លេខទូរស័ព្ទរបស់អ្នកប្រើប្រាស់ហ្វេសប៊ុកជាង៤០០លាននាក់ លេចធ្លាយទៅក្នុងបណ្តាញអ៊ីនធ័រនែត
លេខទូរស័ព្ទ និងព័ត៌មានផ្ទាល់ខ្លួនរបស់អ្នកប្រើប្រាស់ហ្វេសប៊ុក ជាង៤០០លាននាក់ ត្រូវបានគេឃើញ ស្តុកទុក នៅក្នុងបណ្តាញអ៊ីនធ័រនែត ដែលអ្នកណាក៏អាចចូលយកទៅប្រើប្រាស់បាន ដោយមិនចាំបាច់ត្រូវប្រើពាក្យ ឬលេខសម្ងាត់។ នេះបើតាមការចុះផ្សាយរបស់ វិបសៃតិ៍ ព័ត៌មានស្តីពីបច្ចេកវិទ្យាអាមេរិកាំងមួយ ឈ្មោះ TechCrunch។ ក្រុមហ៊ុនហ្វេសប៊ុកបានបញ្ជាក់ព័ត៌មាននេះ កាលពីថ្ងៃពុធម្សិលមិញ។ ការបែកធ្លាយទិន្នន័យរបស់អ្នកប្រើប្រាស់ ទៅក្នុងដៃជនទី៣ ជារឿងអាស្រូវថ្មីមួយទៀត របស់ ក្រុមហ៊ុនហ្វេសប៊ុក ដែលធ្លាប់រងការចោទប្រកាន់ថា បានធ្វេសប្រហែសក្នុងការការពារទិន្នន័យរបស់អ្នកប្រើប្រាស់។
ចុះផ្សាយនៅថ្ងៃ៖ កែប្រែថ្ងៃទី៖
តាមការចុះផ្សាយរបស់វិបសៃតិ៍ព័ត៌មានអាមេរិកាំង TechCrunch លេខទូរស័ព្ទ របស់អ្នកប្រើប្រាស់ហ្វេសប៊ុក ជាង ៤០០លាននាក់ ត្រូវបានគេឃើញស្តុកទុក នៅក្នុងបណ្តាញអ៊ីនធ័រនែតមួយ ដែលមិនមែនជាកម្មសិទ្ធិរបស់ក្រុមហ៊ុនហ្វេសប៊ុក។ នៅក្នុងចំណោម គណនីហ្វេសប៊ុក ជាង៤០០លាន ដែលមានលេខទូរស័ព្ទ លេចធ្លាយ ធ្លាក់ទៅក្នុងដៃរបស់ជនទី៣ មាន ១៣៣លានគណនី នៅអាមេរិក ៥០លាន នៅប្រទេសវៀតណាម និង១៨លាន នៅប្រទេសអង់គ្លេស។
ក្រៅពីលេខទូរស័ព្ទ បណ្តាញអ៊ីនធ័រនែត បានស្តុកទុកទិន្នន័យផ្សេងទៀត ដូចជាអត្តសញ្ញាណ ភេទ និងទីកន្លែង ភូមិសាស្រ្តរបស់អ្នកប្រើប្រាស់បណ្តាញសង្គមហ្វេសប៊ុក។ តាមវិបសៃតិ៍ ព័ត៌មានTechCrunch លេខទូរស័ព្ទ របស់អ្នកប្រើប្រាស់សង្គមហ្វេសប៊ុក ត្រូវបានគេស្តុកទុក នៅក្នុងបណ្តាញអ៊ីនធ័រនែតមួយដែលគ្មានប្រព័ន្ធការពារ ពោល គឺអ្នកណាក៏អាចចូលទៅមើលបាន ដោយមិនចាំបាច់ត្រូវការ ចុះលេខសោរសម្ងាត់ (Password)។
នៅពេលមានលេខទូរស័ព្ទរបស់ខ្លួន ត្រូវស្តុកទុក នៅក្នុងបណ្តាញអ៊ីនធ័រនែត ដែលគ្មានការការពារយ៉ាងដូច្នេះ អ្នកប្រើប្រាស់ហ្វេសប៊ុកអាចប្រឈមនឹងការរំខាន ដោយសារការទូរស័ព្ទ ផ្សាយពាណិជ្ជកម្ម ពីជនអនាមិក ឬការលួចរបស់ចោរអ៊ីនធ័រនែត ដូចករណីរបស់ប្រធានក្រុមហ៊ុនTwitter កន្លងមក។
នៅថ្ងៃពុធ ម្សិលមិញ ក្រុមហ៊ុនហ្វេសប៊ុកបានបញ្ជាក់ ការចុះផ្សាយរបស់វិបសៃតិ៍ TechCrunch ប៉ុន្តែ អះអាងថា មានតែ អ្នកប្រើប្រាស់ ហ្វេសប៊ុក ពាក់កណ្តាល ប៉ុណ្ណោះ ពោលគឺជាង ២០០លានគណនី ដែលមានលេខទូរស័ព្ទរបស់ខ្លួន ត្រូវបានលេចធ្លាយ ទៅក្នុងបណ្តាញអ៊ីនធ័រនែត។ មួយវិញទៀត បើតាមហ្វេសប៊ុក ព័ត៌មានឯកជនរបស់អ្នកប្រើប្រាស់ ដែលធ្លាក់ទៅក្នុងដៃរបស់ជនទី៣ ភាគច្រើន ជាព័ត៌មានថតចម្លង និងព័ត៌មានចាស់ៗតែប៉ុណ្ណោះ។ ដោយធានាថា គណនីរបស់អ្នកប្រើប្រាស់ មិនត្រូវបានគេលួចចូលទៅយកទិន្នន័យ ក្រុមហ៊ុនហ្វេសប៊ុកអះអាងដែរថា ខ្លួនបានរឹបអូសយកទិន្នន័យទាំងនោះមកវិញរួចហើយ នៅក្រោយឧប្បត្តិហេតុលើកនេះ។
នៅចុងខែសីហាកន្លងទៅ ក្រុមហ៊ុនហ្វេសប៊ុកបានបង្ហាញឲ្យឃើញ ពីរបៀបប្រើប្រាស់ថ្មី ដែលអនុញ្ញាតឲ្យអ្នកប្រើប្រាស់ហ្វេសប៊ុក ចូលទៅគ្រប់គ្រង ត្រួតពិនិត្យ ទិន្នន័យផ្ទាល់ខ្លួន របស់ខ្លួន ដែលក្រុមហ៊ុនអាមេរិកាំង ផ្សេងទៀត ក្រៅពីហ្វេសប៊ុក បានយកទៅប្រើប្រាស់។ ការប្រកាសយ៉ាងដូច្នេះរបស់ហ្វេសប៊ុក ធ្វើឡើងនៅមួយសប្តាហ៍ក្រោយ ហ្វេសប៊ុកបានទទួលស្គាល់ថា ខ្លួនបានថត កត់ត្រា ជាអក្សរ កិច្ចសន្ទនារបស់អ្នកប្រើប្រាស់ ហ្វេសប៊ុក។
រងការចោទប្រកាន់ថា ខកខាន មិនបានការពារ និងបណ្តោយទុកឲ្យទិន្នន័យរបស់អ្នកប្រើប្រាស់ ធ្លាក់ទៅក្នុងដៃរបស់ជនទី៣ ក្រុមហ៊ុនហ្វេសប៊ុក ទៅត្រូវបានអាជ្ញាធរការពារជីវិតឯកជនអាមេរិកាំង ពិន័យជាប្រាក់ ៥ពាន់លានដុល្លារ កាលពីចុងខែកក្កដា កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ