ភូមា ៖ ពួកឧទ្ទាមប្រដាប់អាវុធ បើកការវាយប្រហារលើយោធា
ក្រុមឧទ្ទាមប្រដាប់អាវុធភូមា បានបើកការវាយប្រហារជាច្រើន នៅភាគខាងជើងប្រទេស ក្នុងថ្ងៃព្រហស្បតិ៍ទី ១៥សីហា ២០១៩នេះ។ ជាលើកទីមួយ សាលារៀនយោធាមួយបានក្លាយជាផ្ទាំងស៊ីបនៃការវាយប្រហារ។ មានស្លាប់យ៉ាងហោចណាស់ ១៤នាក់ ខ្លះជាប៉ូលិស ខ្លះជាទាហាន ព្រមទាំងជនស៊ីវិល និងអ្នករងរបួសជាច្រើននាក់ផ្សេងទៀត។ តុល្យការនៃជនរងគ្រោះអាចនឹងឡើងខ្ពស់ទៀត ព្រោះការវាយប្រហារនៅមិនទាន់បញ្ចប់ទេ គិតត្រឹមល្ងាចថ្ងៃព្រហស្បតិ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
សាលាយោធា ក្នុងក្រុងទេសចរណ៍ Pyin Oo Lwin ក្បែរក្រុងMandalay ស្ពាន និងប៉ុស្តិ៍ប៉ូលិស នៅភាគឦសានប្រទេស បានក្លាយជាផ្ទាំងស៊ីបនៃការវាយប្រហារ ខ្លះដោយប្រើគ្រាប់រ៉ុកកែតផង។
ជាការវាយប្រហារដែលរៀបចំនិងសហការគ្នា ដោយសម្ព័ន្ធក្រុមប្រដាប់អាវុធភាគខាងជើងដែលជាបណ្តុំក្រុមជនជាតិភាគតិចប្រដាប់អាវុធ មានជាអាទិ៍ ក្រុមយោធារំដោះជាតិTaaung នៅរដ្ឋចាន់Shan ក្រុមប្រដាប់អាវុធអារ៉ាកាន ដែលបង្កសកម្មភាពឧទ្ទាមប្រឆាំងនឹងយោធាភូមា តាំងពីជាច្រើនខែមកហើយ នៅរដ្ឋអារ៉ាកាន ភាគខាងលិចប្រទេស និងសម្ព័ន្ធប្រជាធិបតេយ្យជាតិម៊ីយ៉ាន់ម៉ា។ យោធាភូមាក៏បានសម្រេចចិត្តបើប្រតិបត្តិការវាយតបតវិញ។
ពួកឧទ្ទាមប្រដាប់អាវុធបានពន្យល់អំពីមូលហេតុនៃការវាយប្រហារនេះ ថាជាការវាយបកប្រឆាំងនឹងគំនាបរបស់យោធាភូមា មកលើជនជាតិភាគតិចនៅក្នុងតំបន់។ យោធាភូមា តាំងពីខែកក្កដាមក បានបើកយុទ្ធនាការប្រឆាំងនឹងមជ្ឈមណ្ឌលផលិតគ្រឿងញៀន នៅក្នុងរដ្ឋShan ដោយបានរឹបអូសគ្រឿងញៀន ម៉េតាមហ្វេតាមីន ក្នុងបរិមាណរាប់សិបរយគីឡូក្រាម។ តំបន់ដែលបានក្លាយជាជង្រុកផលិតគ្រឿងញៀនសំយោគដ៏សំខាន់ជាងគេបំផុតមួយនៅលើពិភពលោក។ ដោយសារ គ្រឿងញៀននេះ ទើបក្រុមឧទ្ទាមប្រដាប់អាវុធ ព្រមទាំងឧទ្ទាមជនជាតិភាគតិចជាច្រើនផ្សេងទៀត អាចលុយនិងឈ្លោះគ្នាតាំងពីជាច្រើនទសវត្សរ៍មក ដើម្បីបានគ្រប់គ្រងប្រមូលធនធានធម្មជាតិដ៏សម្បូរបែបក្នុងតំបន់។ វត្តមាន និងគម្រោងវិនិយោគហេដ្ឋារចនាសម្ព័ន្ធក្នុងតំបន់របស់ចិន បានធ្វើក្រុមប្រដាប់អាវុធកាន់តែស្រក់ទឹកមាត់ចង់ក្រសោបដីដែលកាន់តែមានតម្លៃឡើងៗថែមទៀត។
កាលពីពីរបីថ្ងៃមុន ក្រុមឧទ្ទាមនេះ ធ្លាប់បានគំរាមធ្វើការសងសឹកម្តងហើយ ប្រសិនបើយោធាមិនបញ្ឈប់យុទ្ធនាការបោសសម្អាតគ្រឿងញៀនទេ។ យោធាភូមាបានសម្រេចបន្តបទឈប់បាញ់ជាឯកតោភាគីរហូតដល់ដំណាច់ខែសីហា ប៉ុន្តែគ្មានអ្នកគោរពទេ នេះបើតាមពាក្យចោទរបស់ពួកឧទ្ទាម។
ការវាយប្រហារថ្មីនេះ ស្តែងឱ្យឃើញអំពីបរាជ័យនៃការចរចាសន្តិភាព។ ថ្វីបើលោកស្រីអ៊ុងសានស៊ូជី ធ្លាប់បានសន្យា ប្រឹងជំរុញការចរចារកសន្តិភាព តាំងពីនៅពេលឡើងកាន់អំណាចភ្លាមមែន តែជម្លោះប្រដាប់អាវុធបានកើនឡើងយ៉ាងខ្លាំង នៅតាមតំបន់ជាច្រើនរបស់ភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ