជនហុងកុង ប្រឆាំងនឹងសេចក្តីព្រាងច្បាប់ស្តីពីការធ្វើបត្យាប័នជនសង្ស័យទៅប្រទេសចិន ប៉េកាំង នៅស្ងៀម ទុកឲ្យអាជ្ញាធរហុងកុង ជាអ្នកចាត់ចែង ដោះស្រាយវិបត្តិនៅហុងកុងដោយខ្លួនឯង។ ប៉ុន្តែ ប្រឈមនឹងបាតុកម្មហុងកុង ដែលបានប្រែក្លាយជាបាតុកម្មហិង្សា នៅប៉ុន្មានសប្តាហ៍មកនេះ រដ្ឋអំណាចចិនដីគោក កាលពីថ្ងៃចន្ទ បានព្រមានជាថ្មី មិនអត់ឱនឲ្យមានបាតុកម្មហិង្សា រីកសាយភាយ នៅហុងកុង។ កាលពីថ្ងៃពុធ តុលាការហុងកុងបានចាប់ផ្តើមសវនាការ ជំនុំជម្រះ បាតុករ ហុងកុងជាង ៤០នាក់ ដែលអាជ្ញាធរចាប់ខ្លួន និងចោទប្រកាន់ពីបទ ចូលរួមក្នុងកុប្បកម្ម ប្រព្រឹត្តអំពើហិង្សា វាយសម្រុកចូលរដ្ឋសភា ហុងកុង កាលពីដើមខែ កក្កដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ