ហុងកុង៖កម្លាំងប៉ូលិសបានវាយបំបែកហ្វូងបាតុករដោយប្រើគ្រាប់បែកផ្សែងបង្ហូរទឹកភ្នែក
ស្ថានការណ៍កំពុងបន្តពុះកញ្ជ្រោលខ្លាំងនៅហុងកុង។ពេញមួយថ្ងៃសៅរ៍ ទី១០ សីហា ក្រុមអ្នកប្រជាធិបតេយ្យបាននាំគ្នាធ្វើបាតុកម្មជាថ្មីដើម្បីទាមទារឲ្យរដ្ឋអំណាចហុងកុងដកចេញជាស្ថាពរនូវសេចក្តីព្រាងច្បាប់ស្តីពីការធ្វើបត្យាប័នជនសង្ស័យហុងកុងទៅកាត់ទោសនៅចិនដីគោក។ ក្រៅពីក្រុមសកម្មជនអ្នកប្រជាធិបតេយ្យ ក្បួនបាតុកម្មក៏មានការចូលរួមគាំទ្រពីពលរដ្ឋហុងកុង ពិសេសក្រុមមនុស្សចាស់។ ក៏ដូចជាបាតុកម្មមុនៗ កម្លាំងប៉ូលិសបានបើកប្រតិបត្តិការបង្រ្កាបដោយបាញ់គ្រាប់បែកផ្សែងបង្ហូរទឹកភ្នែក។ ទន្ទឹមនឹងក្បួនបាតុកម្មនៅតាមដងផ្លូវ ក្រុមបាតុករក៏បានបន្តជួបជុំបោះជំរំនៅអាកាសយានដ្ឋានដើម្បីទាញចំណាប់អារម្មណ៍ពីក្រុមអ្នកដំណើរបរទេសដែលចូលលេងហុងកុងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
ក្រុមបាតុករដែលមានពាក់អាវយឺតខ្មៅ និងពាក់មួកកម្មករសំណង់ពណ៌លឿងជាសញ្ញាសម្គាល់បានដង្ហែរក្បួនដោយគ្មានការអនុញ្ញាតនៅសង្កាត់តៃប៉ូស្ថិតប៉ែកខាងជើងហុងកុងក្បែរនឹងព្រំដែនជាមួយចិនដីគោក។ នៅពីមុខស្នងការដ្ឋានដែលការពារយ៉ាងរឹងមាំពីកម្លាំងប៉ូលិសក្នុងឯកសណ្ធានប្រឆាំងកុបកម្ម ហ្វូងបាតុករបានអំពាវពាវឲ្យរំដោះហុងកុងចេញពីអំណាចផ្តាច់ការ។ រីឯនៅខាងកម្លាំងប៉ូលិសវិញ គេឃើញមានការលើកបដាពណ៌ខៀវដោយសរសេរថា ការជួបជុំនេះជាការរំលោភច្បាប់។ ចូរអស់លោកបំបែកក្បួន ឬមួយយើងប្រើកម្លាំងដើម្បីបំបែក។ ដើម្បីបញ្ជៀសការប្រឈមទល់នឹងកម្លាំងប៉ូលិស ក្រុមបាតុករក៏បានបំបែកគ្នាជាក្រុមតូចៗទៅជួបជុំនៅទីតាំងផ្សេងជាច្រើនកន្លែង។
ទោះជាយ៉ាងនេះក្តី កម្លាំងប៉ូលិសក៏បានចែកគ្នាជាក្រុមដើម្បីតាមក្រុមបាតុករ ហើយនៅពេលព្រលប់ឈានមកដល់ កម្លាំងប៉ូលិសក៏បានបើកប្រតិបត្តិការបំបែកហ្វូងបាតុករដោយប្រើគ្រាប់បែកផ្សែងបង្ហូរទឹកភ្នែក។ អ្វីជាការកត់សម្គាល់ គេក៏ឃើញមានក្រុមគ្រួសារជាច្រើនរយគ្រួសារជាមួយនឹងរទេះរុញក្មេង រួមទាំងកាន់ប៉េងប៉ោងក្នុងដៃបានចុះផ្លូវដង្ហែរក្បួនគាំទ្រដល់ចលនាអ្នកប្រជាធិបតេយ្យនៅហុងកុង។ ទន្ទឹមនឹងការជួបជុំពីក្រុមគ្រួសារ ក៏មានការជួបជុំពីក្រុមមនុស្សចាស់ដោយគេដាក់ឈ្មោះ « សក់ស្កូវ » និងបាននាំញត្តិគាំទ្រដល់ចលនាអ្នកប្រជាធិបតេយ្យទៅប្រគល់ឲ្យស្នងការដ្ឋាននគរបាល និងការិយាល័យរបស់ប្រមុខរដ្ឋអំណាចហុងកុងលោកស្រីការី ឡាំ។
ដោយឡែក ក្រុមបាតុករអ្នកប្រជាធិបតេយ្យដែលបានជួបជុំបោះទីតាំងនៅអាកាសយានដ្ឋានតាំងពីថ្ងៃសុក្រ ទី៩ សីហានឹងបន្តស្ថិតនៅទីនោះពេញមួយថ្ងៃអាទិត្យ ទី១១ សីហានេះដើម្បីទាញចំណាប់អារម្មណ៍របស់ក្រុមអ្នកដំណើរបរទេសដែលចូលលេងហុងកុង។ គួររម្លឹកថា ចលនាបាតុកម្មរបស់ក្រុមអ្នកប្រជាធិបតេយ្យហុងកុងបានកើតចេញពីសេចក្តីព្រាងច្បាប់ស្តីពីការធ្វើបត្យាប័នជនសង្ស័យហុងកុងទៅកាត់ទោសនៅចិនដីគោក។ សេចក្តីព្រាងច្បាប់មួយនេះត្រូវបានលោកស្រីការី ឡាំព្យួរ តែក្រុមបាតុករកំពុងបន្តទាមទារឲ្យដកចេញជាស្ថាពរ។ ឥឡូវនេះ ក្បួនបាតុកម្មដែលអូសបន្លាយ និងកាន់តែរីកធំទៅៗបានឈានដល់ការទាមទារផ្សេងទៀត រួមមាន ការបោះឆ្នោតជ្រើសរើសប្រមុខដឹកនាំហុងកុងជាសកលដោយគ្មានការតែងតាំងពីចិនដីគោក និងបើកការស៊ើបអង្កេតលើអំពើហិង្សារបស់ប៉ូលិសលើពួកបាតុករ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ